Nshemereire Kweguza Esente?

ENFUMU egi neemanywa munonga abantu b’omu East Africa, kandi neeyoreka oku abantu baingi barikwehurira omu nsi yoona. Naiwe nikwo orikwehurira otyo aha bikwatiraine n’okweguza sente ahari munywani waawe nari ahandi? N’obu obumwe kiraabe nikibaasa kwetengyesa ngu oyeguze sente, kwonka shi ni kirungi? Ni buremeezi ki oburi omu kweguza?

Enfumu y’Oruswahili endiijo neeyoreka oburemeezi bukuru bw’okweguza. Neegira eti: “Okweguza hamwe n’okuguza nibishiisha omukago.” Buzima, amabanja nigabaasa kushiisha omukago n’obunywani. Nangwa n’obu omuntu yaakuba aine ebigyendererwa birungi kandi atebeekaniise gye, obumwe tibirikuba nk’oku arikuteekateeka. Nk’eky’okureeberaho, omuntu yaaremwa kushashura omu bwire, owaamugurize naabaasa kuguubwa kubi. Ekyo nikibaasa kushiisha omukago gw’owaagurize n’owaayegurize hamwe n’ogw’ab’omu maka gaabo. Obu okweguza kurikubaasa kurugamu oburemeezi, twine kweguza haaba hatariho ky’okukora kyona omu mwanya gw’okukureeba nk’omuringo gworobi gw’okutungamu sente.

Okweguza sente nikubaasa n’okushiisha omukago gw’omuntu na Ruhanga. Mu muringo ki? Eky’okubanza, Baibuli neegira ngu omubi niwe arikwanga nkana kushashura amabanja ge. (Zaaburi 37:21) Kandi neegira ngu “oyegurize aba omuhuuku w’omugurize.” (Enfumu 22:7) Oyegurize aine kukimanya ngu yaaba atakashashwire, naaba ari ahansi y’obushoboorozi bw’ogwo omugurize. Enfumu ya African endiijo neegira eti: “Waayetiiza okuguru kw’omuntu, oine kuza ahu arikukugambira kuza.” Enfumu egi neemanyisa ngu omuntu oine eibanja rihango naaba ataine bugabe bw’okukora eki arikwenda.

Nikimanyisa ngu omuntu ogwo naaba aine kwebembeza okushashura eibanja. Kitari ekyo, nihaija kubaho oburemeezi. Okugira amabanja maingi nikirugamu amaganya, okuburwa oturo, okukora munonga, okutongana kw’abashweraine, okushenyuka kw’amaka, okuza omu macwero g’emanja nari okukomwa. Ebiri omu Abarooma 13:8 nibituhabura biti: “Mutarigira eibanja ryona aha muntu, kureka ery’okukundana.”

NIKYETENGYESA?

Kurugiirira aha bi twareeba, ni kirungi kwegyendesereza aha bikwatiraine n’okweguza sente. N’eky’obwengye kwebuuza oti: Hariho ekyetengo ky’amaani ekishemereire kundeetera kweguza? Okweguza nigwo muringo gwonka ogurikukuhwera kucungura ebirikukutaahiza kubaasa kureeberera eka yaawe? Nari omururu nigwo gurikukureetera kweguza ahabw’okwetenga ebintu bingi? Nikiba kiri kirungi kumarwa n’ebi oine omu mwanya gw’okwereetera amabanja orikweguza.

Hatariho kubanganisa, hariho obu kirikubaasa kwetengyesa kweguza, nka haabaho embeera erikwetengyesa sente ahonaaho, kandi orikureeba ngu tihariho gundi muhanda gw’okuzitunga. Omuntu yaacwamu kweguza, ashemereire kutwaza gye kandi akooreka ngu n’omwesigwa. Eki nikibaasa kukorwa kita?

Eky’okubanza, toshemereire kweguza aha muntu ahabw’okugira ngu aine sente nyingi nari ebintu bingi. Titushemereire kuteekateeka ngu omuntu yaaba aine sente naaba aine kutuhwera omu by’esente. Kandi nabwo titushemereire kuteekateeka ngu omuntu nk’ogwo yaatuguza titwine kumushashura. Toshemereire kwegomba abo abarikureebeka nk’abaine sente.​—Enfumu 28:22.

Kandi, hamya ngu waashashura ebi waayegurize kandi okikore omu bwire obu mwaragaine. Omuntu okugurize sente yaaba atakuhaire obwire obu oraamushashure, iwe oshemereire kubweteeraho kandi okamushashura omu bwire obwo. Ni kirungi kuta endagaano yaanyu omu buhandiikye, kwetantara okutaikirizana okurikubaasa kubaho. (Yeremia 32:9, 10) Kyaba nikibaasika, ba niiwe waareeta ebi orikuza kushashura kugira ngu obaase kwebaza owaakugurize. Okuhikiiriza obujunaanizibwa bw’okushashura ebi waayegurize nikurugamu emikago mirungi. Yesu omu kwegyesa kwe okw’aha Rushozi akagira ati: “Ebigambo byanyu bibe, Eego, Eego nari Ngaaha, Ngaaha.” (Matayo 5:37) Kandi butoosha guma noijuka obuhabuzi bwa Yesu obu: “Byona ebi mwenda ngu abantu babagirire, naimwe mube nikwo mwabagirira.”​—Matayo 7:12.

EMISINGYE YA BAIBULI ERIKUHWERA

Baibuli neeha obuhabuzi oburikubaasa kuhwera omuntu kwetantara okweguza sente. Neegira eti: “Okutiina Ruhanga, okurimu okumarwa, kurimu enshaagi nyingi.” (1 Timoseo 6:6) Ekirikumanyisa ngu omuntu okumarwa n’ebi aine, n’omuringo murungi gw’okwetantara oburemeezi oburikuruga omu kweguza. N’amazima, tikyorobi kumarwa omu nsi egi erimu abantu abarikwenda kutunga okushemererwa okw’ahonaaho. Aha, “okutiina Ruhanga” niho kirikwetengyeseza munonga. Mu muringo?

Twara eky’okureeberaho ky’omushaija n’omukazi Abakristaayo omuri Asia. Obu baabaire baherize kutaaha omu bushwere, bakaba nibeegomba abo abaabaire baine amaju. N’ahabw’ekyo, bakacwamu kugura enju omu sente zaabo ezi baabaire babiikire hamwe n’ezi baayegurize omu banka n’aha banyabuzaare. Kwonka bwanyima, bakatandika kutunga oburemeezi bw’okushashura esente nyingi buri kwezi. Bakatunga ogundi murimo, batandika kukora eshaaha nyingi, ekyabareeteire kutagirira abaana baabo obwire. “Amaganya, obusaasi n’okutagwejegyera bikambeera nk’orukiri ruremeire munonga aha mutwe gwangye. Nkabura obwikizo,” nikwo omushaija yaagizire.

Bwanyima, bakaijuka ebigambo ebiri omu 1 Timoseo 6:6 reero bacwamu kuguza enju yaabo. Kikabatwarira emyaka ebiri kubaasa kutereera. Omushaija ogu hamwe n’omukazi we bakeega ki ahabw’ebyabahikireho? Bakahendera barikugira ngu “okukunda eby’omwoyo okukira eby’obutungi, n’eky’oburinzi.”

Enfumu y’Oruswahili eri aha kutandika neemanywa baingi. Kwonka ekyo tikiremeise abantu kweguza sente. Kurugiirira aha misingye ya Baibuli ei twaheza kureeba, nikiba kiri eky’obwengye kuteekateeka aha kibuuzo eki: Nshemereire kweguza esente?