OMUTWE OGURI AHA MUNAARA
Ahabw’enki Oine Kushoma Baibuli?
“Nkaba ninteekateeka ngu Baibuli egumire kwetegyereza.”—Jovy
“Nkaba niimanya ngu okushoma Baibuli nikutama.”—Queennie
“Ku naareebire obuhango bwa Baibuli, nkaburwa ekihika ky’okugishoma.”—Ezekiel
Orateekateekireho kushoma Baibuli, kwonka okatiina nk’abaagambwaho aha ruguru? Kumara emyaka mingi, okushoma Baibuli kutwire nikitiinisa abantu. Kwonka shi ku waakumanya ngu neebaasa kukuhwera kutunga okushemererwa n’okumarwa? Kandi shi ku waakumanya ngu hariho emiringo ei orikubaasa kugishomamu ekakushemeza? Nooyenda kureeba oku Baibuli erikubaasa kukuhwera?
Yetegyereze ebigambo bya bamwe abashangire ngu nikihwera munonga kushoma Baibuli.
Ezekiel, ow’emyaka nka 20, naagira ati: “Ira, nkaba ndi nk’omuntu orikuvuga emotoka kwonka ntarikumanya ei ndikuza. Kwonka okushoma Baibuli kimpweraire kugira ekigyendererwa. Erimu obuhabuzi obu ndikubaasa kugyenderaho omu bi ndikukora.”
Frieda, nawe oine emyaka nka 20, naashoboorora ati: “Nkaba nindahuka kugira ekiniga. Kwonka ahabw’okushoma Baibuli, nyegire kwetegyeka. Eki nikimpwera kukoragana n’abandi, n’ahabw’ekyo nyine abanywani baingi hati.”
Omukazi ow’emyaka nka 50 orikwetwa Eunice naagamba aha Baibuli ati: “Neempwera kuba omuntu murungi, n’okuhindura emitwarize yangye mibi.”
Nk’abashomi abo, n’abandi obukaikuru n’obukaikuru beegire ngu okushoma Baibuli nikubaasa kuhwera omuntu kwongyera kwesiimira magara. (Isaaya 48:17, 18) Baibuli neebaasa kukuhwera (1) kucwamu gye, (2) kugira abanywani barungi, (3) kwemera amaganya, (4) kandi ekirikukira byona, okwega amazima agarikukwata ahari Ruhanga. Obuhabuzi bwa Baibuli niburuga ahari Ruhanga, n’ahabw’ekyo tiburimu nshobe. Ruhanga tarikuha buhabuzi bubi.
Ekintu kikuru n’okutandika kugishoma. Ni bukoryo ki oburikubaasa kukuhwera kutandika kugishoma n’okugikunda?