Waareeba ngu Tokibaasa Kwemera Embeera

Nk’eky’okureeberaho, Sally,a ow’omuri United States, owaafeereirwe ebintu bye bingi omu ihunga, naashoboorora ati: “Nkeehuririra ngu tinkibaasa kwongyera kwemera agandi maganya. Kumara ebiro bingi nkaba ninyehurira ngu mpikire aha kisiika.”

Nari shi ku waakufeerwa omukundwa? Janice, ow’omuri Australia, naagira ati: “Ku naafeereirwe batabani bangye babiri, nkateeraho kwegumyagumya nk’oku naabaire nimbaasa. Nkeshengyereza Ruhanga nti: ‘Nyabura ’we, tindikubaasa kwemera obundi busaasi! Reka nfe. Nimpurira ntakyenda kugumaho.’”

Kwonka we Daniel, akagwerwa akagwe omukazi we ku yaashambaine. Naashoboorora ati: “Omukazi wangye ku yaangizire ngu ashambaine, okaba nooshusha ngu baancumita omusyo omu mutima. Nkaguma nintunga obusaasi obu emirundi mingi kumara ameezi maingi.”

Omunaara gw’Omurinzi ogu niguza kworeka oku kiri eky’omugasho kugumaho ohuriire

• Haabaho ekihikiirizi

• Omukundwa yaafa

• Enkunzi yaawe yaakureebya

• Waaba oine endwara y’amaani

• Waareeba ngu tokibaasa kwemera embeera

Noobaasa kugumisiriza ota haabaho ekihikiirizi?