Haabaho Ekihikiirizi

“Omu kubanza tukeehwa amatsiko. Ahabw’okugira ngu ebitsinduka by’eitaka n’amaizi g’omwegyemure bikacwekyereza buri kimwe eki twabaire twine.”—Andrew, owa Sierra Leone.

“Bwanyima y’eihunga, tukagaruka omuka. Tihaine ekyabaire kitsigaireho. Tukaburwa ebigambo. Muhara wangye akatsimba amaju yaarira.”—David, ow’omuri Virgin Islands.

KU ORAABE orahikirweho ekihikiirizi, noobaasa kwetegyereza embeera y’abantu abahikirweho ekihikiirizi. Embeera egi neebaasa kutwariramu ekyekaango, okwehwa amatsiko, okushoberwa, obwoba, n’okurootaguzibwa. Baingi abarikuhikwaho ekihikiirizi nibaba baruhire, bahahaire omutima, bataine n’ekihika ky’okugumaho baine amagara.

Naiwe ku oraabe ohikirweho ekihikiirizi, noobaasa kuhurira ngu tokibaasa kwemera amaganya. Nangwa noobaasa nookuteekateeka ngu toshemereire kugumaho ohuriire. Kwonka, Baibuli neeshoboorora ngu okugumaho oine amagara n’eky’omugasho kandi oine enshonga eshemereire kukureetera kugira amatsiko g’okugira ebiro birungi eby’omumaisho.

OKUMANYA AMAZIMA GA BAIBULI NIKITUHA AMATSIKO

Omubuurizi 7:8 nihagira ngu, ‘omuheru gw’ekintu nigukira okutandika kwakyo.’ Waaba oherize kuhikwaho ekihikiirizi, noobaasa kwehwa amatsiko. Kwonka oine kukora kyona ekirikubaasika, embeera kubaasa kugaruka omu nteeko.

Baibuli neegamba aha bwire obu ‘hataraagarukye kuhurirwa iraka ry’okucura, n’obu kwakuba okurira kw’abaine enaku.’ (Isaaya 65:19) Eki nikiija kuhikiirira ensi ku eraahindwirwe paradiso obu Obukama bwa Ruhanga buraabe nibutegyeka. (Zaaburi 37:11, 29) Nihaija kuba hatakiriho bihikiirizi. Okwijuka ebintu bibi n’enyehurira mbi nibiija kwihirwaho kimwe, ahakuba Ruhanga ow’Obushoboorozi Bwona naaraganisa ati: ‘Ebya ira tibirikwija kwijukwa, n’obu kwakuba okuteebwaho omutima.’—Isaaya 65:17.

Teekateeka ahari eki: Omuhangi naatebeekanisa kukuha nyentsya nungi n’amatsiko, kikubaasise kutunga obugwagye obutegyeki bwa Ruhanga obuhikiriire bwaba nibutegyeka. (Yeremia 29:11) Okumanya amazima aga nikibaasa kukuhwera kugira ekyetengo ky’okuguma ohuriire? Sally, orikugambwaho omu kicweka eky’okubanza, naagira ati: “Okweijutsya ebintu birungi byona ebi Obukama bwa Ruhanga burikuza kukora omu biro by’omumaisho, nikibaasa kukuhwera kwehuzya eby’enyima reero oyemere embeera ei orimu hati.”

Nitukuhiga kwongyera kwega bingi aha bi Obukama bwa Ruhanga buri haihi kukorera abantu. Waakora otyo nootunga obuhame ngu n’obu oraabe ohikirweho ebihikiirizi bingi, n’eky’omugasho kugumaho ohuriire obwo otegyereize nyentsya etarimu bihikiirizi. Ekyo kitakabaireho, Baibuli neeha obuhabuzi burikukora oburikubaasa kukuhwera kwemera byona ebirikureetwa ebihikiirizi. Yetegyereze bimwe aha by’okureeberaho.

Ebyahandiikirwe Ebirikubaasa Kukuhwera

Byama ekirikumara.

“Oruhi rumwe rwijwire obusingye niruhita empi ibiri eziijwire emirabanamu n’okwitanira omuyaga.”—Omubuurizi 4:6.

Abacondooza nibagira ngu abantu baatunga ekyekaango ky’amaani, nibabaasa kwehwa amatsiko reero bagire enyehurira mbi baaba batabyamire ekirikumara. N’ahabw’ekyo, n’eky’obwengye kuhuumura ekirikumara.

Gamba enyehurira zaawe.

“Amaganya g’omutima gw’omuntu gaamureetera okweyinamirira, kwonka ekigambo kirungi kigushemeza.”—Enfumu 12:25.

Gira ou waagamba nawe omuka nari omunywani. Naabaasa kukuhurikiza, kandi akuhe n’obundi buhwezi oburikukora.a

Teekateeka aha biro birungi by’omumaisho.

‘Nitutegyereza eiguru erisya n’ensi ensya ebiraatuurwemu okuhikiirira nk’oku [Ruhanga] yaaraganiise.’—2 Petero 3:13.

a Omuntu orikugira amaganya kumara obwire buraingwa nari okwerarikirira kw’amaani naaba aine kutunga obujanjabi.