Amazima Agarikukwata aha Biro by’Omumaisho
Orateekateekire aha kirikuza kubaho omu biro by’omumaisho? Baibuli neetugambira ebintu bikuru ebiri haihi kubaho ebiraakwate aha bantu boona omu nsi.
Yesu akashoboorora oku twabaire nitwija kumanya “ngu obukama bwa Ruhanga buri haihi.” (Luka 21:31) Akaha obunabi oburikutwariramu, entaro, emitsitsa, eibura ry’eby’okurya, n’endwara ebi turikureeba hati.—Luka 21:10-17.
Kandi Baibuli neeyoreka ngu ‘ebiro by’emperu’ eby’obutegyeki bw’abantu nibiija kumanyirwa aha kusiisikara kw’emicwe y’abantu. Noobaasa kushoma emitwarize egi omuri 2 Timoseo 3:1-5. Waareeba emitwarize egi n’ebikorwa by’abantu obunaku obu, hatariho kubangaanisa noikiriza ngu obunabi bwa Baibuli obu nibuhikaana n’ebirikubaho hati.
Eki nikimanyisa ki? Obukama bwa Ruhanga buri haihi kureetaho empinduka z’amaani eziraahindure embeera omu nsi. (Luka 21:36) Omu Baibuli, Ruhanga naaraganisa kureeta embeera nungi omu nsi, kandi naija n’okuha abantu abaraatuuremu ebintu birungi. Aha hariho eby’okureeberaho bimwe.
OBUTEGYEKI BURUNGI
‘[Yesu] akaheebwa obutegyeki, ekitiinisa n’obukama, ngu abantu b’amahanga goona, n’enganda zoona z’endimi ezitari zimwe, bagume bamuheereze; obutegyeki bwe n’obutegyeki bw’ebiro byona obutarihwaho, kandi n’obukama bwe n’obukama obutarimarwaho.’—DANIELI 7:14.
Eki kirikumanyisa: Noija kuba ori omu mbeera nungi orikutegyekwa gavumenti nungi ey’ensi yoona ei Ruhanga yaataireho, kandi akatoorana Omwana we kuba Omugabe waayo.
AMAGARA MARUNGI
‘Tihaine mutuuzi waayo orikwija kugira ati: Ndwaire.’—ISAAYA 33:24.
Eki kirikumanyisa: Torikwija kugaruka kurwara nari kumugahara, noija kutuuraho otarikufa.
OBUSINGYE OBWABUZIMA
‘Naamaraho engamba okuhika aha muheru gw’ensi.’—ZAABURI 46:9.
Eki kirikumanyisa: Tiharikwija kugaruka kubaho entaro n’okubonabona.
ENSI NEIJA KWIJURA ABANTU BARUNGI
‘Omubi naija kuba atakiriho. Abacureezi nibaija kuhungura ensi.’—ZAABURI 37:10, 11.
Eki kirikumanyisa: Abantu ababi nibaija kuba batariho, kureka abo abeteekateekire kworobera Ruhanga.
ENSI YOONA NEIJA KUBA PARADISO
‘Nibaija kwombeka amaju, bagatuuremu, nibaija kubyara emizaabibu, barye ebijuma byayo.’—ISAAYA 65:21, 22.
Eki kirikumanyisa: Ensi yoona neija kuba nungi munonga. Ruhanga naija kugarukamu okushaba kwaitu ngu ebi arikukunda bikorwe omu nsi.—Matayo 6:10.