Obupapura bw’Okweta Abantu aha Kiijutsyo Kugabwa omu Nsi Yoona!

1. Ni kampeyini ki y’omutaano eraabeho omu nsi yoona Ekiijutsyo kitakabaireho?

¹ “Mugume mukore mutyo okuunyijukiraho.” (Luk. 22:19) Omu kworobera ekiragiro kya Yesu eki, ebiro 30 Maaci, 2010 abaramya ba Yehova nibaija kuteeranira hamwe n’abo abarikwenda kumanya ebirikukiraho, kwijuka okufa kwa Yesu. Obupapura obwo obw’okweta abantu aha Kiijutsyo nibwija kugabwa omu nsi yoona kutandika na Maaci 13 kuhika Maaci 30.

2. Akapapura k’okweta abantu nitubaasa kukagaba tuta?

² Oku Orikubaasa Kugaba Akapapura Ako: Noobaasa kuha omuntu akapapura ako kugira ngu areebe ekishushani ekiriho, reero ogire ngu: “Omu mwabazyo ebiro 30 Maaci, obukaikuru bw’abantu omu nsi yoona nibaija kweteerana kwijuka okufa kwa Yesu. Naija kukuha akapapura aka iwe n’ab’eka yaanyu akarikubeeta kwija kuba aha Kiijutsyo eki. Noobaasa kwija na banywani baawe. Nyabura we guma noijuka eshaaha n’omwanya ahu Ekiijutsyo kiraabe omu kicweka kyanyu.” Kurugiirira aha mbeera, noobaasa kucwamu kushoma Luka 22:19 kuruga omu Baibuli kumworeka ngu okwijuka okufa kwa Yesu n’ekiragiro. Kwonka, guma noijuka ngu twine obwire bukye kugaba obupapura omu kicweka eki turikubuuriramu, n’ahabw’ekyo, ni kirungi kukoresa ebigambo bikye.

3. Nitubaasa kweta baahi?

³ Ekibiina kyanyu kyaba kiine ekicweka kihango ky’okubuuriramu, abareeberezi nibabaasa kubashaba kutsiga obupapura obwo omu maka agu mutarashagyemu bantu. Kyaba nikibaasika gaba obupapura bw’okweta abantu aha Kiijutsyo hamwe na zaamagaziini. Teeraho kweta aboorekire ngu nibenda kumanya ebirikukiraho, abeegi ba Baibuli, abanyabuzaare, abu orikushoma nabo, abu orikukora nabo, abataahi n’abandi abu orikumanya.

4. Okusiima rukundo ya Yehova ahabw’okutuha ekitambo nikiija kutuhiga kukora ki?

⁴ Tebeekanisa Obaase Kwejumbiramu Kimwe: Obwire bw’Ekiijutsyo ni burungi okwongyera aha buheereza bwaitu. Noobaasa kukora empindahinduka omu ntebeekanisa yaawe okore nka payoniya omuhwezi? Oine abaana nari abeegi ba Baibuli abarikukora gye omu by’omwoyo? Waaba obaine, buuza abareeberezi kureeba yaaba nabo nibabaasa kwejumba omuri kampeyini egi nk’ababuurizi abatakabatiziibwe. Okusiima rukundo ya Yehova ahabw’okutuha ekitambo nikiija kutuhiga kubaho n’okweta abantu baingi kwija kuba naitwe aha Kiijutsyo.—Yoh. 3:16.