Ebaruha Kuruga aha Kakiiko Akareeberezi

Abajurizi ba Yehova Bagyenzi Baitu:

Ka twine omugisha gw’amaani okwetererwa eiziina ry’ogwo ow’Obushoboorozi Bwona omu nsi n’omu iguru Yehova! Eiziina eryo tiririkuhwaho ebiro byona, tiririkucwekyerezibwa kandi tiririkugyeragyeranisibwa. Yehova niwe yaatuhaire eiziina rye ngu turyetererwe kandi okukira munonga kuruga omu mwaka 1931, tutwire turikwetererwa eiziina eryo ery’omutaano. (Isa. 43:10) Hatariho kubanganisa nikitwesiimisa okumanywa nk’Abajurizi ba Yehova.

Omuregi naakora n’amaani kumaraho eiziina rya Ruhanga. Ahansi y’obutegyeki bwe, amahanga nigarwanisa eiziina rya Yehova. Orurembo Orukuru Babulooni, nirurwanisa eiziina rya Ruhanga kandi rubaasize kuriiha omu nvunuura za Baibuli enyingi. Okutaana n’ekyo, Yesu akatwara eiziina rya Ishe nk’ery’omuhendo, yaarita omu mwanya gw’okubanza omu shaara ya tataitwe ei yaayegyeise abakuratsi be. Akagira ati: “N’ahabw’ekyo, mushabe muti: Tataitwe ow’omu iguru, eiziina ryawe ryezibwe.” (Mat. 6:9) Haherize kuhinguraho obwire akashaba Ishe ati: “Abashaija, abu waampaire omu nsi nkabooreka eiziina ryawe.” (Yoh. 17:6) Turikutooreza eky’okureeberaho kye kirungi, n’obweziriki tumaririire kimwe kukira oku kiraabaire kurangiirira eiziina rya Yehova omu nsi yoona.

Ekyahandiikirwe ky’omwaka ekya 2009, “Buurira hoona amakuru marungi,” kikatuhiga kwejumbira kimwe omu kubuurira. (Byak. 20:24, NW) Hatariho kubangaanisa Yehova ahaire omugisha okuteeraho kwaitu omu mwaka gw’obuheereza oguhweire. Abantu baingi omu nsi yoona babuuriirwe kugira ngu eiziina rya Yehova rihimbisibwe kandi riheebwe ekitiinisa. Omubaro musya gw’ababuurizi 7,313,173 bakeejumba omu kubuurira abantu, n’okwegyesa abo ab’emitima egororokire abarikwenda kumanya ekirikubaasa kushoboorora oburemeezi obu barikutunga buri izooba. Abantu 18,168,323 nibo baizire aha Kwijuka Okufa kwa Kristo, ekirikworeka ngu abantu abandi baingi nibabaasa kwikiriza amakuru agarikukwata aha eiziina rya Yehova emperu y’ensi egi embi etakahikire.

Yehova yaaba naakikunda, nitwija kugumizamu kubuurira amakuru marungi g’Obukama twine omujinya, turikukoresa buri kagisha kuhika aha bantu abari omu bicweka ebi turikubuuriramu. (Mat. 24:14; Mak. 13:10) Twaba nitubuurira enju aha nju, aha nguuto, turikukoresa amabaruha nari esimu nari kitaraariire, ka tuteereho kumanyisa abantu baingi nk’oku kirikubaasika eiziina rya Yehova n’ebigyendererwa bye.

Twine enshonga nyingi kwikiriza ngu Yehova juba naija kugira eki yaakora okweza eiziina rye. (Ezk. 36:23) Obwire buri haihi kuhika obu abo boona abarikurijuma baraije kucwekyerezibwa. Ka niriija kuba eizooba rikuru aha baheereza ba Yehova abeesigwa, abamanyiise abantu eiziina rye kandi bakamushagika nk’oine obushoboorozi bw’okutegyeka byona eby’omu nsi n’omu iguru!

Rukundo ei Yehova ainiire abantu be ekareebwa butunu aha Nteerane ez’Ebiro Bishatu n’ez’Ensi Yoona ezaabaire ziine omutwe “Mugume Nimureeba!” ezaabaireho omu mwaka 2009. Enteerane ezo zikaba ez’omugasho munonga omu byafaayo by’Abajurizi ba Yehova, kandi zikatuhiga kwongyera kumanya obukuru bw’okuguma nitureeba omu by’omwoyo ahabw’eizooba rya Yehova.—Mak. 13:37; 1 Tes. 5:1, 2, 4.

Buzima Yehova ni murungi ahariitwe, naatureetera kugira okushemererwa. Naatubyamya omu irisizo eririmu obunyaatsi kandi atutwara omu myanya erimu amaizi.—Zab. 23:1, 2; 100:2, 5.

Mwine amatsiko g’okuguma nimutunga emigisha ya Yehova, mweyongyere kwejumbira kimwe omu buheereza bwe!

Tubainiire rukundo mpango y’Ekikristaayo imwe ab’eishe-emwe omu nsi yoona,

Niitwe Ab’eishe-emwe,

Akakiiko Akareeberezi ak’Abajurizi ba Yehova