Omurimo gw’Omugasho Munonga
1. Okukunda kwejumba omu kubuurira nikiija kutuhiga kwefeerereza ki?
1 Ahabw’enki butoosha nituhigwa kukoresa obwire bwaitu, amaani gaitu n’ebintu byaitu omu murimo gw’okubuurira? Ahabw’okuba tihariho omurimo ogurikugasira abantu munonga nk’ogw’okubuurira. Okuteekateeka aha ku guhwereire munonga abantu nikiija kutuhiga kwongyera kwejumba omu murimo ogu ogutarigarukwamu kukorwa.—Ebyakozirwe 20:24.
2. Okubuurira kwaitu nikuhwera kuta omu kweza eiziina rya Yehova ery’omuhendo?
2 Nigweza Eiziina rya Yehova: Omurimo gw’okubuurira niguhwera abantu kumanya ngu Obukama bwa Yehova oburikutegyekwa Kristo Yesu nibwija kwihaho zaagavumenti z’abantu zoona hamwe n’oburemeezi bwona obu abantu baine. (Mat. 6:9, 10) Nigworeka ngu Yehova niwe wenka orikubaasa kutucungura okurwara n’okufa. (Isa. 25:8; 33:24) Obu turikwetererwa eiziina rye, abandi abarikureeba emicwe mirungi yaitu n’omujinya gwaitu nibabaasa kumuhimbisa. (1 Pet. 2:12) Ka ni kishemeza itwe okubuurira hoona eiziina ry’ow’Obushoboorozi Bwona Mukama Yehova!—Zab. 83:18.
3. Ni migisha ki ei abo abarikwikiriza amakuru g’Obukama barikutunga?
3 Nigukiza Abantu: Yehova ‘tarikwenda muntu weena kuhwerekyerera, kureka naayenda ngu boona bahikye aha kweteisa.’ (2 Pet. 3:9) Kwonka, haaba hatariho orikubeegyesa, nibabaasa kumanya bata eki Yehova arikutwara nk’ekirungi nari ekibi? (Yon. 4:11; Rom. 10:13-15) Abantu ku barikwikiriza amakuru marungi, bakareka emitwarize mibi, amagara gaabo nigaba marungi. (Mik. 4:1-4) Ekindi, nibagira amatsiko g’okutunga amagara agatahwaho. Okwejumba kwaitu omu murimo gw’okubuurira n’okwegyesa nikutukiza hamwe n’abo abarikutuhurikiza. (1 Tim. 4:16) Ka twine eky’amaani eki turikukora omu omurimo mukuru ogu!
4. Ahabw’enki tushemereire kwejumbira kimwe omu murimo gw’okubuurira aha Bukama n’okuhindura abantu abeegi?
4 Juba okubonabona kwingi nikwija kureetera ensi egi embi kuhwaho. Abo abarikuramya Yehova nibaija kuhonokaho. N’ahabw’ekyo, okubuurira n’okuhindura abantu abeegi nigwo murimo mukuru kandi ogw’omugasho munonga oguriyo nigukorwa omu bunaku obu. Ka tube nigwo twayebembeza omu magara gaitu.—Mat. 6:33.