Tushemereire Kuguma Twine Omujinya gw’Okubuurira
1 Okuruga 1992, buri mwaka Abajurizi ba Yehova n’omujinya nibamara eshaaha ezirikurenga omu kahumbi barikwejumba omu murimo gw’okubuurira Obukama n’okuhindura abantu abeegi omu nsi yoona. Ka twine okushemererwa okureeba ngu twine eki tukozireho omu kubuurira eshaaha nyigi nk’ezo!—Mat. 28:19, 20.
2 Buzima okwebazibwa n’ekitiinisa n’ebya Yehova, otuhwereire omu kubuurira kwaitu omu biro ebi ‘eby’akabi kaingi.’ (2 Tim. 3:1) Nikitwetengyesa ki twaba turi ab’okugumizamu turikwejumba n’omujinya omu murimo ogu omukuru?
3 Ekirikutuhiga Kugira Omujinya: Okukunda munonga Ruhanga n’abataahi baitu, otaireho n’ekyetengo kyaitu kuruga omu mutima eky’okuhikiiriza okwehayo kwaitu, nibyo birikutuhiga omu buheereza bwaitu obw’Obukama. (Mat. 22:37-39; 1 Yoh. 5:3) Rukundo neetuhiga kugira ebi twayefiisiriza kugira ngu tubaase kwejumbira kimwe omu murimo gw’okubuurira.—Luka 9:23.
4 Teeraho Kuguma Oine Omujinya: Omuzigu waitu Sitaane naakora kyona eki arikubaasa kutuubya omujinya gwaitu omu kubuurira. Obutafayo bw’abari omu kicweka eki turikubuuriramu, eby’ensi egi ebirikutuhuzya, oburemeezi omu kwebaisaho, n’okwemereza omutima ahabw’amagara mabi ni bimwe aha bi arikukoresa omu kuteeraho kutumaramu amaani.
5 N’ahabw’ekyo, twine kukora n’amaani kureeba ngu twaguma twine omujinya. Ni kikuru okugira ‘okukunda kwaitu okw’okubanza.’ Ekyo nikitwariramu butoosha okushoma n’okuteekateeka munonga aha Kigambo kya Ruhanga, Baibuli, n’okukoresa gye byona ebi Yehova arikutuha kuhamya okwikiriza kwaitu arikurabira omu ‘mwambari orikwesigwa kandi ow’obwengye.’—Kush. 2:4; Mat. 24:45; Zab. 119:97.
6 Nk’oku obunabi bwa Baibuli burikworeka gye, ekiro kya Yehova eky’okucwekyereza abantu abatarikumutiina nikiija juba. (2 Pet. 2:3; 3:10) Turikumanya ekyo, ka tukore n’amaani kureeba ngu twaguma twine omujinya omu buheereza, omu murimo gw’okubuurira Obukama n’okuhindura abantu abeegi ogurikukorwa hati omu nsi yoona!