Omu Bwire bw’Ekiijutsyo, Noija Kworeka Obweziriki nk’Obu Yehova na Yesu Baine?
1. Abajurizi ba Yehova nibateeraho kukora ki omu bwire bw’Ekiijutsyo?
1 Yehova n’obweziriki naahikiiriza ekigyendererwa kye. Omuri Isaaya 9:7 nihooreka emigisha emwe ei Obukama bwa Ruhanga buraareete, nihagira hati: “Obweziriki bwa MUKAMA ow’amahe nibwo burihikiiriza ekyo.” Nikyo kimwe, obu omwana wa Ruhanga yaabaire naabuurira akiri omu nsi, akooreka obweziriki ahabw’okuramya okw’amazima. (Yoh. 2: 13-17; 4:34) Buri mwaka omu bwire bw’Ekiijutsyo, ababuurizi baingi omu nsi yoona nibateeraho kutooreza obweziriki obu Yehova na Yesu baine, barikwongyera aha buheereza bwabo omu kubuurira. Noija kuba omwe ahari bo?
2. Obweziriki nibwija kutuhiga kukora ki kutandika na Maaci 7?
2 Kampeyini y’Ekiijutsyo: Kampeyini y’omwaka ogu ey’okweta abantu kwija aha Kiijutsyo neija kutandika aha Rwamukaaga, Maaci 7. Tebeekanisa hati kwija kwejumba omu kampeyini egi n’obweziriki. Ebibiina nibiija kuba biine okushemererwa kandi bateereho kuhika aha bantu baingi omu bicweka byabo by’okubuuriramu. Teeraho kweta abu orikwegyesa Baibuli, abanyabuzaare baawe, abarikwenda kumanya ebirikukiraho,orikubaha akapapura k’okubeeta nari orikukoresa jw.org.
3. Nitubaasa kwongyera tuta aha buheereza bwaitu omuri Maaci na Apuri?
3 Payoniya Omuhwezi: Obweziriki nibwija kutuhiga kwongyera aha buheereza bwaitu. Hatariho kubanganisa baingi nibaija kuba baapayoniya abahwezi omuri Maaci na Apuri, nk’oku twine omugisha gw’okucwamu kubuurira eshaaha 30. Omu kuramya kw’eka, nari omu kweshomesa kwawe, shaba kandi otebeekanise oku oraayongyere aha buheereza bwawe. (Enf. 15:22) Waagirira kampeyini egi omuhimbo nikibaasa kureetera abandi kugira obweziriki. Waakora empindahinduka kubaasa kwongyera aha buheereza bwawe, nooba nootooreza obweziriki nk’obu Yesu aine.—Mak. 6: 31-34.
4. Twatooreza obweziriki nk’obu Yehova na Yesu baine niharugamu birungi ki?
4 Okutooreza obweziriki nk’obu Yehova na Yesu baine omu bwire bw’Ekiijutsyo nikiija kurugamu emigisha mingi. Abantu baingi omu kicweka eki turikubuuriramu nibaija kumanya amakuru marungi. Nitwija kutunga okushemererwa n’okumarwa, ebirikuruga omu kuheereza Yehova n’okugabira abandi. (Byak. 20:35) Okukira munonga, nitwija kushemeza Yehova ori omweziriki hamwe n’omwana we.