Noobaasa Kuba Payoniya Omuhwezi?
1. Ahabw’enki obwire bw’Ekiijutsyo ni burungi bw’okwongyera aha buheereza bwaitu?
1 Obwire bw’Ekiijutsyo ni burungi bw’okwongyera aha buheereza bwaitu. Nibwo turikuteekateeka munonga ahari rukundo mpango ya Yehova eyamureeteire kuhayo Omwana we nk’ekitambo. (Yoh. 3:16) Nitusiima munonga eki Yehova yaatukoreire, kandi eki nikitureetera kugira ekihika ky’okugambira abandi ebirikumukwataho n’ebi ariyo naatutebeekanisiza. (Isa. 12:4, 5; Luk. 6:45) Kandi nibwo turikwejumba omu kampeyini y’omutaano ey’okweta abantu omu kicweka kyaitu na banywani baitu kwija kuba naitwe aha Kiijutsyo. Bwanyima, nituteeraho kwongyera kuhwera abo abarikuba baizire aha Kiijutsyo. Mbwenu shi noija kwongyera aha buheereza bwawe orikuba payoniya omuhwezi omuri Maaci, Apuri nari Mei?
2. Ahabw’enki Maaci n’okwezi kurungi kw’okuba payoniya omuhwezi?
2 Maaci Kutware nk’Okwezi kw’Omutaano: Maaci nikwija kuba okwezi kurungi kw’okuba payoniya omuhwezi. Ababuurizi abaraabe baapayoniya abahwezi omu kwezi okwo nibaija kucwamu kubuurira eshaaha 30 nari 50. Kandi omureeberezi orikutaayaayira ebibiina yaaba ataayaayiire ekibiina kyanyu omuri Maaci, baapayoniya abahwezi nibaija kuba omu ruteerane oru araagire na baapayoniya ab’obutwire barugumemu kuhitsya aha muheru gwarwo. Obwire obu tutwire nitumara omu kampeyini y’okweta abantu aha Kiijutsyo emyaka y’enyima hati bwongyeirweho, nituza kutandika Maaci 1 tuhitsye aha izooba ry’Ekiijutsyo Maaci, Orwakabiri 26, 2013. Kandi Maaci erimu wiikenda itaano. Noobaasa kutandika kuteekateeka aha ku oraayejumbe omu kubuurira omuri Maaci okakutwara nk’okwezi kw’omutaano omu mwaka.
3. Nitubaasa kukora ntebeekanisa ki kugira ngu twongyere aha buheereza bwaitu?
3 Kora Entebeekanisa Hati: Obu nibwo bwire bw’okwetebeekanisa kandi okareeba empindahinduka ezi oine kukora kubaasa kuba payoniya. Okukwatanisa nk’eka nikihwera, n’ahabw’ekyo omu Kuramya kw’Eka nimubaasa kukigaaniiraho kandi mukore entebeekanisa. (Enf. 15:22) Ku oraabe otarikubaasa kuba payoniya omuhwezi, otakaahwa amaani. Noobaasa kukora empindahinduka omu ntebeekanisa yaawe kugira ngu amazooba agu orikuza omu kubuurira oyongyere aha bwire obu orikumarayo? Noobaasa kwongyeraho eizooba rimwe aha mazooba agu orikuza omu kubuurira?
4. Ni birungi ki ebiraarugye omu kwongyera aha buheereza bwaitu omuri Maaci, Apuri na Mei?
4 Ku turaayongyere aha buheereza bwaitu omuri Maaci, Apuri na Mei, nitwija kwongyera kugira okushemererwa n’okumarwa ahabw’okuheereza Yehova n’okuhwera abandi. (Yoh. 4:34; Byak. 20:35) Kandi ekikuru munonga, okuteeraho kwaitu nikwija kushemeza Yehova.—Enf. 27:11.