Obwire bw’Ekiijutsyo n’Obwire Burungi bw’Okwongyera aha Kubuurira Kwaitu!
1. Ahabw’enki tushemereire kuteekateeka aha kwongyera aha kubuurira kwaitu omuri Maaci, Apuri na Mei?
1 Noobaasa kwongyera aha kubuurira kwawe omu bwire bw’Ekiijutsyo eky’omwaka ogu? Ababuurizi abamwe abarikukora nari abarikushoma nibaija kuba bari omu kihuumuro, ekiraababaasise kwejumba omu kubuurira. Kutandika na Apuri 2, nihaija kubaho kampeyini y’omutaano ey’okweta abantu kwija kuba naitwe aha Kiijutsyo ekiraabeho Apuri 17. Bwanyima, nitwija kuteeraho kuhwera abo abaizire aha Kiijutsyo kukunda amazima kandi tubeete kwija kuhurira orubazo rw’omutaano oruraaheebwe saabiiti erikutandika Apuri 25. Buzima, hariho enshonga nyingi ezishemereire kutureetera kwongyera aha kubuurira kwaitu omuri Maaci, Apuri na Mei.
2. Ni muringo ki gumwe omurungi ogurikubaasa kutuhwera kwongyera aha kubuurira kwaitu?
2 Okuheereza nka Payoniya Omuhwezi: Omuringo gumwe murungi gw’okwongyera aha kubuurira n’okuheereza nka payoniya omuhwezi. Obu twena twine bingi by’okukora, eki nikyetengyesa kutebeekanisa bukiri kare kandi tukakora empindahinduka omu ntebeekanisa zaitu. (Enf. 21:5) Obundi ebitari bikuru noobaasa kuba obirekire obanze okore ebirikukirayo obukuru. (Fil. 1:9-11) Noobaasa kugambira abandi omu kibiina ekyetengo kyawe ky’okuheereza nka payoniya nabo bareebe ku baraabe nibabaasa kukwegaitaho omu kuheereza nka payoniya omuhwezi.
3. Ab’omu maka nibabaasa kutebeekanisa bata kwongyera aha kubuurira kwabo?
3 Omu bwire bwanyu bw’Okuramya okw’Eka okuraakurateho, nikibaasa kuba kirungi kugaaniira aha bigyendererwa byanyu nk’eka. (Enf. 15:22) Mwakwatanisa nk’eka, obundi omwe nari bamwe aha b’omu ka yaanyu nibabaasa kuheereza nka baapayoniya abahwezi okwezi kumwe nari maingi. Kandi shi ekyo ku mwakushanga ngu tikirikubaasika? Obundi nk’eka nabwo nimubaasa kutebeekanisa kugira ngu mwongyere aha bwire obu murikumara omu kubuurira murikubuurira omu mwabazyo amazooba agamwe nari murikubuurira eizooba ryona omuri zaawiikenda.
4. Ni migisha ki erikwija kuruga omu kwongyera aha kubuurira kwaitu omu bwire bw’Ekiijutsyo eky’omwaka ogu?
4 Yehova naareeba byona ebi turikukora kumuheereza kandi naasiima okwefeerereza kwaitu. (Heb. 6:10) Okuha Yehova n’abandi nikurugamu okushemererwa. (1 Bus. 29:9; Byak. 20:35) Noobaasa kwongyera aha kubuurira kwawe omu bwire bw’Ekiijutsyo eky’omwaka ogu okongyera kutunga okushemererwa n’emigisha ebirikurugamu?