‘Buurira Amakuru Marungi’
1. Ni makuru ki amarungi agu tushemereire kubuurira?
1 Omu nsi egi etarikuhurirwamu ebirungi bingi, twine omugisha ‘gw’okubuurira amakuru marungi ag’embabazi za Ruhanga.’ (Byak. 20:24) Eki nikitwariramu okumanyisa abantu ngu ensi ya Yehova ensya ehikiriire eri haihi kuza omu mwanya ‘gw’ebiro by’emperu’ ei ‘ebintu ebya ira biriba bitari.’ (2 Tim. 3:1-5; Kush. 21:4) Omu bwire obwo tiharigaruka kubaho endwara. (Isa. 33:24) Abakundwa abaafiire abu Yehova arikwijuka baryaruga omu bituuro, bagarukye batuure n’ab’omu maka gaabo na banywani baabo. (Yoh. 5:28, 29) Ensi yoona eryahindurwa omwanya murungi munonga. (Isa. 65:21-23) Ebi ni bimwe ebiri omu makuru marungi agu tushemereire kubuurira!
2. Ahabw’enki obwire bw’Ekiijutsyo buri obwire burungi bw’okubuurira amakuru marungi?
2 Okwezi kwa Maaci, Apuri, na Mei nigaija kuba ameezi marungi g’okubuurira amakuru marungi nk’ago. Omu meezi aga, embeera y’obwire omu bicweka bingi omu nsi neebaasisa abantu kuheza obwire buraingwa omu kubuurira. Kandi Ekiijutsyo, omukoro ogurikukirayo obukuru omu mwaka, nigwija kubaho omu nsi yoona aha Rwamukaaga 22 Okwakashatu, eizooba ryaheza kurenga. Obu nibwo bwire bw’okutandika kwetebeekanisa kwongyera aha shaaha ezi turikumara omu kubuurira.
3. Niki ekiratuhwere kwongyera aha buheereza bwaitu nk’amaka?
3 Okukora nka Payoniya Omuhwezi: Noobaasa kutebeekanisa kukora nka payoniya omuhwezi okwezi kumwe, abiri nari goona ashatu? Nimubaasa kutunga obwire omu kushoma kwanyu kw’amaka okurakurateho mukagaaniira aha nshonga egi? Ab’omu ka emwe baatebeekanisa gye, omwe nari bamwe aha b’omuka egyo nibabaasa kukora nka baapayoniya abahwezi. (Enf. 15:22) Mushabe Yehova aha bikwatiraine n’enshonga egi, reeru mureebe oku araabahe emigisha. (Enf. 16:3) N’obu kyakuba kitabaasikire omuka yaanyu kubamu owaakora nka payoniya omuhwezi, nimubaasa kutaho ebigyendererwa by’okwongyera aha buheereza bwanyu murikubuurira n’abo abarikubaasa kukora nka baapayoniya abahwezi.
4. Nitubaasa kwetebeekanisa tuta kukora nka baapayoniya abahwezi twaba nitukora obwire bwona?
4 N’obu waakuba nookora obwire bwona, entebeekanisa nungi neebaasa kukuhwera kukora nka payoniya omuhwezi. Noobaasa kubuurira omu shaaha zaawe eza kyamushana. Nari noobaasa kushaba ekicweka ekyawe eky’okubuuriramu ekiri haihi n’ahu orikuraara nari ahu orikukorera kubaasa kwejumba omu kubuurira eshaaha emwe nari n’okukiraho otakagiire aha murimo nari waarugayo. Noobaasa kwongyera aha bwire obu orikubuurira waacwamu kukora ebintu ebitari bikuru munonga omu kwezi okundi kandi n’omu wiikenda okakora eizooba ryona. Abamwe babaasize kukoresa kimwe nari bibiri aha biro byabo eby’okuhuumura kubaasa kubuurira.
5. Noobaasa kuhwera ota okaikwire nari oine amaani makye kukora nka payoniya omuhwezi?
5 Ku oraabe okaikwire nari oine amaani makye, noobaasa kukora nka payoniya omuhwezi orikumara obwire bukye omu kubuurira buri izooba. Shaba Yehova akuhe ‘amaani agarikukira aga butoosha.’ (2 Kor. 4:7) Munyaanyaitwe omwe akabaasa kukora nka payoniya omuhwezi aine emyaka 106! Arikuhwerwa abanyabuzaare be abakristaayo, akaba abuurira enju aha nju, agarukayo aha bu yaabuurireho, ayegyesa abeegi be ba Baibuli, kandi ayejumba omu mirimo y’obuheereza endiijo. Akahwera abantu ikumi kutandika kwega Baibuli. Naagira ati; “Ku ndikuteekateeka aha mugisha ogu naatungire kuheereza nka payoniya omuhwezi, omutima gwangye gwijura rukundo n’okusiima Yehova, Omwana we, hamwe n’entebeekanisa Ye eya rukundo. Buzima ‘ninkwebaze Yehova!’”
6. Eminyeeto ababatiziibwe kandi abakirikushoma nibabaasa bata kukora nka baapayoniya abahwezi?
6 Ku oraabe ori omunyeeto obatiziibwe kandi orikushoma, naiwe noobaasa kukora nka payoniya omuhwezi. Nk’abo abarikukora obwire bwona, naiwe noobaasa kukoresa gye zaawiikenda kubuurira. Amazooba agamwe, noobaasa kubuurira eshaaha emwe nari n’okukiraho waaruga ah’ishomero. Hariho ekihuumuro eki orikubaasa kukoresa kubuurira? Ku oraabe nooyenda kukora nka payoniya omuhwezi, kigaaniireho n’abazaire baawe.
7. Abareeberezi nibabaasa kukora ki kuhwera ababuurizi kugira omujinya gw’okubuurira omu bwire bw’Ekiijutsyo?
7 Mubahigye Kugira Omujinya: Abareeberezi nibabaasa kukora kihango kuhwera ab’omu kibiina kugira omujinya barikubateeraho eky’okureeberaho. (1 Pet. 5:2, 3) Nibabaasa kucwamu kukora entebeekanisa kwongyera aha nteerane z’okuza kubuurira ahabw’abo abarikwenda kubuurira bukiri kare omu kasheeshe, nari bwanyima y’okuruga ah’ishomero, nari aha murimo. Omureeberezi orikukora aha by’obuheereza ashemereire kureeba ngu ababuurizi abahikire nibo baayebembera enteerane z’okuza kubuurira kandi ngu n’ekicweka ky’okubuuriramu kiriho, n’okureeba ngu na zaamagaziini hamwe n’ebitabo eby’okukoresa omu meezi aga ag’omutaano biriho.
8. Nitwega ki kuruga aha ky’okureeberaho ky’ekibiina kimwe?
8 Omu kibiina kimwe, abareeberezi bakatandika kuhiga ababuurizi kukora nka baapayoniya abahwezi hakirikuburayo ameezi maingi. Bakaguma nibamanyisa ekibiina buri saabiiti omubaro gw’abaikiriziibwe kukora nka baapayoniya abahwezi. Eki kikaha amaani abo abaabaire nibenda kwongyera aha buheereza bwabo ahabw’okumanya ngu baine baingi ab’okukora nabo. Abareeberezi bakataho ezindi nteerane z’okuza kubuurira omukasheeshe kare munonga n’omu mwabazyo. Ekyarugiremu, ababuurizi 53, haihi kimwe kya kabiri ky’ekibiina bakakora nka baapayoniya abahwezi omuri Apuri!
9. Ahabw’enki obwire bw’Ekiijutsyo ni burungi ahari abo abahikire kutandika kubuurira amakuru marungi?
9 Hwera Abandi Kubuurira: Abasya hamwe n’eminyeeto ku baraabe bahikire kutandika kubuurira, nibabaasa kushabwa kubuurira n’abo ababuuriire omwanya muraingwa. Omugisha nk’ogwo nibabaasa kugutunga omu bwire bw’Ekiijutsyo obu baingi omu kibiina baraije kuba nibongyera aha shaaha ezi barikumara omu kubuurira. Oine omwegi wa Baibuli owaahikaniise amagara gye n’emisingye ya Yehova? Oine abaana abaine emicwe mirungi kandi abarikukora gye omu by’omwoyo kwonka abatakahindukire babuurizi? Abantu nk’abo ku baraabe baayorekire ngu nibenda kuba ababuurizi abatakabatiziibwe kandi orikureeba ngu bahikire kubuurira, manyisa omwe aha bareeberezi. Orikwebembera akakiiko k’abareeberezi naija kutebeekanisa kugira ngu abareeberezi babiri bagaaniireho naiwe ori n’omwegi nari omwana waawe aha nshonga egi.
10. Abareeberezi nibabaasa kukora ki kuhwera abo abagarukire enyima omu by’omwoyo?
10 Ameezi agarikwija kandi nigaija kuba marungi ahari abo abagarukire enyima omu by’omwoyo kugaruka kubuurira n’ekibiina. Abarikwebembera Okushoma Ekitabo okw’Ekibiina nari abandi bareeberezi bashemereire kuteeraho kutaayaayira abantu nk’abo, bakabashaba kubuurira nabo. Ku baraabe baherize obwire buraingwa batarikubuurira, abareeberezi babiri bashemereire kugaaniiraho nabo kureeba yaaba bahikire kubuurira.—km 11/00 rup. 3.
11. Niki ekirikukirayo kworeka ‘embabazi za Ruhanga?’
11 Yetebeekanisize Ekiijutsyo: Ekitambo nikyo kirikukirayo kworeka “embabazi za Ruhanga.” (Byak. 20:24) Omu nsi yoona, obukaikuru bw’abantu abarikusiima nibaija kuteeranira hamwe kwijuka okufa kwa Kristo aha Rwamukaaga Maaci 22, bwanyima y’eizooba kurenga. Nitwenda kweta kandi tuhwere boona ab’emitima mirungi kwija aha mukoro ogu omukuru munonga ogurikuha obujurizi aha mbabazi za Yehova ahabw’abantu.
12. Tushemereire kweta baahi aha Kiijutsyo?
12 Handiika abo abu orikwenda kweta. Hatariho kubanganisa omu bu oraayete nihaija kuba harimu abanyabuzaare baawe, abataahi, abu orikukora nabo nari abu orikushoma nabo, abu orikwegyesa Baibuli hati n’abu waayegyeiseho ira, n’abo abu orikukira kutaayaayira. Abu oraayete ku baraabe baine ebibuuzo ebirikukwata aha mukoro gw’Ekiijutsyo, nikibaasa kukuhwera waakoresa ebiri omu katabo Niki Eki Baibuli Buzima Erikwegyesa aha rupapura 206-8 ebirikukwata aha Kiihuro kya Mukama Waitu. Eki nikibaasa n’okukuhwera kutandika kwegyesa omuntu Baibuli, ahabw’okugira ngu nikiija kukuha omugisha kwanjura akatabo aku turikukoresa kwegyesa abantu Baibuli.
13. Yehova akaha ata ababuurizi babiri omugisha abaacwiremu kweta abantu aha Kiijutsyo?
13 Munyaanyaitwe omwe akahandiika abantu b’omu maka 48 abu yaabaire nayenda kweta. Ou yaabaire ayeta, akaba ata akamanyiso ah’iziina rye kandi ahandiikaho n’ebiro ebi yaamweteraho. Ka yaashemereirwe munonga kureeba ngu abantu 26 aha bu yaayetsire bakaija aha Kiijutsyo! Ow’eishe-emwe omwe omushuubuzi akeeta omukozi we owaabaire ari omwebembezi w’ediini enyimaho. Omukozi we ogwo akaija, kandi bwanyima akagira ati: “Nyegire bingi omuri Baibuli omu shaaha emwe kukira ebi naayegire omu myaka 30 ndi Omukatoriki.” Bwanyima y’Ekiijutsyo, akaikiriza kwega akatabo Eki Baibuli Erikwegyesa.
14. Ni kampeyini ki eraatandike Maaci 1 omu nsi yoona?
14 Kampeyini: Okutandika n’Orwamukaaga Maaci 1, kuhitsya Maaci 22, nihaija kubaho kampeyini y’omutaano omu nsi yoona ey’okweta abantu kwija aha Kiijutsyo. Ababuurizi boona nibaija kwenda kwejumbira kimwe omuri kampeyini egi. Ni kirungi okwekwatsiza omuntu ou waashanga omu ka akapapura akarikumweta aha Kiijutsyo okukira okukareka aha rwigi. Kwonka, ekicweka eki murikubuuriramu kyaba kiri kihango, abareeberezi nibabaasa kucwamu ngu mutsige akapapura ako omu maka agu mutaashanga bantu. Kandi aha wiikenda nitwija kuba nitugaba na zaamagaziini ensya.
15. Nitubaasa kugamba ki twaba nitweta abantu kwija aha Kiijutsyo?
15 Ahabw’okugira ngu twine obwire bukye obw’okugaba akapapura aka akarikweta abantu, ni kirungi kukoresa enyanjura ngufu. Gira omuhimbo kandi yoreka rukundo. Noobaasa kugira oti: “Nitukweta, iwe n’ab’omu ka yaanyu hamwe n’abanywani baawe aha mukoro mukuru munonga oguraabeho Maaci 22. Akapapura aka n’akaawe. Ebirikukiraho biri aha kapapura aka.” Ou waashanga omu ka naabaasa kuba aine ebibuuzo. Nari naabaasa kwakiira akapapura ako kandi ahamye ngu naija kwija. Guma nomwijuka, kandi tebeekanise kugarukayo.
16. Ni ky’okureeberaho ki ekirikworeka obukuru bwa kampeyini y’okweta abantu b’omu kicweka eki turikubuuriramu kwija aha Kiijutsyo?
16 Omwaka oguhweire omuserikare akashanga akapapura ak’okweta abantu aha Kiijutsyo aha rwigi rwe. Akacwamu kwija kwonka akaba aine kushaba orikumukurira orusa. Ku yayorekire orikumukurira akapapura ako, orikumukurira akamugira ngu abazaire be n’Abajurizi ba Yehova kandi ngu akaba akira kugyenda nabo omu nteerane. Taramuhaire rusa kwonka, baitu akagyenda nawe aha Kiijutsyo!
17. Nitworeka tuta ngu titurikufeerwa kigyendererwa ky’embabazi za Ruhanga?
17 Yoreka Okusiima: Obwire bw’Ekiijutsyo ky’omwaka 2008 ku buraahikye, buri omwe ahariitwe ashemereire kuteekateeka aha mbabazi za Yehova ezi arikutugirira. Entumwa Paulo akahandika ati: “Nitubeeshengyereza, murekye kufiisa busha embabazi za Ruhanga.” (2 Kor. 6:1) Nitworeka tuta ngu titurikufeerwa ekigyendererwa ky’embabazi za Ruhanga? Paulo akahandika ati: “Kureka omuri byona nitweyoreka nk’abashemereire kuba abaheereza ba Ruhanga.” (2 Kor. 6:4) N’ahabw’ekyo, nitworeka okusiima kwaitu ahabw’ekiconco kya Yehova turikugira emicwe mirungi kandi tukabuurira amakuru marungi n’omujinya. Omu bwire bw’Ekiijutsyo eky’omwaka ogu, nitwija kugira omugisha gw’okwongyera aha buheereza bwaitu turikuha obujurizi amakuru marungi.
[Akabokisi aha rupapura 3]
Ni Baahi Abarikubaasa Kukora Nka Payoniya Omuhwezi?
◼ Amaka
◼ Abo abarikukora obwire bwona
◼ Abakaikwire n’abaine amaani makye
◼ Abarikushoma
[Akabokisi aha rupapura 4]
Waaba Nooyeta Abantu Kwija aha Kiijutsyo:
◼ Gamba omu bigufu kandi n’omuhimbo
◼ Guma noijuka aboorekire okusiima kandi tebeekanisa kugarukayo
◼ Gaba na zaamagaziini omu wiikenda