Ekigyendererwa Kirungi eky’Omwaka gw’Obuheereza Omusya

1. Ni kigyendererwa ki eki turikubaasa kuteekateeka kweteeraho omu mwaka gw’obuheereza omusya?

¹ Twine kutaho ebigyendererwa twaba turi ab’okukura omu by’omwoyo. Iwe, otaireho bigyendererwa ki eby’omwaka gw’obuheereza omusya? Ekigyendererwa kirungi munonga n’okuheereza nka payoniya omuhwezi okwezi kumwe nari okurengamu. Obu obuheereza obu oburungi burikwetenga okwetebeekanisa bukiri kare, hati nibwo bwire burungi kutandika kubwetebeekanisiza. Ahabw’enki nituteekateeka aha kuheereza nka payoniya omuhwezi nk’ekigyendererwa?

2. Ahabw’enki tushemereire kuteekateeka aha kuheereza nka payoniya omuhwezi nk’ekigyendererwa?

² Enshonga Ahabw’enki Tushemereire Kuheereza nka Payoniya Omuhwezi: Okuheereza nka payoniya omuhwezi nikutubaasisa kushemeza ‘munonga’ Tataitwe ow’omu iguru ahabw’okugira ngu nitwongyera aha bwire obu turikumara omu kubuurira. (1 Tes. 4:1) Ku turikuteekateeka ahari byona ebi Yehova atukoreire, emitima yaitu neetuhiga okugambira abandi ebirikumukwataho. (Zab. 34:1, 2) Yehova naareeba kandi asiima ebi turikwefiisiriza ahabw’okwenda kwongyera aha buheereza bwaitu. (Heb. 6:10) Okumanya ngu okukora n’amaani kwaitu nikushemeza Yehova, nikitureetera okushemererwa kwingi.​—1 Bus. 29:9.

3, 4. Okuheereza nka payoniya omuhwezi nikutugasira kuta?

³ Butoosha ku orikweyongyera kukora ekintu, kyongyera kukworobera n’okukushemeza. Okwongyera aha bwire obu orikumara omu kubuurira nikwija kukuhwera kworoberwa okubuurira enju aha ndiijo. Noija kweyongyera kukora gye omu kugaaniira n’abantu n’omu kukoresa gye Baibuli. Ku orikwongyera kugamba aha kwikiriza kwawe, nakwo ni kweyongyera kuhama. Baingi abaabaire bataine ou barikwegyesa Baibuli babaasize kumutunga barikuheereza nka baapayoniya abahwezi.

⁴ Okuheereza nka payoniya omuhwezi nikubaasa kuhwera omuntu kuruga omu bweremwa omu by’omwoyo. Ow’eishe-emwe owaabaireho payoniya ow’obutwire, ku yaakireebire ngu obwire bwe obwingi naabumarira aha murimo, akacwamu kuheereza nka payoniya omuhwezi okwezi kumwe. Akagira ati: “Tindikubaasa kukiikiriza oku okwezi okwo kwangarwiremu amaani omu by’omwoyo! Nkakora entebeekanisa kugumizamu nimpereza nka payoniya omuhwezi, bwanyima kyampwera kugaruka kuba payoniya ow’obutwire.”

5. Twaba nituhurira nitwetiina, nitubaasa kukora ki?

⁵ Otaikiriza Ekintu Kyona Kukuremesa: Abamwe nibabaasa kutiina kushaba kukora nka payoniya omuhwezi ahabw’okwetiina ngu ti bashomesa barungi. Eki kyaba nikikureetera kuteekateeka ngu toraabaase, Yehova naabaasa kukuhwera nk’oku yaahwereire Yeremia. (Yer. 1:6-10) N’obu Musa araabe yaabaire ‘naayetwara omu kugamba n’orurimi rwe rurikunaamuuka,’ Yehova akamukoresa kuhikiiriza ebi Akunda. (Kur. 4:10-12) Ku oraabe noohurira nooyetiina, shaba Yehova akuhe obumanzi.

6. Nikibaasika kita okuheereza nka payoniya omuhwezi n’obu waakuba oine amagara mabi nari oine bingi eby’okukora?

⁶ Nootiina kushaba kukora nka payoniya omuhwezi ahabw’okugira amagara mabi nari ahabw’okugira bingi eby’okukora? Ku oraabe otaine maani, okubuurira omu bwire obu orikubaasa nikubaasa kukuhwera kuheereza nka payoniya omuhwezi. Ku oraabe oine bingi eby’okukora, ebimwe aha bitari bikuru noobaasa kubyongyerayo omu kwezi okundi. Abamwe abarikukora obwire bwona babaasize kuheereza nka baapayoniya abahwezi barikukoresa ekiro kimwe nari bibiri ebi bashabire kuhuumuraho aha murimo.​—Kol. 4:5.

7. Ahabw’enki ni kikuru okushaba Yehova kukuhwera kubaasa kuheereza nka payoniya omuhwezi?

⁷ Oku Orikubaasa Kukikora: Manyisa Yehova ekyetengo kyawe. Shaba Yehova akuhe omugisha omu kuteeraho kwawe kwongyera aha buheereza bwawe. (Rom. 12:11, 12) Naabaasa kukuhwera kucwamu omu muringo gw’obwengye aha ku waakukora empindahinduka omu bi orikukora. (Yak. 1:5) Ku oraabe otaine kyetengo ekyo, shaba Yehova akuhwere otunge okushemererwa omu murimo gw’okubuurira.​—Luka 10:1, 17.

8. Okugyendera aha buhabuzi oburi omu Enfumu 15:22 nikubaasa kukuhwera kuta kuheereza nka payoniya omuhwezi?

⁸ Nk’eka, mugaaniire aha kigyendererwa ky’okuheereza nka payoniya omuhwezi. (Enf. 15:22) Obundi, omuntu omwe omu ka naabaasa kuheereza nka payoniya omuhwezi ahabw’okuhwerwa abandi abagirimu. Gambaho n’abandi omu kibiina aha kyetengo kyawe eky’okuheereza nka payoniya omuhwezi, okukira munonga abo abu murikushushanisa embeera. Eki nikibaasa kukwongyera omuhimbo kuheereza nka payoniya omuhwezi.

9. Ni myezi ki ei orikubaasa kuheererezamu nka payoniya omuhwezi?

⁹ Ku orikurabya amaisho omu ntebeekanisa yaawe y’okubuurira ey’omwaka gw’obuheereza omusya, ni ryari obu orikwija kubaasa kuheereza nka payoniya omuhwezi? Ku oraabe nookora obwire bwona nari nooshoma, noobaasa kuteekateeka aha myezi erimu ekiro kikuru nari erimu ebiro by’Orwamukaaga bitaano nari Sande itaano. Nk’eky’okureeberaho, Okwamwenda, Okwa ikumi n’ebiri, Okwakashatu, n’Okwamunaana goona garimu wiikenda itaano eziijwire. Okwakataano kurimu ebiro by’Orwamukaaga bitaano, kandi Okwamukaaga kurimu Sande itaano. Waaba otaine magara marungi, teekateeka aha meezi againe obwire burungi. Noobaasa n’okuteekateeka aha kuheereza nka payoniya omuhwezi omu kwezi oku omureeberezi orikutaayaayira ebibiina araataayaayiremu ekibiina kyanyu. Obu araabe ari omu kibiina kyanyu, noija kugira omugisha gw’okuza omu kicweka ky’okubanza eky’oruteerane oru araagire na baapayoniya ab’obutwire. Obu Ekiijutsyo kiribaho Okwakashatu 22 omwaka ogurikwija, Okwakashatu, Okwakana, n’Okwakataano n’ameezi marungi g’okuheereza nka payoniya omuhwezi. Ku oraaheze kucwamu okwezi nari ameezi agu orikwenda kuheererezamu nka payoniya omuhwezi, tandika kukora entebeekanisa eraakubaasise kuhitsya eshaaha ezirikwetengwa.

10. Nitubaasa kukora ki twaba tutarikubaasa kuheereza nka payoniya omuhwezi?

¹⁰ N’obu waakureeba ngu torikubaasa kuheereza nka payoniya omuhwezi omu mwaka gw’obuheereza ogurikwija, hoona nabwe noobaasa kuguma oine omutima gw’obwapayoniya. Gumizamu noobuurira n’agaawe goona, oine obwesigye ngu Yehova naasiima ku orikukora kyona eki orikubaasa okumuheereza. (Gal. 6:4) Hwera kandi hangaana abarikubaasa kuheereza nka baapayoniya abahwezi. Obundi noobaasa kwetebeekanisa kugira ngu ogire eizooba eri orikubaasa kubuurira n’abarikuheereza nka baapayoniya.

11. Ahabw’enki tushemereire kumanya obukuru bw’obwire obu turimu?

¹¹ Abantu ba Yehova nibamanya obukuru bw’obwire obu barimu. Hariho omurimo ogwine kukorwa​—okubuurira amakuru marungi. Amagara g’abantu baingi gari omu kabi kandi obwire obusigaireyo ni bukye. (1 Kor. 7:29-31) Rukundo ei twiniire Yehova n’abataahi baitu neija kutuhiga kukora kyona eki turikubaasa omu kubuurira. Ku turaatemu amaani kandi tukeetebeekanisa gye, nitwija kubaasa kuheereza nka payoniya omuhwezi haakiri okwezi kumwe omu mwaka gw’obuheereza ogurikwija​—ekigyendererwa kirungi buzima!