Buurira Hoona Oburungi bwa Yehova
1. N’enki ekirikutuma twabuurira aha burungi bwa Yehova?
1 “Ai MUKAMA, obukuru, obushoboorozi, ekitiinisa, obusinguzi n’okutiinwa n’ebyawe; ahakuba ebiri omu iguru n’eby’omu nsi byona n’ebyawe.” (1 Bus. 29:11) Rukundo n’okusiima ebi twiniire Yehova nibituma twakora ki? Nibituma ‘twabuurira aha burungi bw’orikweta abantu okuruga omu mwirima, okutaaha omu mushana gwe ogurikutangaaza.’ (1 Pet. 2:9) Titurikubaasa kurekyera aho kugambira abandi aha bikwatiraine na Ruhanga waitu ow’amaani! Nituza kugira omugisha gw’omutaano ogw’okugamba aha burungi bwa Yehova omu Maaci, omu Apuri n’omu Mei.
2. Ni kampeyini ki ey’omutaano etebeekanisiibwe ahabw’Ekiijutsyo, kandi ni baahi abarikubaasa kugyejumbamu?
2 Kampeyini y’Ekiijutsyo ey’Omutaano: Aha rw’Okubanza, Apuri ebiro 2, nitwija kworeka oburungi bwa Yehova turikwijuka Kyakiro ya Mukama Waitu. Akapapura k’okukoresa kweta abantu aha mukoro ogu omukuru nikiija kugabwa omu nsi yoona kuruga Maaci ebiro 17 okuhitsya Apuri ebiro 2. Twena nituhigwa kwejumba omuri kampeyini egi. Obu nibwo bwakubaire buri obwire burungi bw’abasya kutandika kubuurira amakuru marungi baaba nibaikirizibwa. Ku oraabe oine abu orikushomesa Baibuli nari abaana abarikubaasa kwikirizibwa kutandika kubuurira, gamba n’abareeberezi.
3. Nitubaasa kugamba ki twaba nitweta abantu aha Kiijutsyo?
3 Kampeyini egi neija kushushanaho nk’eyakozirwe aha bikwatiraine n’Oruteerane Oruhango “Okucungurwa Kuri Haihi!” Ebibiina nibiija kuheebwa obupapura oburikumara kugira ngu buri mubuurizi aheebwe obupapura 50 kandi buri payoniya naabaasa kutunga obupapura 150. Orikukanjura omu bigufu, noobaasa kugira oti: “Akapapura aka n’ak’okukweta aha mukoro mukuru ogurikubaho buri mwaka. Nitwija kushemererwa munonga okukureeba. Ebirikukiraho biri aha kapapura aka.” Kwonka, omuntu yaaba aine ebibuuzo, twara obwire obigarukemu. Omu kumushoboororera, nitubaasa kukoresa ebiri omu katabo Eki Baibuli Erikwegyesa ebirikutandikira aha rupapura orwa 206. Orwamukaaga na Sande, nitwija kuba nitugaba zaamagaziini ensya hamwe n’akapapura aka. Guma noijuka abaakunzire obutumwa, kandi tebeekanisa kugarukayo.
4. Obupapura obw’okweta abantu aha Kiijutsyo nibwija kugabwa buta?
4 Kyaba nikibaasika, noobaasa kukekwatsiza omuntu ou orikweta. N’ahabw’ekyo, yetegyereze amaju agu otashangamu bantu kandi teeraho kugarukayo bwanyima. Ebibiina ebiraabe bikitsigaize obupapura bwingi nibibaasa kutsiga akapapura ahari buri nju ei batarashangemu omuntu harikuburayo esaabiiti emwe Ekiijutsyo kikahika. Hamya ngu abu orikushomesa Baibuli, abanyabuzaare, abu orikukora nabo, bataahi baawe n’emikago baatunga akapapura aka.
5. Ahabw’enki tushemereire kutandika kukora entebeekanisa z’okuheereza nka baapayoniya abahwezi?
5 Okukora nka Payoniya Omuhwezi: Noobaasa kubuurira aha oburungi bwa Yehova omu bwijwire orikukora nka payoniya omuhwezi omu Maaci, omu Apuri n’omu Mei? Okubaasa kukora ekyo, nikibaasa kukwetengyesa empindahinduka omu bi orikukora buri izooba. (Efe. 5:15-17) Noobaasa kugira obwesigye ngu okuteeraho n’agaawe kwongyera aha bi orikukora omu buheereza bwa Yehova nikiija kukureetera okushemererwa n’emigisha ye. (Enf. 10:22) Obu Ekiijutsyo kiri haihi, hati nibwo bwire kutandika kukora entebeekanisa.—Enf. 21:5.
6. Nitubaasa kwega ki ahari munyaanyaziitwe omwe ow’emyaka 90 owaaheereize nka payoniya omuhwezi omwaka oguhweire?
6 Munyaanyaziitwe omwe ow’emyaka 90 akaheereza nka payoniya omuhwezi omwaka oguhweire. Akagira ati: “N’obu ndaabe ninkunda okuhinga omu musiri kandi naabaire niinyenda kutandika kubyara, nketegyereza ngu nkaba ninyetenga kwebembeza ebintu ebikuru. Nyine ekyetengo ky’okwebembeza Obukama, nkacwamu kuheereza nka payoniya omuhwezi omu Maaci.” Hariho ebirungi ebi yaatungire ahabw’okukora eki? Naagira ati: “Nimpurira mpamire omu kibiina, kandi eki kiinyiriize haihi na Yehova.” Ahabw’enki naitwe tutarikweshwijuma tukareeba ebi turikwebembeza, haza tukakora empindahinduka nk’ezo ezirikwetengyesa?
7. Kigumire okuheereza nka payoniya omuhwezi?
7 Okuhitsya eshaaha 50 eza baapayoniya abahwezi, nikubaasa kuba kutagumire nk’oku orikuteekateeka. Shaba Ruhanga kukuhwera kushwijuma emirimo yaawe eya butoosha, kora entebeekanisa, haza n’eki kyongyere aha bi orikukora ebikwatiraine n’Obukama. Noomanya gye embeera zaawe kukira omuntu ondiijo weena. Ku oraabe otaine magara marungi kandi otarikubaasa kumara obwire buraingwa omu kubuurira, noobaasa kubuurirayo eshaaha nkye buri izooba. Omurimo ku guraabe gutarikukuha bwire burikumara nari ku oraabe okyashoma, noobaasa kuheereza nka payoniya omuhwezi orikwejunisa obwire bw’omwabazyo, nari Orwamukaaga na Sande.
8. N’enki ekyahwereire omushaija omwe n’omukazi we kuheereza nka baapayoniya abahwezi?
8 Baingi babaasize kuheereza nka baapayoniya abahwezi boona hamwe nk’eka. Omu myaka ey’enyima, omushaija omwe n’omukazi we bakaba batiinire kushaba kukora nka baapayoniya abahwezi barikuteekateeka ngu embeera zaabo tiziraabaikirize. Ekyo bakakikorera ki? “Tukashaba Yehova kutuhwera kukora eki twabaire kumara obwire buraingwa tutuura nitwenda kukora hamwe.” Ahabw’okutebeekanisa gye bakabaasa kuhikiiriza ekigyendererwa kyabo. Bakongyeraho bati: “Kikaba kiri kurungi munonga. Twembi tukatunga emigisha mingi. Nitubahabura ngu, naimwe muteereho. Ku turaabe twabaasize, naimwe nimubaasa kushanga mwabaasa.”
9. Nimubaasa kukora ki okwetebeekanisiza ameezi ag’obuheereza obw’omutaano agarikwija, obu muraabe nimushoma Baibuli nk’eka omurundi oguraakurateho?
9 Omu kushoma Baibuli kwanyu nk’eka okuraakurateho, nimubaasa kugira akiire muhanuure aha ku mwena mwakubaasa kwongyera aha buheereza bwanyu omu meezi agarikwija. N’obu mwena hamwe nk’eka mwakuba mutabaasize, obundi nimubaasa kuhwera omuntu omwe omuriimwe kuheereza nka payoniya omuhwezi. Ekyo kyaba kitarikubaasika, nimubaasa kutaho ekigyendererwa nk’eka eky’okwongyera aha shaaha ezi murikumara omu kubuurira omu meezi aga ag’omutaano omu buheereza.
10. Ahabw’enki tushemereire kugambira abandi ekyetengo kyaitu eky’okuba payoniya omuhwezi omu bwire bw’Ekiijutsyo?
10 Muhwerahwerane: Omuntu yaaba aine omujinya naareetera n’abandi kuba nkawe. Gamba aha kyetengo kyawe eky’okuba payoniya omuhwezi. Eki nikibaasa kuhiga n’abandi kuba baapayoniya abahwezi. N’ekindi, abo abaarabaireho baapayoniya abahwezi, nibabaasa kukuha obuhabuzi oburaakuhwere kwetebeekanisa gye kugira ngu ohikiirize ekigyendererwa kyawe. (Enf. 15:22) Ku oraabe noobaasa kuheereza nka payoniya omuhwezi, ahabw’enki otarikweta ow’eishe-emwe ondiijo ou embeera ze ziri nk’ezaawe kukwegaitaho omu murimo ogu omurungi?
11. Abareeberezi nibabaasa kuhwera bata abandi kugira omujinya gw’okuheereza nka baapayoniya abahwezi omu meezi agarikwija?
11 Abareeberezi baingi nibakora entebeekanisa kubaasa kwejumba omu buheereza obu obw’omutaano. (Heb. 13:7) Buzima eki nikigaruramu abari omu kibiina amaani! Abareeberezi nibahwera abandi kugira omujinya ku barikuba nibaganiira nabo. Ebigambo bikye birikugaruramu amaani nari okworeka omuntu ebyakubaasa kumuhwera nibibaasa kuba nibyo byonka ebirikwetengyesa kumuhiga kuheereza nka payoniya omuhwezi. Omureeberezi w’obuheereza, naija kwongyera aha nteerane ez’okwetebeekanisa kuza kubuurira n’ezimwe zibeho bwanyima y’eshaaha z’okukora n’ez’eishomero, kugira ngu boona babaase kubuurira nk’ekibiina. Enteerane ezi zishemereire kurangwa butoosha. Naija kuteeraho kureeba ngu boona baatunga ebitabo hamwe n’emyanya y’okubuuriramu ebirikumara.
12. Nitubaasa kukora ki twaba tutabaasize okuheereza nka baapayoniya abahwezi?
12 N’obu waakuba otabaasize kuheereza nka payoniya omuhwezi, abo ababaasize noobaasa kubongyeramu omuhimbo, kandi noobaasa n’okubashabira. (Enf. 25:11; Kol. 4:12) Kyabaasika, noobaasa kukora entebeekanisa y’okubuurira nabo aha izooba eritari ry’ekibiina kubuurira, nari oyongyere aha bwire obu orikukira kumara omu kubuurira.
13. Uganda etaireirweho kigyendererwa ki, kandi ekibiina kyanyu nikibaasa kuhwera kita omu kuhikiiriza ekigyendererwa ekyo?
13 Ekigyendererwa ky’Okuhitsya Baapayoniya Abahwezi 6,400 omu Apuri: Omubaro gwa baapayoniya abahwezi ogurikukirayo kuba ogwa ahaiguru ogwa Burundi ni 792, ogwa Kenya ni 2,601, ogwa Tanzania ni 1,297 kandi ogwa Uganda ni 455. N’ahabw’ekyo, ekigyendererwa kyaitu ekya Apuri egi n’okuhitsya baapayoniya abahwezi 1,000 omuri Burundi, 3,300 omuri Kenya, 1,400 omuri Tanzania na 700 omuri Uganda. Nitubaasa kubahitsya, kuri 1 ahari buri babuurizi 6 omuri buri kibiina naaheereza nka payoniya omuhwezi. Buzima ebibiina ebimwe birimu ababuurizi baingi abarikubaasa kuheereza nka baapayoniya abahwezi. Ebibiina bingi nibibaasa kuhikiiriza ekigyendererwa ekyo. Teekateeka aha kushemererwa oku eki kiraije kureetaho omu kibiina kyanyu n’oku eki kiraayongyere amaani omu murimo gw’okubuurira omu kicweka kyanyu!
14. Ahabw’enki Apuri guri omwezi murungi gw’okuheererezamu nka payoniya omuhwezi?
14 Ahabw’enki Apuri guri omwezi murungi gw’okuba payoniya omuhwezi? Ekiijutsyo nikiija kubaho aha kutandika kw’okwezi okwo, ekirituha obwire kutaayaayira abariija aha Kiijutsyo eki. Nitwija kuba nitugaba zaamagaziini n’ekigyendererwa ky’okuha abu turigarukayo kutaayaayira akatabo Eki Baibuli Erikwegyesa ngu tutandikye kushoma nabo Baibuli. N’ahabw’ekyo, okuheereza nka payoniya omuhwezi omu Apuri, nikiija kutuha omugisha kutandika okushomesa abantu baingi Baibuli. Ekindi, Apuri gurimu Sande itaano otaireho n’ekiro kikuru ky’ab’ensi, ekiribaasisa abarikukora n’abarikushoma kuheereza nka baapayoniya abahwezi.
15. Ahabw’enki tushemereire kukora n’amaani kureeba ngu twayetebeekanisiza obunaku bw’Ekiijutsyo oburiyo nibwirira haihi?
15 Buri Kiijutsyo ekirikuhinguraho, nihatuubaho omwaka gumwe aha bwire obusigaire emperu y’obusingye obu ekahika. Obwire obu tusigaize okugambira abandi ahari Ruhanga waitu ow’amaani ni bukye. (1 Kor. 7:29) Obwire obu obw’Ekiijutsyo ku buraahingureho, omugisha ogu buraabe butuhaire kuhimbisa Tataitwe ow’omu iguru tigurigaruka kubaho ebiro byona. Ka tukore kyona eki turikubaasa kureeba ngu twabuurira aha burungi bwa Yehova omu Maaci, omu Apuri n’omu Mei!
[Akabokisi aha rupapura 4]
◼ Yeshwijume oreebe ebi orikwebembeza
◼ Muhanuure aha bigyendererwa byanyu nk’eka
◼ Gambira abandi ebi orikwenda kukora