Tooreza Omwegyesa Omukuru Waaba Nookoresa Akatabo Eki Baibuli Erikwegyesa
1. Yesu akaba ayegyesa ata?
1 Yesu, Omwegyesa Omukuru, butoosha akaba ashoboorora ebintu omu muringo ogworobi kwetegyereza. Okubaasa kuhwera abaabaire baba bamuhurikiize kuteekateeka, obumwe akaba abanza yaababuuza bo eki barikuteekateeka. (Mat. 17:24-27) Akaba akoresa Ekigambo kya Ruhanga. (Mat. 26:31; Mako 7:6) Akaba ahamya ngu tiyaayegyesa abeegi be ebintu bingi munonga, ahabw’okumanya ngu bakaba nibaija kweyongyera kwega. (Yoh. 16:12) Kandi Yesu akaba afayo kumanya yaaba abeegi be baikiriza kandi baayetegyereza ebi yaabaire abeegyesa. (Mat. 13:51) Akatabo Eki Baibuli Erikwegyesa katebeekanisiibwe okutuhwera kwegyesa omu muringo nk’ogwo.
2. Ni mu miringo ki ei turikubaasa kukoresamu ebibuuzo ebirikwanjura buri shuura?
2 Ebibuuzo Ebirikwanjura Eshuura: Waaba nootandika eshuura, ni kirungi okuhwera omwegi kuteekateeka aha bibuuzo ebiri ahansi y’omutwe. Buuza ebibuuzo ebyo omu muringo oguraareetere omwegi okugira ekihika ky’okumanya ebiri omu shuura. Nari noobaasa kumushaba kugira eki yaabigambaho omu bigufu. Tikirikwetengyesa okugamba munonga aha bi yaagamba nari okutereeza buri ki yaagamba ekitahikire. Noobaasa kumwebaza kwonka ahabw’ebi yaagarukamu, reero mutandikye kwega. Ebi yaagamba aha bibuuzo ebirikwanjura eshuura nibiija kukuhwera kumanya yaaba nooyetenga kugira akacweka aku waashobororaho munonga omu ishomo eryo.
3. Nitubaasa kwegyesa tuta omu muringo gworobi?
3 Ebyahandiikirwe: Ebi murikwega bishemereire kwegama ahari Baibuli. (Heb. 4:12) Kwonka, tikirikwetengyesa okushoma buri kyahandiikirwe kyona ekyorekirwe. Ta omutima munonga ahari ebyo ebirikworeka ngu ebi turikwikiriza niburuga omu Baibuli. Ebyo ebitarikukwata munonga aha bi murikwega tibirikwetengyesa kushomwa. Akatabo Eki Baibuli Erikwegyesa nikeegyesa amazima omu omuringo gworobi. Yegyesa omu muringo gworobi. Ta omutima aha nshonga enkuru, kandi otakaashoborora okarenzya nari okongyeramu ebitarimu kyaba kitarikwetengyesa.
4. Nitwihirira ahari ki okucwamu yaaba omu kwega tushemereire kutwara obwire kushwijuma n’omwegi ebiri omu kicweka ekya Ebyongyeirweho?
4 Ebyongyeirweho: Ekicweka eki kirimu emitwe 14 erikwongyera kugamba aha biri omu shuura. Okushwijuma enshonga ezi kiri ahari ogwo orikwegyesa. Obumwe, noobaasa kuhiga ou orikushomesa Baibuli okweshomera ebiri omu ebyongyeirweho, namunonga yaaba naayetegyereza kandi arikwikiriza ebiri omu shuura ei murikwegaho. Nk’eky’okureeberaho, omwegi yaaba naikiririza ngu Yesu ni Mesia, nikibaasa kutetengyesa kushoma nawe akacweka akiine omutwe “Yesu Kristo—Niwe Mesia Owaaraganisiibwe,” mwaba nimwega eshuura 4, erikugira ngu “Yesu Kristo N’Oha?” Kwonka obumwe, nikibaasa kwetengyesa okutwara obwire kuhanuura n’omwegi aha biri omu kicweka kya ebyongyeirweho nari akacweka kaakyo.
5. Twacwamu okushwijuma ebyo ebiri omu ebyongyeirweho, ekyo nitubaasa kukikora tuta?
5 Waacwamu kushoma nawe ebyongyeirweho ebirikukwata aha ki murikwegaho, noobaasa kutebeekanisa ebibuuzo bukiri kare reero mushome obucweka oburimu nk’oku murikukora mwaba nimushoma ebiri omu shuura. Nari, okurugiirira aha byetengo by’omwegi, noobaasa kucwamu kukoresa edakiika nkye omu kushoma kwanyu okurabaraba omu byongyeirweho eby’eshuura ei murikwegaho. Ekyo nikiija kukuhwera kuhamya ngu yaayetegyereza ebi ashomire ahabwe.
6. Nitubaasa kukoresa tuta akabokisi k’eby’okweijutsya ahamuheru gwa buri ishomo?
6 Akabokisi k’Eby’Okweijutsya: Akabokisi akari aha muheru gwa buri shuura nikakira kuba karimu ebirikugarukamu ebibuuzo ebirikwanjura eshuura. Noobaasa kubikoresa okweijutsya enshonga enkuru ezaaba zigirimu. Ababuurizi abamwe bashangire ngu ni kirungi okushoma hamwe n’omwegi ebiri omu kabokisi n’ebyahandiikirwe ebikarimu. Bwanyima nibabuuza omwegi kushoboorora omu bigufu oku ebyahandiikirwe ebyo birikuhamya enshonga enkuru ezo. Eki nikibaasisa omwegyesa okumanya yaaba omwegi naayetegyereza gye enshonga enkuru ez’eishomo eryo hamwe n’oku enshonga ezo zirikuhamibwa omu Baibuli n’okureeba yaaba naikirizana nazo. Kandi nikitendeka omwegi okukoresa Baibuli omu kushobororera abandi amazima.
7. Nitubaasa kukoresa tuta akatabo Eki Baibuli Erikwegyesa okuhikiiriza omurimo gwaitu?
7 Omuringo ogurikukirayo oburungi ogw’okuhikiirizamu omurimo gwaitu ogw’okwegyesa abantu n’okubahindura abeegi n’okutooreza emiringo ei Yesu yaabaire ayegyesamu. (Mat. 28:19, 20) Akatabo Eki Baibuli Erikwegyesa nikabaasa kutuhwera kukora ekyo. Kakorese gye okwegyesa abandi amazima omu muringo ogworobi kwetegyereza kandi ogurikushemeza.