Ebyorobi

Eki Yesu Yaakozire

VIDIYO: Yesu Okworeka oku Tataitwe Arikutufaho

1. Reeba VIDIYO, nari shoma Matayo 6:25-27. Bwanyima oyetegyereze ebibuuzo ebirikukurataho:

1. Yesu akooreka ata oku Yehova arikutufaho?

2. N’obu Yesu araabe yaabaire naamanya enshonga nyingi ezirikukwata aha binyonyi, ni kashonshorekye ki akoorobi aku yaataireho omutima? Ahabw’enki ogu gwabaire guri omuringo murungi gw’okwegyesa?

Nitwegyera ki Ahari Yesu?

2. Twayegyesa omu muringo gworobi, abantu nibaija kwijuka ebi turikubeegyesa, kandi nibibahika aha mutima.

Tooreza Yesu

3. Otagamba bingi. Omu mwanya gw’okushoboorora byona ebi orikumanya aha nshonga, ta omutima aha biri omu kitabo ebi muriyo nimwega. Bwanyima y’okubuuza ekibuuzo, tegyereza omwegi agarukyemu. Yaaba atarikumanya eky’okugarukamu nari yaagarukamu ekitarikuhikaana n’enyegyesa za Baibuli, koresa ebibuuzo ebindi kumuhwera kuteekateeka aha nshonga. Omwegi yaayetegyereza enshonga enkuru, mugumizemu.

4. Hwera omwegi kureeba oku enyegyesa nsya zirikukwatana n’ebi yaaherize kwega. Nk’eky’okureeberaho, mwaba muriyo nimuza kutandika eishomo eririkukwata aha kuzooka, omu bugufu noobaasa kuhwera omwegi kweyijutsya ebi yaayegire aha mbeera y’abafu.

5. Koresa gye eby’okureeberaho. Otakakoreise eky’okureeberaho, yebuuze oti:

1. ‘Eky’okureeberaho kyorobi?’

2. ‘Nikiija kworobera omwegi kukyetegyereza?’

3. ‘Nikiija kuhwera omwegi kwijuka enshonga enkuru, beitu kutari kwijuka bwijuka eky’okureeberaho?’