Oine Kuba Oyetebeekaniise Gye Waaza Kwegyesa
1. Ahabw’enki twine kuta omutima aha kuhiga omwegi kusiima ebi arikwega?
1 Twaba nitwegyesa omuntu Baibuli, twine kuba twetebeekaniise gye twaba turi ab’okumuhiga kuheereza Yehova. Tushemereire kuteeraho kureeba ngu okwegyesa kwaitu kwamureetera kusiima amazima ga Baibuli. Kandi eki nikiija kuhiga omwegi. (Bir. 6:5; Enf. 4:23; 1 Kor. 9:26) Kwonka shi eki nitubaasa kukikora tuta?
2. Okushaba nikuhwera kuta omu kwetebeekanisa gye?
2 Shaba Waaba Nooza Kutebeekanisa: Obu Yehova niwe arikukuza embibo y’amazima omu mutima gw’omwegi, ni kirungi okutandika n’okushaba twaba nitwetebeekanisiza kwega n’omwegi ogwo. (1 Kor. 3:6; Yak. 1:5) Okushaba nk’okwo nikutuhwera omu kureeba oku twakweyongyera kumuhwera kwijuza omutima gwe ‘okumanya okuhikire’ okw’ebi Yehova akunda.—Kol. 1:9, 10.
3. Nitubaasa kutebeekanisa tuta twine omwegi omu biteekateeko?
3 Teekateeka aha Mwegi: Yesu akaba naamanya ngu okwegyesa gye nikutwariramu okuteekateeka aha bakuhurikiize. Emirundi nk’ebiri, Yesu akabuuzibwa ekibuuzo eki: “Nkaakora ki okuhungura amagara agatahwaho?” Buri kugarukamu, akakoresa emiringo etarikushushana. (Luka 10:25-28; 18:18-20) Twine kuteekateeka aha bi omwegi arikwetenga kwega twaba nitutebeekanisa. Ni byahandiikirwe ki aha byorekirwe ebi turaashome nawe? Nituza kumwegyesa birikwingana ki? Ni nshonga ki ezi omwegi arikubaasa kushanga zimugumiire kwetegyereza nari kwikiriza? Twareeba ngu hariho ebibuuzo ebi arikubaasa kutubuuza, nitwija kwetebeekanisa gye kubigarukamu.
4. Okutebeekanisa gye nikitwariramu ki?
4 Yeijutsye Ebi Orikuza Kumwegyesa: N’obu twakuba twayegire emirundi mingi ebi turikuza kwegyesa omuntu, kwonka nigwo gurikuba guri omurundi gw’okubanza kubyegyesa omwegi ogwo. Twaba turi ab’okuhika omwegi aha mutima, okutebeekanisa gye buri ishomo ni kikuru. Eki nikimanyisa itwe okukora eki turikuhiga omwegi kukora. Yeijutsye byona otwariiremu n’ebyahandiikirwe ebyayorekwa, obwo oine omwegi waawe omu biteekateeko, kandi ta omusitaari aha nshonga enkuru.—Rom. 2:21, 22.
5. Nitubaasa kutooreza tuta Yehova?
5 Yehova naafayo munonga aha kutunguuka kwa buri mwegi wa Baibuli omu by’omwoyo. (2 Pet. 3:9) Twatwara obwire kutebeekanisa buri ishomo, nitworeka okufayo nk’okwa Yehova.