Oku Turikubaasa Kukoresa​—Niki Eki Turikwega omu Baibuli?

Obutabo Eki Turikwega omu Baibuli hamwe na Eki Baibuli Erikwegyesa nibushushana. Obutabo obu bwombi nibworeka amazima omu muringo gurikushushana. Kwonka, akatabo Eki Turikwega omu Baibuli nikakoresa ebigambo ebyorobi kwetegyereza kandi ebiine amakuru. Katebeekanisiibwe kuhwera abo abarikugumirwa kwetegyereza akatabo Eki Baibuli Erikwegyesa. Omu mwanya gw’ebyongyeirweho, akatabo Eki Turikwega omu Baibuli kaine ekicweka ebirikukiraho, ahu turikushanga ebigambo ebimwe ebirikuba bikoresiibwe omu katabo kandi ebirikushoboororwa omu muringo ogworobi. Ahakutandika kw’eshuura tihariho bibuuzo nari akabokisi ak’okweijutsya. Kureka, buri shuura neehendera n’ekicweka omu bugufu ekirimu amazima g’omu Baibuli agagambwaho omu shuura yoona. Nk’akatabo Eki Baibuli Erikwegyesa, akatabo Eki Turikwega omu Baibuli nikabaasa kugabwa obwire bwona, n’obu kaakuba katari kamwe aha by’okugaba okwezi okwo. Nitubaasa kukoresa tuta ebicweka ebiri omu katabo Eki Turikwega omu Baibuli twaba nitwegyesa omuntu Baibuli?

OMU BUGUFU: Baingi, nibakunda omuringo ogu turikwegyesamu abantu Baibuli turikushoma obucweka omu katabo Eki Baibuli Erikwegyesa reero bwanyima tukabuuza ekibuuzo. Kwonka shi omwegi ku yaakuba atarikumanya gye orurimi nari atarikumanya kushoma gye. Omu mbeera ezo, noobaasa kucwamu kukoresa akatabo Eki Turikwega omu Baibuli, reero noobaasa kukoresa ekicweka omu bugufu kumwegyesa kandi omuhige kushoma ebiri omu shuura ahabwe. Buri kicweka Amazima noobaasa kukyegyesa omuntu omu dakiika nka 15. Obu ebicweka omu bugufu bitarikugamba munonga aha biri omu shuura, orikwegyesa aine kuteebekanisa gye, arikuteekateeka aha byetengo by’omwegi. Orikwegyesa yaayegyesa omuntu ebiri omu shuura yoona, naabaasa kukoresa ekicweka omu bugufu kweijutsya.

EBIRIKUKIRAHO: Ebigambo ebiri omu kicweka ebirikukiraho bitebeekanisiibwe gye nk’oku eshuura zirikukuratana. Orikwegyesa naabaasa kucwamu yaaba naija kugaaniira aha kicweka ebirikukiraho omu kitabo Eki Turikwega omu Baibuli.