Oku Akatabo “Okukunda kwa Ruhanga” Kaine Kukoresibwa omu Kwegyesa Abantu Baibuli
1. Akatabo “Okukunda kwa Ruhanga” kateirwe ahabwa kigyendererwa ki?
1 Ka twashemereirwe munonga okutunga akatabo kasya akaine omutwe “Mwerindire omu Kukunda kwa Ruhanga” omu ruteerane oruhango orwabaire rwine omutwe “Okwebemberwa Omwoyo gwa Ruhanga”! Nk’oku kyarangirwe, akatabo aka kagyendereire kutuhwera kumanya n’okukunda emitindo ya Yehova ey’emicwe beitu kutari kutwegyesa enyegyesa za Baibuli ezirikutandikirwaho. Titurikwija kugaba akatabo aka enju aha nju.
2. Akatabo aka nikaija kukoresibwa kata, kandi ahari baahi?
2 Akatabo aka niko katabo ka kabiri aku omwegi wa Baibuli araayege bwanyima y’akatabo “Eki Baibuli Erikwegyesa.” Guma noijuka ngu omu by’omwoyo abantu tibarikukurira aha rurengo rumwe. Mwaba nimwega, buri mwegi omutwarire aha rurengo rwe. Hamya ngu ebi mwayegaho yabyetegyereza gye. Obwire obwingi, akatabo aka tikashemereire kukoresibwa kutandika kwega Baibuli n’abantu abaayegire obutabo bwingi kwonka abatarikwija mu nteerane kandi abatarikwenda kuhikaanisa amagara gaabo n’amazima ga Baibuli agu baayegyesiibwe.
3. N’enki eki tushemereire kukora hati ku turaabe nitwegyesa omuntu omu katabo Ramya Ruhanga?
3 Ku oraabe hati oine ou orikwegyesa omu katabo Ramya Ruhanga kandi ori omu shuura ez’aha muheru, noobaasa kucwamu kukaheza kandi ohige ou orikwegyesa okushoma akatabo “Okukunda kwa Ruhanga.” Kyaba kitari kityo, ni kirungi okureka Ramya Ruhanga mukatandika aka akasya. Okwega ebiri omu kicweka ky’ebyongyeirweho omu katabo Eki Baibuli Erikwegyesa n’eky’omuntu kwecweramu.
4. N’enki eki tushemereire kukora ou turikwegyesa yaabatizibwa atakaherize obutabo Eki Baibuli Erikwegyesa na “Okukunda kwa Ruhanga”?
4 Omwegi yaabatizibwa atakaherize obutabo bwombi, ashemereire kugumizamu naayega okuhitsya yaaheza akatabo “Okukunda kwa Ruhanga.” N’obu araabe abatiziibwe, noobaasa kubara eshaaha, emirundi ei oyegire nawe kandi omubare nk’omwegi. Omubuurizi oraagyende naiwe kumwegyesa nawe naabaasa kubara eshaaha.
5. Akatabo “Okukunda kwa Ruhanga” nikabaasa kukoresibwa kata okuhwera ababuurizi abatakibuurira kandi abatakiija mu nteerane?
5 Omwe aha b’aha Kakiiko k’Obuheereza yaakushaba kwega Baibuli n’omwe aha batakibuurira kandi batakiija mu nteerane, naabaasa kukushaba kushoma nawe eshuura ezimwe omu katabo “Okukunda kwa Ruhanga.” Nikiba kitarikwetengyesa okwega n’omuntu nk’ogwo kumara obwire buraingwa. Ka n’omugisha okugira akatabo aka akasya, akagyendereire kutuhwera kwerindira “omu kukunda kwa Ruhanga”!—Yuda 21.