Akabokisi K’ebibuuzo

◼ Ni bitabo ki bibiri ebishemereire kukoresibwa omu kwegyesa abeegi baitu ba Baibuli?

Akatabo Eki Baibuli Erikwegyesa niko katabo kakuru aku turikukoresa kutandika kwegyesa abantu Baibuli. N’obu akatabo akandi nari ka turakiti karaabe nikabaasa kukoresibwa kutandika kwegyesa omuntu Baibuli, tushemereire kurahuka kuhindura tukatandika kumwegyeseza omu katabo Eki Baibuli Erikwegyesa. Hariho ebirungi ebirugire omu kukoresa akatabo Eki Baibuli Erikwegyesa kutandika kwegyesa abantu Baibuli.

Omwegi yaaheza kwega akatabo Eki Baibuli Erikwegyesa kandi yaaba naayeyongyera omu maisho omu by’omwoyo, ashemereire okwega akatabo Ramya Ruhanga. (Kol. 2:7) Orupapura 2 omu katabo ako nirushoboorora omugasho gwako: “Baibuli neehiga boona abarikukunda Ruhanga kuteeraho ‘kwetegyereza oburaingwa obwa bwemi, n’obwa bucuzi’ obw’amazima ge ag’omuhendo. (Abaefeso 3:18) Niyo nshonga ahabw’enki ekitabo eki kitebeekanisiibwe. Twine amatsiko ngu nikiza kukuhwera omu by’omwoyo hamwe n’okugira eby’okukubaasisa kugyendera omu kahanda akafunzire akarikuza omu magara omu nsi ya Ruhanga ensya ey’okuhikiirira.”

Omwegi yaaba ahikire kubatizibwa kwonka atakaherize obutabo obu bwombi, bwanyima y’okubatizibwa ashemereire kugumizamu naayega akaheza akatabo ka kabiri. N’obu omwegi araabe abatiziibwe, orikumwegyesa naabaasa kubara eshaaha, emirundi ei agarukireyo kumwegyesa kandi naabaasa kumubara nk’omwegi wa Baibuli. Orikwegyesa omuntu ogwo yaagyenda n’ondiijo mubuurizi bakamwegyesa hamwe, nawe naabaasa kubara eshaaha.