Koresa Gye Ebiri omu Katabo Eki Baibuli Erikwegyesa?

Omwegi wa Baibuli yaagumizamu naayega eki Baibuli erikwegyesa kandi akagyendera aha bi arikwega, naija kuhama omu by’omwoyo atunguukye. (Zab. 1:1-3) Nitubaasa kuhwera omwegi wa Baibuli kuhama omu by’omwoyo turikukoresa bimwe aha biri omu katabo Eki Baibuli Erikwegyesa?

Ebibuuzo Ebiri Ahu Eshuura Erikutandikira: Buri shuura neetandika n’ebibuuzo ebirikugarukwamu mwaba nimwega. Mutakatandikire kushoma noobaasa kubuuza omwegi ebibuuzo ebi, kimuhwere kugirira ekihika ebi murikuza kwega. Nari noobaasa kushaba omwegi kugarukamu ebibuuzo ebyo omu bugufu. Yaagarukamu ebibuuzo omu muringo ogutahikire, tikirikwetengyesa kumworeka eky’okugarukamu ekihikire. Ebi yaagarukamu nibiza kukuhwera kumanya enshonga enkuru ezi oine kumushoboororera gye.​—Enf. 16:23; 18:13.

Ebyongeirweho: Omwegi yaayetegyereza gye kandi akaikiriza ebiri omu ishomo, noobaasa kumuhiga kushoma ebyongeirweho ebirikukwata aha ishomo eryo ahabwe. Waagarukayo kwegyesa omwegi, noobaasa kukoresa edakiika nkye kuhamya ngu ayetegyereize ebi ashomire. Kwonka waareeba ngu omwegi naija kugasirwa munonga mwahikaanisa ebiteekateeko aha byongeirweho ebirikuhikaana n’eishomo eri murikwega, teeraho kukikora, nari nimubaasa kushoma obucweka obwo reero obuuze omwegi ebibuuzo ebi otebeekanise kumuhwera kwetegyereza.

Akabokisi k’Eby’Okweijutsya: Akabokisi akari aha muheru gwa buri shuura karimu eby’okugarukamu eby’ebibuuzo ebirikuba biri aha kutandika kw’eshuura. Noobaasa kukoresa akabokisi aka kuhamya ngu omwegi yaayetegyereza kandi ngu naabaasa kushoboorora enshonga enkuru ezirimu. Mushome omu iraka rihango ebiri omu kabokisi hamwe n’ebyahandiikirwe ebirimu. Reero oshabe omwegi kukoresa ebyahandiikirwe kworeka ngu ebihandiikirwe omu kabokisi bihikire.​—Byak. 17:2, 3.