Yongyera aha Kushemererwa Kwawe omu Bwire bw’Ekiijutsyo!
1. Noobaasa kwongyera ota aha kushemererwa kwawe omu bwire bw’Ekiijutsyo?
1 Okaayenzire kwongyera aha kushemererwa kwawe omuri Maaci, Apuri na Mei? Omuringo gumwe n’okwongyera aha bwire obu orikumara omu kubuurira, okaba payoniya omuhwezi kyaba nikibaasika. Ekyo nikiija kukureetera kita okushemererwa?
2. Okwongyera kwejumba omu kubuurira nikiija kwongyera kita aha kushemererwa kwaitu?
2 Yongyera aha Kushemererwa Kwawe: Yehova akatuhanga turikubaasa kutunga okushemererwa n’okumarwa ebirikuruga omu kumuramya hamwe n’omu kwigutsa ekyetengo kyaitu eky’eby’omwoyo. (Mat. 5:3) Kandi n’omuringo ogu yaatuhangiremu nigutubaasisa kutunga okushemererwa okurikuruga omu kuhwera abandi. (Byak. 20:35) Okubuurira nikutubaasisa kuhimbisa Ruhanga n’okuhwera abantu. Buzima kihikire kugira ngu okwongyera aha bwire obu turikumara omu kubuurira nikitureetera kugira okushemererwa kwingi. Okwongyera ahari ekyo, ku turikwongyera kwejumba omu kubuurira, nikituhwera kwongyera kwega kubuurira gye. Ku turikubuurira gye, nitugira obumanzi kandi tutuubya aha kutiina. Kandi nikiija kutubaasisa kubuurira baingi n’okutandika kwegyesa abantu Baibuli. Ebi byona nibitubaasisa kwongyera kugira okushemererwa omu kubuurira.
3. Ahabw’enki nikiija kuba kirungi kuba payoniya omuhwezi omuri Maaci na Apuri?
3 Maaci na Apuri n’obwire burungi kuba payoniya omuhwezi ahabw’okuba noobaasa kubuurira eshaaha 30 nari 50. Okwongyera ahari ekyo, nitwija kwejumba omu kampeyini y’okweta abantu kwija aha kiijutsyo eraatandiikye Maaci 22 Orwamukaaga, okuhitsya obu Ekiijutsyo kiraabeho Apuri 14. N’ekihika, ebibiina byona nibiija kwejumba omu kampeyini egi kubaasa kuheza ebicweka ebi birikubuuriramu.—Zef. 3:9.
4. Waaba nooyenda kuba payoniya omuhwezi oine kukora ki?
4 Tandika Kwetebeekanisa: Waaba otakeetebeekaniise, oshemereire kweshwijuma kureeba yaaba oine empindahinduka ezi orikubaasa kukora kwongyera aha bwire obu orikumara omu kubuurira okwezi kumwe nari abiri. Noobaasa kukigambira Yehova omu kushaba. (Yak. 1:5) Kandi noobaasa n’okukigaaniiraho n’ab’omuka yaawe hamwe n’abandi omu kibiina. (Enf. 15:22) Noobaasa kushanga ngu n’obu oraabe oine amagara mabi nari oine bingi by’okukora, naiwe noobaasa kutunga okushemererwa okurikuruga omu kuba payoniya omuhwezi.
5. Ni birungi ki ebiraarugye omu kwongyera kwejumba omu kubuurira omu bwire bw’Ekiijutsyo?
5 Yehova naayenda ngu abaheereza be bashemererwe. (Zab. 32:11) Twayongyera kwejumba omu kubuurira omu bwire bw’Ekiijutsyo, nitwija kutunga okushemererwa kandi nitwija kushemeza na tataitwe ow’omu iguru.—Enf. 23:24; 27:11.