Oku Turikubaasa Kutendeka Ababuurizi Abasya Kubuurira
1. Okahurira ota aha murundi gw’okubanza kwejumba omu kubuurira?
1 Noijuka omurundi gw’okubanza obu waayejumba omu kubuurira enju aha nju? Noobaasa kuba waabaire otiinire. Ku oraabe waabaire noobuurira n’owakwegyeise Baibuli nari ondiijo mubuurizi, hatariho kubangaanisa okashemererwa kutunga obuhwezi bwe. Hati ahabw’okugira ngu ohindukire omubuurizi murungi, oshemereire kuhwera abasya kandi okabatendeka kubuurira.
2. Ababuurizi abasya baine kwega ki?
2 Ababuurizi abasya bashemereire kwega oku baine kutandika kubuurira abantu, okukoresa Baibuli barikubuurira, okugarukayo ahari abo abarikwenda kumanya ebirikukiraho n’okutandika kwegyesa abantu Baibuli. Bashemereire n’okwega oku baine kubuurira omu miringo etarikushushana, nk’okubuurira aha nguuto n’okubuurira abo abari omu myanya ey’okukoreramu eby’obushuubuzi. Noobaasa kubahwera omu miringo egyo yoona orikubabeera eky’okureeberaho kandi orikubaha n’obuhabuzi.
3. Nitubaasa kuhwera tuta abandi kurabira omu ky’okureeberaho kyaitu?
3 Babeere eky’Okureeberaho: Yesu akoorekyerera abeegi be oku baine kubuurira. (Luk. 8:1; 1 Pet. 2:21) Waaba nooza kubuurira n’omubuurizi omusya, tebeekanisa enyanjura eyorobi ei omubuurizi ogwo arikubaasa kutooreza, obundi orikukoresa emwe ahari ezo ezirikuba ziri omu bimwe aha bitabo byaitu. Reero, teeraho kubuurira aha nju emwe nari ibiri kugira ngu omubuurizi ogwo ahurire oku orikubuurira. Mwaheza kubuurira omuntu, noobaasa kubuuza omubuurizi omusya akugambire yaaba enyanjura yaawe yaakora gye. Eki nikiija kumuhwera kureeba obukuru bw’okubuurira n’abandi kandi nikiija n’okumworobera kwikiriza obuhabuzi bwona obu oraamuhe yaaheza kubuurira omuntu.
4. Nitubaasa kuhwera tuta omubuurizi omusya bwanyima y’okuhurikiza enyanjura ye?
4 Bahe Obuhabuzi: Yesu akahabura abeegi be oku baine kubuurira. (Mat. 10:5-14) Noobaasa kuhwera omubuurizi omusya omu muringo nk’ogwo. Gwaba guri omurundi gwe gw’okubuurira omuntu, muhurikize gye. Reero mwaheza kuruga aha nju ei mwaba nimubuuriraho, yebaza omubuurizi ogwo omusya, n’obu waakuba waareeba ahu enyanjura ye erikwetenga kubonezibwamu. Otakamuhaire buhabuzi, noobaasa kucwamu kureeba yaaba arateereze omu nyanjura ye omu kubuurira aha nju endiijo. Obundi naabaasa kuba yaaba atiinire. Kandi, guma noijuka ngu ababuurizi boona baine okubaasa kutarikwingana, kandi butoosha hariho emiringo mingi ehikire ey’okukoramu ekintu.—1 Kor. 12:4-7.
5. Nitubaasa kugamba ki twaba nituteeraho kuha omubuurizi omusya obuhabuzi?
5 Obumwe omubuurizi omusya naabaasa kukushaba kumuha obuhabuzi. Kwonka yaaba atakikozire, teeraho kumuhwera. Eki nikibaasa kukorwa kita omu bwengye? Ababuurizi abamwe nibabuuza kwonka bati: “Nimbaasa kukuha obuhabuzi?” nari, “Byagyenda bita?” Ogundi omuringo ogw’okuhamu obuhabuzi n’okugira oti: “Obu naabaire ndi omubuurizi musya, kikaba nikingumira . . . , kwonka nkashanga eki kirikuhwera. . . .” Obumwe nikiba kiri kirungi okureeba ebiri omu katabo Reasoning muri mwembi. Okutenda kumumaramu amaani, muhe obuhabuzi aha nshonga emwe omu nyanjura ye.
6. Aha bikwatiraine n’okubuurira, ababuurizi nibatyazana bata nk’oku ekyoma “kityaza ekindi”?
6 Ekyoma Nikityaza Ekindi: Timoseo, owaabaire naamanya kubuurira gye, akahigwa Paulo kuguma naata omutima aha ku yaabaire naayegyesa n’okweyongyera omumaisho omu by’omwoyo. (1 Tim. 4:13, 15) N’obu haraabe nihabaasa kuba hahingwireho emyaka mingi kwiha obu waayejumba omu kubuurira aha murundi gw’okubanza, toshemereire kurekyeraho kwongyera kuboneza omu ku orikubuurira. Yegyera aha babuurizi abu orikubuurira nabo, nangwa n’abo abatakamazire bwire buraingwa barikubuurira, kandi n’embabazi teeraho kuhwera abandi, okukira munonga abasya kuba ababuurizi barungi b’amakuru marungi.—Enf. 27:17.