Yegyera aha Babuurizi Abarikumanya Kubuurira Gye

Buzima nitusiima ababuurizi abarikumanya kubuurira gye. Abamwe bamazire emyaka mingi nibaheereza Yehova bari abeesigwa. Kandi abandi tibakamazire myaka mingi. Ababuurizi aba bareebire oku Yesu ayebembeire ekibiina Ekikristaayo omu biro ebi eby’emperu arikwongyera omumaisho omurimo gw’okubuurira n’okuhindura abantu abeegi. (Mat. 28:19, 20) Ahabw’okwejumba omu kubuurira, batungire ‘amaani agarikukirayo’ baahikwaho oburemeezi n’okugyezibwa. (2 Kor. 4:7) Hariho bingi ebi turikubaasa kubeegyeraho. Nibaakoresa buri kagisha, kwegyesa abandi ebi beegire. (Zab. 71:18) N’ahabw’ekyo, twine kukoresa buri mugisha kubeegyeraho. Ekyo nitubaasa kukikora kita?

Omu Kubuurira. Kubaasa kubuurira gye, ababuurizi abatakamanyire kubuurira gye nari abakiri basya baine kutendekwa. Nibabaasa kwega kubuurira gye barikureeba oku ababuurizi abamazire emyaka mingi omu kubuurira barikubuurira. (Reeba ekicweka “Okuguma Twine Obweziriki omu Kubuurira,” akacweka ka kashatu ahansi y’omutwe omukye “Hwera Abatakeegire Kubuurira gye,”) omu Watchtower eya Febwari 15, 2015. Ogasiirwe ota ahabw’okubuurira n’ababuurizi abarikumanya kubuurira gye?

Noobaasa kweta omubuurizi omazire emyaka mingi arikubuurira kubuurira naiwe? Omubuurizi ogwo yaaba aine amaani makye, obumwe noobaasa kutwara omwegi waawe wa Baibuli mwegyere owe. Bwanyima y’okwega, mushabe kukuha obuhabuzi kurugiirira aha ku yaareeba.

Mara Nabo Obwire: Teeraho kumanya ababuurizi abamazire emyaka mingi barikubuurira kandi oteereho kuba nabo. Yeta omwe kwija omu kuramya kw’eka yaawe kandi omubuuze. Omubuurizi yaaba aine amaani makye, noobaasa kutebeekanisa kugirira okuramya kw’eka yaawe owe? Teeraho kumanya oku yaizire omu mazima. Mubuuze, atungire migisha ki? Ni kutunguuka ki okubaire omu kibiina kyanyu oku arikumanya? Niki ebimushemeize omu kuheereza Yehova?

Koresa okwetegyereza kandi omanye ngu nawe tarikumanya byona. Nka buri omwe ahariitwe, ababuurizi abamazire emyaka mingi barikubuurira baine ebiconco bitarikushushana omu kubuurira. (Rom. 12:6-8) Abamwe bakuzire omu myaka kandi nibabaasa kutamara bwire bwingi naitwe. Kwonka nabwo, nitubaasa kubeegyeraho bingi ahabw’emyaka mingi ei bamazire nibaheereza Yehova omu bwesigwa.