Tendeka Abaana Baawe Kuba Abaheereza ba Ruhanga

1. Ebiri omu Zaaburi 148:12, 13 nibihiga abazaire Abakristaayo kukora ki

¹ Yehova naayeta abaana kumuhimbisa. (Zab. 148:12, 13 ) N’ahabw’ekyo abazaire Abakristaayo nibeegyesa abaana baabo amazima g’omu Baibuli n’ebiragiro bya Ruhanga ebirikukwata aha micwe. Kandi nibabatendeka n’okuba ababuurizi b’amakuru marungi. Eki nibabaasa kuguma nibakikora bata nk’oku abaana barikweyongyera kukura

2. Eky’okureeberaho kirungi ky’omuzaire nikihwera kita abaana be

² Eky’Okureeberaho Kirungi: Omuramuzi Gideoni akagambira abashaija be 300 ati: “Mundeebereho.” (Bar. 7:17) Butoosha abaana nibakunda kureeba ebi abazaire baabo barikukora kandi bakabatooreza. Omuzaire omwe omushaija naakora nyekiro, kwonka Orwamukaaga omu kasheeshe ku arikuhika omu ka, omu mwanya gw’okubyama, naatwara abaana be omu kubuurira n’obu araabe naaba aruuhire. Omu kukora ekyo, naaba naaboreka ngu okubuurira ni kikuru munonga. (Mat. 6:33) Abaana baawe nibareeba orikukunda kwejumba omu miringo etari emwe y’okuramya nk’okushaba, okushoma Baibuli, okubuurira n’okugira eki waagarukamu omu nteerane N’eky’amazima obumwe noobaasa kuremwa kubikora nk’oku kishemereire. Kwonka abaana baawe baaba nibareeba ori omweziriki omu kuheereza Yehova, nibaija kutaho omutima waaba nooteeraho kubeegyesa kumuheereza.—Bir.6:6 , 7; Rom. 2:21, 22.

3. Ni bigyendererwa ki eby’omwoyo ebi abazaire bashemereire kuhwera abaana baabo kutaho kandi bakabihikiiriza

³ Ebigyendererwa ebi Barikubaasa: Abazaire nibateeraho munonga kutendeka abaana baabo kugyenda, kugamba, okwejweka n’ebindi nk’ebyo. Abaana ku barikugyenda nibakuru, nihaijaho ebigyendererwa bisya. Abazaire baabo baaba bari Abakristaayo nibabahwera kutaho ebigyendererwa by’omwoyo ebi barikubaasa kuhikiiriza kandi ebirikuhikaana n’emyaka yaabo. (1 Kor. 9:26) Mbwenu hati nooyegyesa abaana baawe kugira eki baagarukamu omu nteerane omu bigambo byabo n’okutebeekanisa embazo ezirikuba zibahairwe omu Ishomero ry’Obuheereza (Zab. 35:18) Noobatendeka kwejumba omu kubuurira okw’emiringo etari emwe n’emwe Noobahwera kugira ekigyendererwa ky’okubatizibwa n’okuza omu buheereza obw’obwire bwona Noobahwera kuba n’ababuurizi abarikubuurira baine okushemererwa n’omuhimbo abaraabahwere kutunguuka omu by’omwoyo—Enf. 13:20.

4. Abaana nibagasirwa bata abazaire baabo baabatendeka kutandika kuheereza Ruhanga bakiri bato

⁴ Omuhandiiki wa Zaaburi akagira ati: “Ai Ruhanga, okanyegyesa okwiha omu buto bwangye, kandi ninkigamba eby’okutangaaza ebi waakozire n’okuhitsya hati.” (Zab. 71:17) Tandika kutendeka abaana baawe bakiri bato kuba abaheereza ba Ruhanga. Omusingi gw’eby’omwoyo ogu orikubahwera kutaho nigwija kubahwera na baakura!—Enf. 22:6.