Okugaba Obupapura bw’Okweta Abantu aha Kiijutsyo Nikutandika Apuri 2
1. Kampeyini y’okugaba obupapura bw’okweta abantu aha Kiijutsyo neija kubaho ryari omu mwaka ogu, kandi na kigyendererwa ki?
1 Kuruga Apuri 2 kuhika Apuri 17, nitwija kuba nitugaba obupapura bw’okweta abantu aha mukoro mukuru omu mwaka—Okwijuka okufa kwa Kristo. Omu myaka ehingwire, abantu baingi baikiriize okwetwa okwo. Nk’eky’okureeberaho, aha izooba ry’Ekiijutsyo omukazi akateera esimu aha ofiisi y’eitaagi reero yaagira ati: “Ku naahika omuka, ahansi y’orwigi rwangye naashangaho akapapura k’okweta abantu aha Kiijutsyo. Niinyenda kuzayo kwonka tindikumanya gye shaaha.” Ow’eishe-emwe akamugambira ahu arikubaasa kureeba eshaaha aha kapapura ako. Omukazi akahendera arikuraganisa ati: “Ninza kuza aha mukoro gwanyu omwabazyo ogu!”
2. Nitubaasa kugamba ki twaba nitugaba akapapura k’okweta abantu aha Kiijutsyo?
2 Oku Turaabugabe: Ahabw’okugira ngu twine obwire bukye bw’okugaba obupapura obwo omu kicweka eki turikubuuriramu, ni kirungi kukoresa enyanjura ngufu. Noobaasa kuramutsya omuntu reero ogire oti: “Iwe n’ab’eka yaanyu nitwenda kubaha akapapura aka ak’okubeeta aha mukoro mukuru omu mwaka, ogurikuza kubaho omu nsi yoona aha Sande, Apuri 17. [Muhe akapapura ako.] Ebiro ebyo omu mwaka ogu nibwo turaijukye okufa kwa Yesu. Orubazo kuruga omu Baibuli nirwija kuheebwa kworeka oku turikubaasa kugasirwa omu kitambo kya Kristo. Akapapura aka nikooreka omwanya n’eshaaha ahu omukoro ogu guraabe omu kicweka kyaitu.”
3. Nitubaasa kukora ki kweta abantu baingi aha Kiijutsyo?
3 Ekibiina kyaba kiine ekicweka kihango ky’okubuuriramu, abareeberezi nibabaasa kushaba ababuurizi kutsiga obupapura obwo omu maka agu batarashangyemu abantu, baaba nibabaasa kubuta ahu abandi batarikubaasa kubureeba. Teeraho kweta aboorekire ngu nibenda kumanya ebirikukiraho, abanyabuzaare, abu orikukora nabo, abu orikushoma nabo n’abandi abu orikumanya. Mwaba nimugaba obupapura obwo omu wiikenda nimubaasa kubugaba hamwe na zaamagaziini kyaba nikibaasika. Noobaasa kuheereza nka payoniya omuhwezi omuri Apuri obaase kwejumbira kimwe omu kampeyini egi erikushemeza?
4. Ahabw’enki nitwenda ngu abarikwenda kumanya ebirikukiraho baije aha Kiijutsyo?
4 Abarikwenda kumanya ebirikukiraho abaraije aha Kiijutsyo ka nibaija kwega ebintu birungi! Nibaija kuhurira ebikwatiraine na rukundo mpango ya Yehova omu kuhayo ekitambo. (Yoh. 3:16) Nibaija kwega aha ku Obukama bwa Ruhanga buraije kugasira abantu. (Isa. 65:21-23) Nibaija kushabwa kugamba n’abarikwakiira abagyenyi aha bikwatiraine n’okwegyesibwa Baibuli kubaasa kumanya ebirikukiraho. Nitushaba ngu abantu baingi abarikwenda kwega ahari Yehova baikirize okwetwa okwo kandi baije babe naitwe aha Kiijutsyo!