Kampeyini y’Okweta Abantu aha Kiijutsyo Kutandika Maaci 1
1. Kampeyini y’okweta abantu aha Kiijutsyo neeza kutandika ryari, kandi ahabw’enki eraatware obwire buraingwa omwaka ogu?
1 Maaci, Orwakataano 1, nibwo turaatandike kwejumba omu kampeyini y’okweta abantu aha Kiijutsyo. Ekiijutsyo nikiza kubaho Maaci 26, ekirikumanyisa ngu kampeyini neeza kutwara obwire buraingwa kukira emyaka ey’enyima. Eki nikiija kubaasisa abantu baingi kutunga obupapura bw’okubeeta, na munonga ekibiina kyaba kiine ekicweka kihango ky’okubuuriramu.
2. Ni ntebeekanisa ki ezikozirwe okutunga obupapura bw’okweta abantu aha Kiijutsyo n’okubugaba omu kicweka kyona?
2 Okwetebeekanisiza Kampeyini: Abareeberezi nibaija kutuha obuhabuzi oku turaagabe obupapura obwo omu kicweka kyaitu kyona, na kyaba nikyetengyesa okubuta omu maju agu tutaraashangyemu abantu. Haagira obwatsigaraho bwanyima y’okubuurira enju aha nju omu kicweka kyaitu kyona, nitubaasa kubugaba omu myanya erikuba erimu abantu baingi. Omureeberezi orikukora aha by’obuheereza ashemereire kuhamya ngu obupapura oburiho endagiriro bwateebwa ahu magaziini zirikuteebwa kugira ngu ababuurizi babaase kubwihaho, kwonka bwona tibushemereire kuteebwaho omurundi gumwe. Tushemereire kutwaraho obwo bwonka obu turaakorese omu saabiiti.
3. Tushemereire kuguma nitwijuka ki twaba nitugaba obupapura bw’okweta abantu aha Kiijutsyo?
3 Ebi Turikubaasa Kugamba: Ni kirungi kukoresa nyanjura ngufu, kitubaasise kuhika aha bantu baingi. Aha rupapura 4 hariho enyanjura ei turikubaasa kukoresa turikugihikaanisa n’ekicweka kyaitu. Omuntu yaaba aine obwire nari yaabuuza, noobaasa kumugarukamu. Mwaba nimugaba obupapura obwo omu wiikenda nimubaasa kubugaba na zaamagaziini kyaba nikibaasika. Maaci 2, nitwija kuta omutima aha kugaba obupapura obwo omu mwanya gw’okushaba abantu kubeegyesa Baibuli.
4. Ahabw’enki tushemereire kwejumbira kimwe omu kampeyini y’okweta abantu aha Kiijutsyo?
4 Twine amatsiko ngu abantu baingi nibaija kuba naitwe aha Kiijutsyo. Orubazo nirwija kushoboorora ebirikukwata ahari Yesu. (1 Kor. 11:26) Nirwija kworeka oku okufa kwe kurikutuhwera. (Rom. 6:23) Kandi nirwija kworeka ahabw’enki ni kikuru kwijuka okufa kwe. (Yoh. 17:3) Ka tuteereho kwejumbira kimwe omu kampeyini egi!