Oraaheereizeho nka Payoniya ow’Obutwire?
1. Baingi bantungire mugisha ki, kwonka abamwe kibetengyeise kukora ki?
1 Kumara emyaka, baingi batungire omugisha ‘gw’okwegyesa n’okubuurira amakuru marungi’ nk’ababuurizi ab’obwire bwona. (Byak. 5:42) Kwonka abamwe, barekyeire aho kuheereza nka baapayoniya ahabw’enshonga zitari zimwe na zimwe. Ku oraabe waabaire waaheereizeho nka payoniya ow’obutwire, waashwijumire embeera zaawe hati kureeba ku oraabe noobaasa kugaruka kuheereza nka payoniya?
2. Ahabw’enki abo abaabaire baaheereizeho nka baapayoniya bashemereire kugaruka kushwijuma embeera zaabo hati?
2 Embeera Nizihinduka: Noobaasa kushanga ngu embeera eyaakureteire kurekyera aho kuheereza nka payoniya tekiriho. Nk’eky’okureeberaho, ku oraabe waarekyeire aho kuheereza nka payoniya ahabw’okugira ngu okaba otarikubaasa kuhitsya eshaaha 90, noobaasa kugaruka kuheereza nka payoniya hati obu eshaaha ezirikwetengwa zaatubizibwe zikaba 70? Emirimo yaawe nari obujunaanizibwa bw’okureeberera ab’omu ka yaanyu butuubire kuruga obu waarekyera aho kuheereza nka payoniya? Munyaanyazi-itwe omwe owaarekyeire aho kuheereza nka payoniya ahabw’amagara mabi akabaasa kugaruka kuheereza nka payoniya aha myaka 89. Akaba arengize omwaka atakiza mu irwariro ekyamureteire kuteekateeka ngu amagara ge nigamubaasisa kugaruka kuheereza nka payoniya.
3. Ab’omu ka nibabaasa kukwatanisa bata kugira ngu bahwere omwe aharibo kuheereza nka payoniya?
3 Noobaasa kuba otakaheerezahoga nka payoniya, kwonka omwe aha b’omu ka yaanyu naabaasa kuba yaarekyeire aho okuheereza nka payoniya kubaasa kureeberera omwe aha b’omu ka yaanyu, nk’omuzaire okaikwire. (1 Tim. 5:4, 8) Kyaba kiri kityo, iwe nari abandi omu ka nimubaasa kumuhwera kugaruka kuheereza nka payoniya. Mwena hamwe nimubaasa kugaaniira aha nshonga egyo. (Enf. 15:22) Ab’omu ka baakwatanisa kugira ngu omwe aharibo aheereze nka payoniya, boona nibaija kutunga okushemererwa.
4. Noobaasa kukora ki waaba otarikubaasa kugaruka kuheereza nka payoniya hati?
4 Otakaahwa amaani hati embeera zaawe zaaba zitarikukubaasisa kugaruka kuheereza nka payoniya. Ekyetengo kyawe ky’okuheereza nka payoniya nikishemeza Yehova. (2 Kor. 8:12) Omu kubuurira kwawe hati, koresa ebi waayegire obu waabaire nooheereza nka payoniya. Shaba aha bikwatiraine n’ekyetengo kyawe, kandi obe oyeteekateekire kuhindahindura omu mbeera zaawe haabaho omugisha gw’okuheereza nka payoniya. (1 Yoh. 5:14) Obundi obwire bwagyenda nibuhingura, Yehova naabaasa kukwiguriraho “orwigi ruhango kuza omu mirimo” kugira ngu obaase kugaruka kutunga okushemererwa okurikuruga omu kuheereza nka payoniya ow’obutwire!—1 Kor. 16:9.