Tutafiisa Busha Amaani Gaitu
1. Ebiri omu 1 Abakorinso 9:26 nibikwata bita aha kubuurira?
1 Entumwa Paulo akagira ati: “Nikyo nyirukira ntyo, ti nk’otarikumanya i arikuza; nteera entomi, ti nk’orikuteera busha.” (1 Kor. 9:26) Paulo akaba naagamba aha kuhamira aha kigyendererwa kye eky’okuheereza gye Yehova. Kwonka, ebigambo ebyo nibikwata n’aha kubuurira. Okubuurira kwaitu kubaasa kurugamu ebirungi, titushemereire kufiisa busha amaani gaitu. Mu muringo ki?
2. Omu kubuurira nitubaasa kutooreza tuta entumwa Paulo n’abandi babuurizi b’omu kyasha ky’okubanza?
2 Buurira ahu Abantu Barikubaasa Kushangwa: Paulo n’abandi babuurizi omu kyasha ky’okubanza bakaba babuurira ahu baabaire bateekateeka ngu abantu bari. (Byak. 5:42; 16:13; 17:17) N’ahabw’ekyo omu kicweka kyaitu baingi baaba nibakira kushangwa omuka omu mwabazyo, obwo nibwo burikuba buri obwire burungi bw’okubuurira enju aha nju. Nikibaasa kuba kirungi kubuurira aha nguuto omu kasheeshe obu abantu barikuba nibaza kukora nari omu mwabazyo obu barikuba nibaruga kukora nari obu barikuba nibagura ebintu.
3. Omu kubuurira omu kicweka kyaitu nitubaasa kwetantara tuta kufiisa busha amaani gaitu?
3 Okubuurira omu Kicweka omu Muringo gw’Obwengye: Tushemereire kwetantara kufiisa busha amaani gaitu turikubuurira omu kicweka kyaitu omu muringo gw’obwengye. Nk’eky’okureeberaho, omu mwanya gw’okutwara ababuurizi baingi omu kicweka kimwe, ekirikubaasa kutwara obwire bwingi kubeebembera, nikiba kiri kirungi kubabaganisamu, buri guruupu ekabuurira ekicweka ekyayo. Na twaba nitubuurira omu bicweka bya hare tutari baingi omu kicweka kimwe, niturahuka kuheza ekicweka kandi nitutunga n’omugisha gw’okubuurira abantu baingi. Noobaasa n’okushaba kuheebwa ekicweka ekyawe eky’okubuuriramu ekiri haihi n’ahu orikutuura, omu mwanya gw’okukoresa obwire bwingi orikuza kubuurira hare.
4. Niki ekiraatuhwere kuba abajubi barungi b’abantu?
4 Yesu akagira ngu ababuurizi ‘n’abajubi b’abantu.’ (Mak. 1:17) Ekigyendererwa ky’omujubi ti kutambika akatimba omu maizi kwonka, beitu n’okukwata eby’enyanja. N’ahabw’ekyo, abajubi barungi nibajuba ahu barikuteekateeka ngu eby’enyanja biri n’obu birikubaasa kukwatwa, kandi baahikayo nibatandikiraho kujuba. Buzima, tibarikufiisa busha amaani gaabo. Naitwe ka tuteereho kuba abeeziriki omu kubuurira kwaitu.—Heb. 6:11.