Okugira Ekicweka Ekyawe eky’Okubuuriramu Nikubaasa Kukuhwera
1. Nikimanyisa ki okugira ekicweka ekyawe eky’okubuuriramu?
1 Nikimanyisa ki okugira ekicweka ekyawe eky’okubuuriramu? Ekibiina ekirikuba kiine ekicweka kihango ky’okubuuriramu, nikiba nikimanyisa ekicweka eki orikushaba kuheebwa kuguma noobuuriramu, obundi nk’ekyo ekikuri haihi. Akatabo Organized, aha rupapura 103, nikashoboorora kati: “Okugira ekicweka ekyawe eky’okubuuriramu ekikuri haihi, nikiija kukuhwera kukoresa gye obwire bwawe bw’okubuurira. Kandi noobaasa n’okweta omubuurizi ondiijo kubuurira naiwe omu kicweka kyawe.”
2. Okugira ekicweka ekyawe eky’okubuuriramu nikwongyeserereza kuta aha kubuurira kw’ekibiina?
2 Nikwongyeserereza aha Kubuurira kw’Ekibiina: Waaheebwa ekicweka ekyawe eky’okubuuriramu ekiri haihi n’ei orikukorera, noobaasa kubuurira omu bwire bwa kyamushana nari otakagarukire muka, obundi ori n’omubuurizi ondiijo orikukorera haihi naiwe. Waaba oine ekiri haihi n’ei orikutuura, iwe n’ab’omu ka yaanyu nimubaasa kuguma nimukibuuriramu omu mwabazyo. Kwonka nabwo waaba otagiire omu ruteerane rw’okwetebeekanisa kuza kubuurira, nooba oine kushaba Yehova obuhwezi otakatandikire kubuurira. (Fil. 4:6) Kandi okubuurira omu kicweka ekyawe tikushemereire kukuremesa kushagika entebeekanisa z’ekibiina ez’okubuurira. Na munonga omu wiikenda nikiba kiri kirungi kubuurira hamwe na guruupu ei orimu.
3. Okugira ekicweka ekyawe eky’okubuuriramu nikuhwera kuta?
3 Oku Kirikuhwera: Waaheebwa ekicweka ekyawe, nooba noobaasa kukibuuriramu obwire bwona obu kirikukubaasikira. Nikikuhwera kumara obwire bwingi orikubuurira omu mwanya gw’okubumara orikuza hare. Nikibaasisa n’abamwe kuba baapayoniya abahwezi nari ab’obutwire. Obu abo abarikuba nibenda kumanya ebirikukiraho barikuba bari haihi naiwe, nikikworobera kugarukayo n’okubeegyesa Baibuli. Baingi nibashanga ngu okugira ekicweka ekyabo eky’okubuuriramu, nikibahwera kumanya gye abantu abakirimu ahabw’okukibuuriramu emirundi mingi batakakihaireyo, kugira ngu abandi babaase kushaba kukiheebwa. Okugira ekicweka ekyawe eky’okubuuriramu nikwija kukuhwera hamwe n’ab’omu ka yaanyu kuhikiza kimwe obuheereza bwanyu.—2 Tim. 4:5.