Enteerane z’Okwetebeekanisiza Okuza Kubuurira

1. Ahabw’enki nitufayo munonga okuza kubuurira omu muringo ogutebeekanisiibwe gye?

¹ Yesu akataho eky’okureeberaho aha bikwatiraine n’okukora omurimo gw’okubuurira aha Bukama omu muringo ogutebeekanisiibwe gye. Obunaku obu, abo abaine obujunaanizibwa aha murimo gw’okubuurira aha Bukama omu nsi yoona, nibateeraho kureeba ngu gwakorwa omu muringo nigwo gumwe. Kuhikaana n’eki, ebibiina omu nsi yoona nibikoresa enteerane z’okwetebeekanisiza okuza kubuurira nk’omuringo gumwe gw’okutebeekanisamu abarikuba nibaza kubuurira.​—Mat. 24:45-47; 25:21 Luk. 10:1-7.

2. N’enki ebiine kuba omu nteerane z’okwetebeekanisiza okuza kubuurira?

² Entebeekanisa Nungi: Enteerane z’okwetebeekanisiza okuza kubuurira zitairweho okubaasa kuhiga n’okuha obuhabuzi abo abarikuba nibaza kubuurira. Ekyahandiikirwe eky’eizooba eryo nikibaasa kukoresibwa kyaba nikikwata aha by’okubuurira. Obumwe, nihabaasa kubaho okweijutsya ebiri omu Obuheereza Bwaitu obw’Obukama, omu katabo Reasoning, nari omu kitabo Ministry School okubaasa kutebeekanisa gye boona abarikuza kubuurira aha izooba eryo. Nihabaasa n’okubaho eky’okureeberaho kigufu ekirikukwata ahari kimwe aha bitabo ebi murikuza kugaba. Mutakahendeire n’eshaara, buri omwe aine kuba naamanya ou araabuurire nawe n’ekicweka eki murikuza kubuuriramu. Oruteerane oru orutarikurenzya dakiika 15 rwahwa, buri omwe aine kutandikiraho kuza omu kicweka eki murikubuuriramu.

3. Ni baahi abaine obujunaanizibwa bw’okutebeekanisa enteerane z’okwetebeekanisiza okuza kubuurira?

³ Nizitebeekanisibwa Zita? Omureeberezi orikukora aha by’okubuurira, niwe aine obujunaanizibwa bw’okutebeekanisa enteerane z’okwetebeekanisiza okuza kubuurira. Abarikwebembera zaaguruupu nari abahwezi baabo, nibo baine obujunaanizibwa bw’okwebembera abari omu zaaguruupu ezo okuza kubuurira omuri wiikenda. Abareeberezi abamwe nari abaheereza nibabaasa kugyenda n’abarikuza kubuurira omu biro ebitari bya wiikenda. Abarikureeberera zaaguruupu nibakorera hamwe n’omureeberezi orikukora aha by’okubuurira kureeba ngu ababuurizi abarikubuurira enju aha nju omuri wiikenda bagira ekicweka ky’okubuuriramu ekirikumara. Omu biro ebitari bya wiikenda, omureeberezi orikukora aha by’okubuurira naija kumanya entebeekanisa z’abo abaraayebembere zaaguruupu kuza kubuurira.

4-6. (a) Enteerane z’okwetebeekanisiza okuza kubuurira ziriho ahabwa kigyendererwa ki aha bikwatiraine n’ekicweka eki ekibiina kirikubuuriramu? (b) N’enki ebirikubaasa kuhwera omu kumanya yaaba enteerane z’okwetebeekanisiza okuza kubuurira zirikwetengyesa?

⁴ Enteerane ezi Ziine Kuba Nkahi Kandi Ryari? Omu mwanya gw’ekibiina kyona kweteeranira omu mwanya gumwe, ni kirungi enteerane ezi kuba omu myanya erikubaasikira boona, na munonga omu maju g’ab’eishe-emwe omu kicweka eki murikubuuriramu n’ekigyendererwa ky’okubuurira gye ekicweka kyanyu kyona. Ekyombeko ky’Obukama nakyo nikibaasa kukoresibwa ahabw’enteerane ezi. Ebibiina bingi nibikoresa Ekyombeko ky’Obukama kugiriramu enteerane ezi aha sande bwanyima y’orubazo rwa boona n’Okwega ebiri omuri Watchtower. Entebeekanisa ziine kukorwa kugira ngu ababuurizi batakaagyenda engyendo ndaingwa barikuza kubuurira. Butoosha entebeekanisa ziine kuhindurwamu kureeba ngu ahu barikweteeranira omu bwire obwo nihababaasisa kubuurira gye ekicweka kyona.

⁵ Obwire burungi bw’okukoreramu enteerane ezi kandi n’emirundi ei enteerane ezi ziine kubaho omu saabiiti nikurugiirira aha kicweka eki murikubuuriramu. Ebibuuzo ebi ahaifo nibibaasa kuhwera omu kucwamu ahu enteerane z’okwetebeekanisiza okuza kubuurira ziraabe n’obu ziraabeho.

⁶ Ni kicweka ki eky’okubuuriramu ekiine kwongyera kuteebwaho omutima? Ni bwire ki oburungi obw’okubuurira enju aha nju? Hashemereire kukorwa entebeekanisa y’okubuurira omu mwabazyo enju aha nju nari okugarukayo ahari abo abarikwenda kumanya ebirikukiraho? Entebeekanisa zoona ez’okubuurira ziine kuhanikwa ahu amabaruha g’ekibiina garikuhanikwa. N’ekigyendererwa ky’ababuurizi b’Obukama boona kuheza gye ekicweka eki bahairwe kubuuriramu kubaasa kugamba nk’oku entumwa Paulo yaagizire ngu: ‘Tinkiine hatsigaire.’​—Rom. 15:23.

7. Ogwo otoorainwe kwebembera abarikuza kubuurira aine bujunaanizibwa ki?

⁷ Okwebembera Enteerane z’Okwetebeekanisiza Okuza Kubuurira: Orikutooranwa kwebembera oruteerane oru naayoreka ngu naaha entebeekanisa egi ekitiinisa arikutebeekanisa gye. Enteerane ezi ziine kutandika omu bwire, ziine kuba zirimu obuhabuzi kandi tizishemereire kurenzya edakiika 15. Orikwebembera oruteerane oru aine kuba naamanya ekicweka ekirikuza kubuurirwamu oruteerane orwo rutakatandikire. N’obu kiraabe kitarikwetengyesa kutegyereza abarikwija bakyerereirwe, okutsigaho akahandiiko karikworeka ekicweka eki mwazamu nikibaasa kuhwera abo abaraije bakyerereirwe. Bwanyima y’oruteerane oru buri omwe aine kutandikiraho kuza omu kicweka eki murikuza kubuuriramu. Oruteerane rw’okwetebeekanisiza okuza kubuurira orutebeekanisiibwe gye hatariho kubanganisa nirwija kuha obuhabuzi oburikwetengwa abo boona abarikuza kubuurira eizooba eryo.​—Enf. 11:14.

8. Ni mu miringo ki ei abo abarikuba bari omu nteerane z’okwetebeekanisiza okuza kubuurira barikubaasa kukwatanisamu n’abo abarikuzebembera?

⁸ Okuba omu Nteerane z’Okwetebeekanisiza Okuza Kubuurira: Okukwatanisa ni kikuru. (Heb. 13:17) Kyaba nikibaasika, ogwo orikwebembera abarikuza kubuurira naabaasa kuhwera ogwo weena orikwetenga ow’okubuurira nawe. Nikiba kiri kirungi abamazire obwire buraingwa barikubuurira baaba bariho kugira ngu bahwere ababuurizi abasya. Abo abarikwikiriza kubuurira n’abantu batari bamwe na bamwe, nikibabaasisa kuhwerahwerana. (Enf. 27:17; Rom. 15:1, 2) Boona baine kuteeraho kwija omu ruteerane oru omu bwire. Okuha entebeekanisa egi ekitiinisa hamwe n’okufayo aha b’eishe-emwe bagyenzi baitu, nikiija kutuhiga kukora empindahinduka ezirikwetengyesa.​—2 Kor. 6:3, 4; Fil. 2:4.

9. Ni mu miringo ki ei baapayoniya barikubaasa kushagikamu enteerane z’okwetebeekanisiza okuza kubuurira?

⁹ Obushagiki bwa Baapayoniya: Obushagiki bwa baapayoniya omu nteerane z’okwetebeekanisiza okuza kubuurira nibuhwera boona. Nikyetegyerezibwa ngu baapayoniya baine eby’okukora bingi. Oyihireho okwegyesa abantu Baibuli n’okugarukayo ahari abo abarikwenda kumanya ebirikukiraho, obumwe nooshanga baine n’okureeberera ab’omu maka gaabo nari okukora emirimo y’okwebaisaho. N’ahabw’ekyo, baapayoniya tibashemereire kuteekateeka ngu baine kuba omu buri ruteerane rw’okwetebeekanisiza okuza kubuurira na munonga zaaba nizibaho buri izooba. Kwonka, obumwe baapayoniya nibabaasa kushagika enteerane zimwe ahari ezi buri saabiiti. Enteerane z’okwetebeekanisiza okuza kubuurira nizihwera omu kutendeka abari omu kibiina kandi okumanya okw’eby’omwoyo oku baapayoniya baine n’eby’okureeberaho byabo nibibaasa kuhwera munonga abandi. Okwejumba munonga omu kubuurira kubahwereire kuba ababuurizi barungi. Nibabaasa kuhwera n’abandi omu kibiina. Okwejumba kwabo omu kubuurira n’obweziriki hamwe n’omu nteerane z’okwetebeekanisiza okuza kubuurira bibahindwire eby’okureeberaho birungi by’okutooreza. Kandi okwejumba kwabo omu nteerane ezi omu bwijwire nikusiimwa munonga.

10. Ahabw’enki kihikire ngu boona ababuurizi b’Obukama beekundiire bashagike entebeekanisa y’enteerane z’okwetebeekanisiza okuza kubuurira?

¹⁰ Nk’oku kyabaire kiri omu bunaku bwa Yesu n’entumwa ze, omurimo muhango ogw’okubuurira aha Bukama nigukorwa omu kubuurira enju aha nju. Enteerane z’okwetebeekanisiza okuza kubuurira ziriho ahabw’ekigyendererwa ky’okwombekana n’okwejumba gye omu kubuurira. Boona ababuurizi b’amakuru marungi baine kushagika entebeekanisa egi nk’oku kirikubaasika. (Byak. 5:42; 20:20) Twena ka tuteereho kushagika enteerane z’okwetebeekanisiza okuza kubuurira. Twakora tutyo, nitwija kutunga emigisha ya Yehova kandi nitwija kushemeza omutima gw’Omwebembezi waitu Yesu Kristo, turikubuurira amakuru marungi g’Obukama bwa Ruhanga.​—Mat. 25:34-40; 28:19, 20.