Enteerane z’Okwetebeekanisa Kuza Kubuurira Ezirikuhikiiriza Ekigyendererwa

1. Enteerane z’okwetebeekanisa kuza kubuurira ziine kigyendererwa ki?

¹ Eizooba rimwe, Yesu akagira oruteerane n’entumwa 70 aha ntumwa ze batakagiire kubuurira. (Luk. 10:1-11) Akabagaruramu amaani, yaabaijutsya ngu tibarikwija kuba bari bonka, kwonka ngu bakaba nibaija kwebemberwa Yehova “mukama w’eigyesha.” Kandi akabaha n’obuhabuzi obwabaire nibwija kubahwera kukora omurimo ogu, kandi yaabatuma bari “babiri babiri.” Obunaku obu, enteerane eziturikugira tutakagiire omu kubuurira, ziine ekigyendererwa nikyo kimwe​—kutuhiga, kutuhwera, n’okututebeekanisa.

2. Oruteerane rw’okwetebeekanisa kuza kubuurira rwine kumara obwire burikwingana ki?

² Obunaku obu, oruteerane rw’okwetebeekanisa kuza kubuurira nirumara edakiika 10 nari 15, ekirikutwariramu okutebeekanisa abarikuza kubuurira, kubamanyisa ekicweka ky’okubuuriramu, n’okushaba. Ekyo hati nikiza kuhindurwamu. Kutandika na Apuri, oruteerane oru nirwija kuba nirumara edakiika itaano nari mushanju. Kwonka, rwaba nirukuratira orundi ruteerane rw’ekibiina, rwine kutahitsya edakiika ezo ahabw’okuba abarikuba barurimu nibaba baaruga kutunga obuhabuzi kuruga omu Byahandiikirwe. Enteerane ezo zaaba ngufu nikibaasisa boona kukoresa obwire bwingi omu kubuurira. Okwongyera ahari ekyo, baapayoniya nari ababuurizi baaba batandika kubuurira oruteerane rw’okwetebeekanisa kuza kubuurira rutakabaireho, nikiba kiri kirungi kukoresa obwire bukye kugira ngu batateeganisibwa.

3. Enteerane z’okwetebeekanisa kuza kubuurira zishemereire kuba zitebeekanisiibwe zita kubaasa kugasira gye ababuurizi?

³ Enteerane z’okwetebeekanisa kuza kubuurira ziine kuba zitebeekanisiibwe kubaasa kugasira gye ababuurizi. Omu bibiina ebingi ni kirungi buri guruupu kugira oruteerane rwayo omu mwanya gwa guruupu zoona kuteeranira hamwe. Eki nikihwera ababuurizi kurahuka kuhika omu kicweka ky’okubuuriramu nari ahu barikubuganira. Nikihwera abarikwebembera guruupu kurahuka kutebeekanisa ababuurizi, hamwe n’okubahwera. Akakiiko k’abareeberezi nikabaasa kushwijuma embeera y’ekicweka kyanyu reero kacwemu ekihikire. Batakahendiire oruteerane n’okushaba, boona baine kuba nibamanya ahu barikuza kubuurira n’ou barikuza kukora nawe.

4. Ahabw’enki tutashemereire kutwara enteerane z’okwetebeekanisa kuza kubuurira nk’ezitari nkuru?

⁴ Tushemereire Kuzitwara nk’Enteerane Ezindi ez’Ekibiina: Ahabw’okugira ngu enteerane z’okwetebeekanisa kuza kubuurira nizihwera abarikuba nibaza kubuurira, nizibaasa kutagibwamu ab’omu kibiina boona. Kwonka ekyo tikirikumanyisa ngu ziine kutwarwa nk’ezitari nkuru waazigyeragyeranisa n’enteerane z’ekibiina ezindi. Nk’enteerane zaitu ezindi zoona, enteerane z’okwetebeekanisa kuza kubuurira n’entebeekanisa ya Yehova erikutuhwera kwezirikisana, kukundana n’okukora ebirungi. (Heb. 10:24, 25) N’ahabw’ekyo, orikwebembera oruteerane oru aine kutebeekanisa gye kugira ngu rubaase kuhaisa Yehova ekitiinisa kandi rugasire abariho. Kyaba nikibaasika, ababuurizi abarikuza kubuurira baine kuteeraho kuba omu ruteerane oru.

5. (a) Orikukora ahaby’obuheereza aine bujunaanizibwa ki omu kutebeekanisa enteerane z’okubuurira? (b) Ni ryari obu munyaanyazi-itwe arikubaasa kwebembera enteerane z’okubuurira?

⁵ Ebi Oraayebembere Oruteerane Oru Aine Kutebeekanisa: Omuntu kubaasa kutebeekanisa gye kwebembera ekicweka kyona omu ruteerane, aine kumanyisibwa bukiri kare. Nikyo kimwe, n’orikuba naaza kwebembera oruteerane rw’okubuurira naba aine kumanyisibwa kare. Kwonka, abarikuza kubuurira baabuganira omu guruupu zaabo, abarikwebembera guruupu nari abahwezi baabo nibeebembera oruteerane oru. Kandi, guruupu zoona zaaba niziza kugirira hamwe oruteerane oru, orikukora ahaby’obuheereza naacwamu oraayebembere oruteerane oru. Bamwe abarikukora ahaby’obuheereza nibaha abarikwebembera entebeekanisa y’oruteerane oru kandi bagihanika n’ahu barikuhanika amabaruha. Orikukora ahaby’obuheereza aine kukoresa okwetegyereza yaaba naatoorana abaraayebembere, arikwijuka ngu oburungi bw’enteerane ezi niburugiirira aha ku orikwebembera arikutebeekanisa n’oku arikwegyesa. Haaba hatariho omureeberezi, omuheereza, nari ow’eishe-emwe obatiziibwe ohikire kwebembera, aha mazooba agamwe, orikukora ahaby’obuheereza naabaasa kutoorana munyaanyazi-itwe obatiziibwe kwebembera oruteerane oru.​—Reeba ekicweka “Obu Munyaanyazi-itwe Aine Kwebembera.”

6. Ahabw’enki ni kikuru oraatooranwe kwebembera oruteerane oru kutebeekanisa gye?

⁶ Twaheebwa obujunaanizibwa omu Ishomero ry’Obuheereza nari Oruteerane rw’Obuheereza, nitubutwara nka kikuru kandi tutebeekanisa gye. Baingi ahariitwe nitwetebeekanisa bukiri kare kwonka titurikutegyereza kutebeekanisa ebi turaagambe twaba turiyo nituza omu nteerane. Obujunaanizibwa bw’okwebembera oruteerane rw’okwetebeekanisa kuza kubuurira nabwo nikwo bwine kutwarwa. Ahabw’okugira ngu oruteerane oru nirwija kuba ruri rugufu, ni kikuru kutebeekanisa gye kubaasa kuba orw’omugasho kandi rukahendera omu bwire. Okutebeekanisa gye nikitwariramu n’okumanya ekicweka ky’okubuuriramu bukiri kare.

7. Oraayebembere oruteerane rw’okwetebeekanisa kuza kubuurira naabaasa kukoresa ki? Reeba akabokisi aha rupapura 6. 

⁷ Eby’okuhikaanisaho Ebiteekateeko: Obu ebicweka birikuba birimu embeera zitarikushushana, omwambari omwesigwa tatuhaire eby’okukuratira omu ruteerane rw’okwetebeekanisa kuza kubuurira. Akabokisi akiine omutwe “Omu Ruteerane rw’Okwetebeekanisa Kuza Kubuurira, Noobaasa Kukoresa” nikooreka bimwe ebirikubaasa kukoresibwa. Oruteerane oru nirwija kuba nirwebemberwa omu muringo gw’okuhikaanisa ebiteekateeko. Obumwe, eky’okureeberaho ekitebeekanisiibwe gye nari vidiyo kuruga aha jw.org erikukwata aha kubuurira nibibaasa kukoresibwa. Oraabe naatebeekanisa kwebembera oruteerane oru, ashemereire kuteekateeka aha birikugaruramu amaani kandi ebiraahwere abaraabe nibaza kubuurira izooba eryo.

8. Ni bintu ki ebi murikubaasa kugambaho omu ruteerane rw’okwetebeekanisa kuza kubuurira aha Rwamukaaga na Sande?

⁸ Nk’eky’okureeberaho, aha Rwamukaaga, ababuurizi abaingi nibagaba Omunaara na Awake! Baingi abarikwejumba omu kubuurira aha Rwamukaaga tibarikubuurira ahagati ya wiiki, n’ahabw’ekyo nibabaasa kuba batakiijuka enyanjura ei bayegyerizemu omu Kuramya okw’Eka. N’ahabw’ekyo, nikiba kiri kirungi oraayembere oruteerane oru kubaijutsya emwe aha nyanjura eziri enyima y’Obuheereza Bwaitu obw’Obukama. Ebindi ebi orikubaasa kukoresa omu nyanjura y’okugaba magaziini nibitwariramu okugamba aha biro bikuru, ekibaireho omu kicweka kyanyu, ebibaire biri omu makuru nari okutaho omusingi gw’okugarukayo aha muntu ou waatsigira magaziini. Abaraabe bari omu ruteerane rw’okwetebeekanisa kuza kubuurira baaba babaire baakoreise magaziini ezirikugabwa okwezi okwo, oraayebembere oruteerane naabaasa kubashaba kugamba oku babaasize kuzigaba n’okugamba ebirungi ebi batungire. Aha Sande, oraayebembere oruteerane oru naabaasa kukora nikyo kimwe aha bitabo ebiraabe nibigabwa okwezi okwo. Ebitabo eby’okukoresa omu kwegyesa abantu Baibuli, nka Amakuru Marungi, Hurikiza Ruhanga na Eki Baibuli Erikwegyesa nibubaasa kugabwa obwire bwona, n’ahabw’ekyo oraayebembere oruteerane oru omu bugufu naabaasa kugamba oku kamwe aharibwo karikubaasa kugabwa.

9. Aha wiikenda twaba nitwejumba omu kampeyini y’omutaano nitubaasa kugamba ahari ki?

⁹ Aha wiikenda, ekibiina kyaba nikyejumba omu kampeyini y’omutaano, oraayebembere oruteerane oru naabaasa kugamba oku magaziini ensya n’obupapura bw’okweta abantu birikubaasa kugabirwa hamwe nari turakiti, nari agambe eki turikubaasa kukora twabona omuntu orikwenda kumanya ebirikukiraho. Ekindi, nimubaasa kugamba aha birungi ebirikworeka omugasho gwa kampeyini ezi.

10, 11. Ahabw’enki ni kikuru ababuurizi kutebeekanisa batakagiire omu oruteerane rw’okuza kubuurira?

¹⁰ Ebi Ababuurizi Barikubaasa Kutebeekanisa: Ababuurizi nabo baine eki barikubaasa kukora kureetera oruteerane rw’okwetebeekanisa kuza kubuurira kuba rurungi. Baayetebeekanisiza okubuurira kare, nka baaba bari omu kuramya okw’eka, nibaija kuba baine eby’okugaaniira n’ababuurizi abandi. Okutebeekanisa gye nikutwariramu okutunga magaziini n’ebitabo ebindi otakahikire aha ruteerane oru kugira ngu boona babaase kuza omu kicweka ky’okubuuriramu ahonaaho.

¹¹ Kandi ni kikuru kutebeekanisa kuhika aha mwanya gw’oruteerane rw’okwetebeekanisa kuza kubuurira rutakatandikire. N’eky’amazima, nituteeraho kukwata obwire bw’enteerane zoona. Kwonka, nitubaasa kuteganisa abandi twaija tukyerereirwe aha ruteerane rw’okwetebeekanisa kuza kubuurira. Mu muringo ki? Orikwebembera oruteerane oru naateekateeka aha nshonga zitari zimwe yaaba naaza kwebembera guruupu. Haaba hariho ababuurizi bakye, naabaasa kucwamu kubohereza boona omu kicweka ekyabaire kitahwire. Abamwe baaba baagyenda orugyendo ruraingwa kuza aha mwanya gw’okugiriramu oruteerane rw’okubuurira kandi obwo ekicweka ky’okubuuriramu kiri hare, nibabaasa kugyenda n’oine emotoka. Ekicweka kyaba kirimu abarikuhenda ebiragiro baingi, naabaasa kugaba ab’eishe-emwe na banyaanyazi-itwe kukora hamwe nari ab’eishe-emwe kukorera haihi na banyaanyazi-itwe. Ababuurizi abataine maani naabaasa kubagambira kukora aha ruguuto nari amaju agataine matembezo maingi. Ababuurizi abakiri basya omu mazima nibabaasa kubuurira n’abamazire obwire buraingwa nibabuurira. Kwonka, baija bakyerereirwe, nihaba haine kukorwa empindahinduka kugira ngu nabo batungye ab’okubuurira nabo. Obumwe, nihabaasa kubaho ekyatureetera kukyerererwa. Kwonka, twaba twine omuze gw’okukyerererwa, nitubaasa kwebuuza yaaba tutarikusiima enteerane ezo nari tutarikwetebeekanisa omu bwire.

12. Waaba nookira kwekorera entebeekanisa n’ou oraabuurire nawe, ni kirungi kukora ki?

¹² Ababuurizi abarikuba nibaza kubuurira nibabaasa kukora entebeekanisa kugira ou baabuurira nawe oruteerane oru rutakatandikire, nari nibabaasa kuheebwa ou baraakore nawe. Waaba nookira kukora entebeekanisa n’ou oraabuurire nawe, noobaasa ‘kushashaanuka’ obuurire n’abandi omu mwanya gw’okuguma noobuurira na banywani baawe bonka. (2 Kor. 6: 11-13) Noobaasa kukora entebeekanisa kugira ngu obumwe obuurire n’omubuurizi omusya kumuhwera kwongyera kubuurira gye? (1 Kor. 10:24; 1 Tim. 4:13, 15) Hurikiza gye obuhabuzi obu oraaheebwe, otwariiremu n’oburikukwata ahu murikuza kutandikira kubuurira. Oruteerane rwahwa, yetantare kweziringa hamwe n’okuhindahindura entebeekanisa ezakorwa.

13. Boona abarikuba bari omu nteerane ezi baahikiiriza gye ebi bashemereire kukora, nizitugasira zita?

¹³ Bwanyima y’okubuurira, entumwa 70 abu Yesu yaatebeekaniise kuza kubuurira ‘bakagaruka n’okushemererwa.’ (Luk. 10:17) Hatariho kubanganisa, oruteerane oru Yesu yaagizire nabo batakagiire kubuurira rukabahwera kutunga ebirungi omu kubuurira. N’omu bunaku obu, enteerane z’okwetebeekanisa kuza kubuurira nizituhwera omu muringo nigwo gumwe. Boona abarikuba bari omu nteerane ezi baahikiiriza gye ebi bashemereire kukora, enteerane ezo nizigaruramu amaani, zitutendeka, kandi zitutebeekanisa kuhikiiriza omurimo gwaitu gw’okubuurira omu “mahanga goona.”​—Mat. 24:14.