Kampeyini y’Okweta Abantu aha Kiijutsyo Kutandika Maaci 17
1. Ni kampeyini ki eraatandike Maaci 17?
1 Ku turikuza aha Kiijutsyo buri mwaka, nitworeka ngu nitwijuka okufa kwa Yesu. (1 Kor. 11:26) N’ahabw’ekyo, nitwenda ngu n’abandi babe naitwe kandi bahurire ebirikukwata aha kitambo eki Yehova yaahaireyo ahabwa rukundo. (Yoh. 3:16) Omwaka ogu kampeyini y’okweta abantu aha Kiijutsyo neeza kutandika aha Rwamukaaga, Maaci 17. Oine ekihika ky’okugyejumbiramu kimwe?
2. Nitubaasa kugaba tuta akapapura k’okweta abantu aha Kiijutsyo?
2 Ebi Turikubaasa Kugamba: Ni kirungi kukoresa nyanjura ngufu. Nitubaasa kuramutsya omuntu reero tugire tuti: “Iwe n’ab’eka yaanyu nitwenda kubaha akapapura aka ak’okubeeta aha mukoro mukuru omu mwaka, ogurikuza kubaho omu nsi yoona Apuri 5. Orubazo kuruga omu Baibuli nirwija kuheebwa kworeka eki okufa kwa Yesu kwabaasiise kubaho n’eki ariyo naakora hati. Akapapura aka kariho eshaaha n’omwanya ahu Ekiijutsyo kiraabe omu kicweka kyaitu.” Mwaba nimugaba obupapura obwo omu wiikenda nimubaasa kubugaba na zaamagaziini kyaba nikibaasika.
3. Nitubaasa kweta tuta abantu baingi aha Kiijutsyo?
3 Yeta Abantu Baingi: Nitwenda kweta abantu baingi munonga. N’ahabw’ekyo, teeraho kweta abeegi baawe ba Baibuli, abanyabuzaare, abu orikukora nabo, abu orikushoma nabo, abataahi n’abanywani baawe. Abareeberezi nibaija kubagambira oku muraakagabe omu kicweka kyanyu. Buri mwaka, kampeyini y’okweta abantu aha Kiijutsyo neerugamu ebirungi. Omwaka oguhweire, omukazi omwe ku yaizire aha Kiijutsyo, owaabaire naayakiira abagyenyi akenda kumuhwera kusherura omubuurizi owaamwetsire. Kwonka omukazi ogwo amugira ngu tihaine ou arikumanya beitu ngu owaamweta yaaba naabuurira enju aha nju.
4. Ahabw’enki tushemereire kwejumbira kimwe omu kampeyini?
4 Obundi omu baraije aha Kiijutsyo nihabaasa kubamu ou oyetsire. Abu oraayete yaaba baija aha Kiijutsyo nari banga, obupapura obu oraagabe nibwija kubahwera kumanya ngu Yesu hati naategyeka nk’Omugabe. Okwejumba kwawe omu kampeyini egi n’omujinya nikwija kworeka abu orikubuurira, ababuurizi bagyenzi baawe na munonga Yehova ngu noosiimira kimwe ekitambo.—Kol. 3:15.