Fayo Kubuurira Abantu Boona
1. Paulo akataho ky’okureeberaho ki kirungi omu kubuurira?
1 “Ohikize kimwe okuheereza kwawe.” (2 Tim. 4:5) Paulo akabaasa kuha Timoseo obuhabuzi obwo ahakuba nawe nikwo yaabaire naakora. Nk’eky’okureeberaho, kuruga omuri 47 kuhika 56 C.E., Paulo akaheza engyendo ishatu z’obumiisani. Ekitabo kya Ebyakozirwe emirundi mingi nikyoreeka ngu Paulo akaba naafayo kubuurira abantu. (Byak. 23:11; 28:23) Mbwenu shi obunaku obu nitubaasa kukikora tuta?
2. Nitubaasa kufayo tuta kubuurira abantu boona twaba nitubuurira enju aha nju?
2 Enju aha Nju: Okubaasa kubuurira abantu abatakahurirahoga amakuru marungi, nikibaasa kutwetengyesa kubuurira omu bwire butari bumwe na bumwe. Kubaasa kubuurira baanyineeka, obumwe nikiba nikyetengyesa ngu tubuurire omu mwabazyo nari omu wikeenda. Tushemereire kufayo kugira ou twabuurira aha buri nju, turikuteeraho kuguma nitugarukayo aha maju ogu tutashangiremu abantu. Kwonka shi ku waakuguma noozayo otarikubashangayo? Okubahandiikira ebaruha nari okubateerera esimu nikibaasa kurugamu ebirungi.
3. Ni ryari obu turikubaasa kubuurira kitaraariire n’omu myanya erimu abantu baingi?
3 Okubuurira Kitaraariire n’Omu Myanya Erimu Abantu Baingi: Abaheereza ba Yehova nibahwera abantu boona abu barikubuurira kutunga ‘obwengye’ obuhikire. Obumwe nibabuurira “omu nguuto” nari “omu butare.” (Enf. 1:20, 21) Twaba nitukora emirimo yaitu ya butoosha, nitufayo kubuurira kitaraariire? Mbwenu shi nitwemarira aha kubuurira ekigambo? (Byak. 18:5) Ku kiraabe nikwo kiri, nituba nituhikiiriza obujunaanizibwa bwaitu obw’okubuurira abantu boona.—Byak. 10:42; 17:17; 20:20, 21, 24.
4. Okushaba n’okuteekateeka munonga nibituhwera bita kufayo kubuurira abantu boona?
4 Kwonka obumwe nitubaasa kutiina kubuurira ahabw’obweremwa obu twine nari ahabw’okugira enshoni. Buzima, Yehova naamanya ebi turikubaasa n’ebi tutarikubaasa. (Zab. 103:14) N’ahabw’ekyo omu mbeera nk’ezo, nitubaasa kumushaba kutuha obumanzi bw’okubuurira. (Byak. 4:29, 31) Kandi twaba nitweshomesa Baibuli turikuteekateeka n’aha biri omu Kigambo kya Ruhanga, nitubaasa kwongyera kusiima obukuru bw’okumanya amakuru marungi. (Fil. 3:8) Eki nikiija kutuhiga kugabuurira twine obweziriki.
5. Nitubaasa kwejumba tuta omu kuhikiiriza obunabi oburi omu Yoeli?
5 Obunabi oburi omu Yoeli nibworeka ngu ekiro kikuru kya Yehova kitakahikire, abaheereza be nibaija kugumizamu nibabuurira batarikwikiriza kintu kyona kubaremesa. (Yoel. 2:2, 7-9) Ka tuteereho kwejumbira kimwe omu murimo ogu omukuru!