Oku Omuhangi Arikutumanyisa Ebiraganiso bye Ebya Rukundo

Kuruga aha kuhangwa, Omuhangi waitu atwire naahurizana n’abantu kurabira omuri baamaraika na baanabi. Okwongyera ahari ekyo, akacwamu ngu obutumwa bwe n’emigisha ei arikuraganisa abantu biteebwe omu buhandiikye. Ebiraganiso ebi ebirikuruga ahari Ruhanga nibikwata aha biro byawe by’omumaisho. Mbwenu shi ebi Ruhanga arikuraganisa nibibaasa kushangwa nkahi obunaku obu?

Obutumwa obu Ruhanga atuhaire buri omu Byahandiikirwe Ebirikwera. (2 Timoseo 3:16) Ruhanga akakoresa ata baanabi kuhandiika obutumwa bwe? (2 Petero 1:21) Ruhanga akaha abahandiiki ebiteekateeko bye, nabo baabihandiika. Nikyo kimwe n’obunaku obu. Omushuubuzi yaakoresa karaani we kuhandiika obutumwa, nabwo nituba nitumanya ngu omushuubuzi ogwo niwe mukama w’obutumwa. Omu muringo nigwo gumwe, n’obu Ruhanga araabe yaakoreise abashaija kuhandiika obutumwa bwe, niwe Mukama w’Ebyahandiikirwe Ebirikwera.

EKIGAMBO KYA RUHANGA KIJANJAIRE BURI HAMWE

Obutumwa bwa Ruhanga ni bukuru munonga kugira ngu naayenda ngu abantu boona babushome kandi babwetegyereze. Obunaku obu amakuru marungi ‘ag’ebiro n’ebiro’ gajanjaire omu ‘mahanga goona, n’enganda zoona, n’endimi, n’abantu.’ (Okushuuruurwa 14:6) Ahabw’omugisha gwa Ruhanga, Ebyahandiikirwe Ebirikwera biriho omu bicweka nari byona omu ndimi ezirikurenga 3,000, kukira ekitabo ekindi kyona omu nsi.