Guma Nooshaba Kubaasa Kusiimwa Ruhanga

Ruhanga akaha abantu ekiconco ky’omutaano, nikwo okubaasa kw’okuhurizana nawe n’okumugambira oku barikwehurira kurabira omu kushaba. Nabi Daudi akashaba ati: ‘Iwe orikuhurira okushaba, abantu boona nibaija ah’ori.’ (Zaaburi 65:2) Twine kushaba tuta Ruhanga kubaasa kutuhurira kandi akatuha emigisha?

SHABA OMU BUCUREEZI KURUGA AHA MUTIMA

Omu kushaba noobaasa kugambira Ruhanga byona ebiri omu mutima, kworeka enyehurira zaawe zenyini. (Zaaburi 62:8) Ow’obushoboorozi Bwona naasiima okushaba okushemeire kuruga aha mutima.

SHABA RUHANGA ORIKUKORESA EIZIINA RYE

N’obu Ruhanga araabe aine ebitiinisa bingi, kwonka aine eiziina rimwe ryonka. “Ndi [Yehova], eryo niryo eiziina ryangye.” (Isaaya 42:8) Eiziina Yehova riri omu Byahandiikirwe Ebirikwera emirundi nka 7,000. Baanabi baingi bakaba nibagamba ahari Ruhanga barikukoresa eiziina rye. Abrahamu akagira ati: ‘[Yehova] reka, ngarukye ngambe’ naiwe. (Okutandika 18:30) Naitwe tushemereire kukoresa eiziina rya Ruhanga Yehova, twaba nitushaba.

SHABA OMU RURIMI RWAWE

Ruhanga naayetegyereza ebiteekateeko byaitu n’enyehurira zaitu omu rurimi rwona oru turikugamba. Ekigambo kye nikituhamiza kiti: ‘Ruhanga tarikushoroora mu bantu, kureka omu mahanga goona orikumutiina, akakora eby’okuhikiirira, ogwo niwe arikusiimwa.’​—Ebyakozirwe 10:34, 35.

Kwonka, Ruhanga kubaasa kutuha emigisha ye, twine kukora ekirikukira aha kumushaba. Omu kicweka ekirikukurataho, nituza kushwijuma eki twine kukora.