Ebijuriziibwe omu Katabo k’Obuheereza Bwaitu n’Oku Turikutwaza
NOVEMBA 4-10
EBY’OMUHENDO EBIRI OMU KIGAMBO KYA RUHANGA | 1 YOHAANA 1-5
“Mutarikunda Ensi N’obu Byakuba Ebintu Ebigirimu”
(1 Yohaana 2:15, 16) Mutarikunda ensi n’obu byakuba ebintu ebigirimu. Omuntu weena ku akunda ensi, okukunda Isheboona kuba kutamurimu. 16 Ahakuba byona eby’omu nsi, ebi omubiri gwetenga, n’ebi amaisho geetenga, n’okwehimbisa ahabw’eby’amagara aga, tibiruga hari Isheboona, kureka biruga omu nsi egi.
w05-E 1/1 10 kacw. 13
Tooreza Eky’okureeberaho kya Yesu
Bamwe nibabaasa kuteekateeka ngu bimwe aha bintu ebiri omu nsi ti bibi. N’obu kiraabe kiri kityo, ensi n’ebintu ebigirimu nibibaasa kutuhuzya turemwe kuheereza Yehova. Kandi tihaine kintu na kimwe ekiri omu nsi ekirikubaasa kutureetera kwirira haihi na Ruhanga. N’ahabw’ekyo, twakunda ebintu by’ensi, n’obu ebimwe birikubaasa kuba bitari bibi, nituba turi omu kabi. (1 Timoseo 6:9, 10) Oyihireho ekyo, bingi ebiri omu nsi ni bibi kandi nibibaasa kutushiisha. Twaguma nitureeba vidiyo nari puroguraamu z’aha tiivi ezirimu eby’obushaarizi, eby’obutungi nari eby’obushambani, nitubaasa kutandika kubireeba nk’ebitari bibi kandi nibibaasa kutushendashenda. Twayejwanzya n’abantu abarikwebembeza eby’obutungi nari abarikuta omutima munonga aha bya bizinesi, naitwe nitubaasa kutandika kubireeba nka bikuru.—Matayo 6:24; 1 Abakorinso 15:33.
(1 Yohaana 2:17) Kandi ensi egi neehwaho n’okwetenga kwayo; kwonka okora ebi Ruhanga akunda, agumaho ebiro byona.
Oshemereire Kuba Muntu Wa Muringo Ki?
Ekindi ekiraatuhwere kwerinda ‘ebintu ebiri omu nsi’ n’okuguma nitwijuka ebigambo bya Yohaana ebi: “Ensi egi neehwaho n’okwetenga kwayo; kwonka okora ebi Ruhanga akunda, agumaho ebiro byona.” (1 Yohaana 2:17) Ensi ya Sitaane neereebeka nk’eraagumeho ebiro byona. Kwonka izooba rimwe neija kuhwaho. Okuguma nitwijuka ngu ensi egi teine eki erikubaasa kutuha eky’obutwire, nikiija kutuhwera kwerinda emitego ya Sitaane.
Okwongyera Kucondooza aha Bi Turikwega
(1 Yohaana 2:7, 8) Abarikukundwa, tindikubahandiikira kiragiro kisya, kureka ekya ira, eki mwabaire mwine okwiha iranaira; ekiragiro ekyo ekya ira nikyo kigambo eki mwahuriire. 8 Kwonka kandi nimbahandiikira ekiragiro kisya, kandi eky’amazima omuriwe n’omuriimwe, ahakuba omwirima niguhwaho, kandi n’omushana ogw’amazima gwajwire.
Ebi Yehova Arikutwijutsya N’eby’okwesigwa
Ebyahandiikirwe eby’Orugriika birimu obuhabuzi bwingi oburikutuhiga kugirirana rukundo. Yesu akagira ngu “kunda mutaahi waawe nk’oku oyekunda,” nikyo kiragiro kya kabiri ekikuru. (Mat. 22:39) Na Yakobo mwene ishe Yesu akagira ngu rukundo ‘n’ekiragiro kya Mukama.’ (Yak. 2:8) Entumwa Yohaana nawe akagira ati: “Abarikukundwa, tindikubahandiikira kiragiro kisya, kureka ekya ira, eki mwabaire mwine okwiha iranaira.” (1 Yoh. 2:7, 8) Yohaana akaba naagamba ahari ki obu yaagamba aha ‘kiragiro ekya ira’? Akaba naagamba aha kiragiro ky’okukunda. Kikaba kiri “ekya ira” ahabw’okugira ngu Yesu akaba yaakigambireho “okwiha iranaira.” Kwonka kikaba kiri “kisya” ahabw’okugira ngu kikaba nikyetengyesa rukundo y’okwefeerereza, ei abakuratsi be baabaire nibaija kwetenga haabaho embeera nsya. Nk’abakuratsi ba Kristo, nitusiima okurabura okurikutuhwera kwetantara okweyendeza okuri omu nsi egi, okurikubaasa kuturemesa kukunda abataahi?
(1 Yohaana 5:16, 17) Omuntu weena ku araareebe mugyenzi we naakora ekibi ekitari ky’okumwitsa, ashabe, kandi Ruhanga aryamuha amagara ahabw’abo abakozire ekibi ekitari ky’okubaitsa. Hariho ekibi ekirikwitsa; ekyo tindikugira ngu, aryakyeshengyerereza. 17 Ekitari ky’okuhikiirira kyona kiba ekibi; kwonka hariho ekibi ekitari ky’okwitsa.
it-1-E 862 kacw. 5
Okusaasira
Ni kirungi kushaba Ruhanga kusaasira abandi, nangwa n’ekibiina kyona. Ekyo nikyo Musa yaakoreire eihanga rya Israeli, arikugamba ebibi byabo kandi arikushaba okusaasirwa, kandi Yehova akahurira okushaba kwe. (Kub 14:19, 20) Na Sulemaani, obu yaabaire naahayo hekalu, akashaba ngu Yehova asaasire abaheereza be abaabaire basiisire kwonka baketeisa bakarekyera aho kukora ebibi. (1Bag 8:30, 33-40, 46-52) Ezera akajwekyera Abayudaaya arikwatura ebibi byabo omu kushaba. Okushaba kwe n’okweshengyereza bikareetera abantu kugira eki baakora kugira ngu Yehova abaase kubasaasira. (Ezr 9:13–10:4, 10-19, 44) Yakobo akahiga weena orwaire omu by’omwoyo kugambira abareeberezi omu kibiina kumushabira, kandi “ku araabe aine ebibi ebi akozire, aryabisaasirwa.” (Yak 5:14-16) Kwonka, hariho “ekibi ekirikwitsa,” okushiisha aha mwoyo gurikwera, n’okushiisha nkana okutariho kusaasirwa. Omukristaayo tashemereire kushabira abarikushiisha omu muringo ogwo.—1Yoh 5:16; Mat 12:31; Heb 10:26, 27; reeba EKIBI, I; OMWOYO.
NOVEMBA 11-17
EBY’OMUHENDO EBIRI OMU KIGAMBO KYA RUHANGA | 2 YOHAANA 1–YUDA
“Twine Kurwana Kuguma omu Mazima”
(Yuda 3) Abarikukundwa, ku naabaire niinyezirika munonga kubahandiikira eby’okujunwa kwaitu twena, nkagyemwa kubahandiikira nimbeehanangiriza kurwanira munonga okwikiriza oku abarikwera baahairwe rimwe kikahwa.
w04-E 9/15 11-12 kacw. 8-9
“Mube Abahamire Omuri Mukama”
Nitumanya obukoryo bwa Sitaane ahakuba Ebyahandiikirwe nibitworeka obukoryo bwe. (2 Abakorinso 2:11) Omuregi obu yaabaire naarwanisa Yobu omushaija owaabaire ahikiriire, akakoresa oburemeezi bw’eby’entaatsya, okufeerwa ab’omu ka ye, okuhiiganisibwa ab’omu ka ye, okurwara, n’abanywani be okumucwera orubanja. Yobu akagira obusaasi bwingi kandi akateekateeka ngu Ruhanga akaba amutsigireho. (Yob 10:1, 2) N’obu Sitaane araabe atarikutuhitsyaho oburemeezi nk’obwo butunu hati, Abakristaayo baingi nibatunga oburemeezi, kandi Omuregi naabaasa kukoresa oburemeezi obwo kuhikiiriza ebigyendererwa bye.
Ebintu eby’akabi aha by’omwoyo byeyongyeire munonga omu biro ebi eby’emperu. Turi omu nsi erikwebembeza okusherura eby’obutungi omu mwanya gw’okwebembeza ebigyendererwa by’omwoyo. Eby’empurizana nibyoreka ngu okwejumba omu bushambani nikureeta okushemererwa kwonka nikureeta obusaasi. Kandi abantu abaingi ‘nibakunda kweshemeza bonka okukira Ruhanga.’ (2 Timoseo 3:1-5) Twaba ‘tutarwanireire munonga okwikiriza’ emiteekateekyere y’ensi neija kutumaramu amaani omu by’omwoyo.—Yuda 3.
Okwongyera Kucondooza aha Bi Turikwega
(Yuda 21) Mwerindire omu kukunda kwa Ruhanga; mutegyereze okusaasira kwa Mukama waitu Yesu Kristo, okurikubahitsya omu magara agatahwaho.
lv 5-6 kacw. 3
“Eki Nikyo Okukunda Ruhanga Kirikumanyisa”
Yehova naayenda ngu tugasirwe omuri rukundo ye ebiro byona. Kwonka okugasirwa omuri rukundo ye n’okutagigasirwamu, kiri ahariitwe. Ekigambo kya Ruhanga nikituhiga kiti: “Mwerindire omu kukunda kwa Ruhanga” mwine amatsiko g’amagara agatahwaho. (Yuda 21) Ekigambo “mwerindire” nikyoreka ngu okubaasa kuguma omu kukunda kwa Ruhanga, haine eki twine kukora. Twine kworeka omu bikorwa ngu buzima nitumukunda. N’ahabw’ekyo ekibuuzo kikuru eki twine kwebuuza n’eki: ‘Nimbaasa kworeka nta ngu ninkunda Ruhanga?’ Eky’okugarukamu nikishangwa omu bigambo bya Ruhanga ebyahandiikirwe entumwa Yohaana: ‘Eki nikyo okukunda Ruhanga kirikumanyisa, itwe okworobera ebiragiro bye; kandi ebiragiro bye tibirusya.’ (1 Yohaana 5:3) Tushemereire kushwijuma amakuru g’ebigambo ebi, ahakuba nitwenda kworeka Ruhanga waitu rukundo mpango ei tumwiniire.
(Yuda 14, 15) Kandi abo nibo Enoka, owa mushanju okuruga ahari Adamu, yaaragwireho ati: Reeba, Mukama akaija n’abarikwera be obukumi n’obukumi, 15 okucwera boona orubanja, n’okurusingisa boona abatatiina Ruhanga ahabw’eby’okutamutiina ebi baakozire bakamucumuraho, kandi n’ebigambo ebigumire byona ebi abasiisi abatatiina Ruhanga baamugambireho nibamurwanisa.”
wp17.1-E 12 kacw. 1
‘Akashemeza Ruhanga’
Enoka akagamba bunabi ki? Bukaba nibugira buti: “Reeba, Mukama akaija n’abarikwera be obukumi n’obukumi, okucwera boona orubanja, n’okurusingisa boona abatatiina Ruhanga ahabw’eby’okutamutiina ebi baakozire bakamucumuraho, kandi n’ebigambo ebigumire byona ebi abasiisi abatatiina Ruhanga baamugambireho nibamurwanisa.” (Yuda 14, 15) Ekintu eki orikubaasa kubanza kwetegyereza n’okugira ngu Enoka akaba naagamba nk’ebyabaireho ira, orikushusha oti Ruhanga akaba yaaherize kukora ebyabaire nibigambwaho omu bunabi. Kandi obunabi bwingi obwakuratsireho bukaba nibugambwaho omu muringo nk’ogwo. Enshonga n’egi: Ahabw’okugira ngu nabi ogwo akaba naahamiza kimwe ngu ekintu ekyo nikiija kubaho, akakigambaho nk’ekyaherize kubaho!—Isaaya 46:10.
wp17.1-E 12 kacw. 3
‘Akashemeza Ruhanga’
Okwikiriza kwa Enoka nikubaasa kutuhiga kwebuuza yaaba nitureeba ensi egi nk’oku Ruhanga arikugireeba. Okucwa orubanja oku Enoka yaagambireho nikukwata n’aha bantu b’obunaku obu; nikukwata aha bunaku obu turimu nk’oku kyabaire kiri omu bwire bwa Enoka. Okuhikaana n’okurabura oku Enoka yaagambire, Yehova akareeta omwegyemure aha bantu abaabaire batarikumutiina omu bwire bwa Noa. Kwonka okucwekyereza okwo nikworeka okucwekyereza kw’amaani okurikwija kubaho. (Matayo 24:38, 39; 2 Petero 2:4-6) N’omu bunaku obu, Ruhanga ayeteekateekire na baamaraika be nyamwingi kucwera abatarikutiina Ruhanga orubanja. Buri omwe ahariitwe ashemereire kuta omutima aha kurabura kwa Enoka kandi akagambira n’abandi. Ab’omu ka yaitu na banywani baitu nibabaasa kutatushagika. Obumwe nitubaasa kugira ihamba. Kwonka Yehova taratsigireho Enoka; kandi tarikwija kutsigaho abaheereza be abeesigwa obunaku obu!
NOVEMBA 18-24
EBY’OMUHENDO EBIRI OMU KIGAMBO KYA RUHANGA | OKUSHUURUURWA 1-3
“Nimmanya Ebi Orikukora”
(Okushuuruurwa 1:20) Amakuru g’enyonyoozi mushaija ezi waareeba omu mukono gwangye gwa buryo, kandi n’ebikondo by’etabaaza mushanju eby’ezaabu, ezo nyonyoozi mushanju nibo baamaraika b’ago makanisa mushanju, kandi ebyo bikondo by’etabaaza mushanju nigo makanisa mushanju.
w12-E 10/15 14 kacw. 8
Nooyoreka Mwoyo gwa Muringo Ki?
Kubaasa kwetantara omwoyo nk’ogwo, nitubaasa kwijuka ngu Yesu naagambwaho omu Baibuli nk’okwaitse ‘omu mukono gwe gwa buryo enyonyoozi mushanju.’ “Enyonyoozi” nizijwekyera abashukirweho amajuta, hamwe n’abareeberezi boona omu kibiina. Yesu naabaasa kwebembera “enyonyoozi” eziri omu mukono gwe omu muringo ogu arikureeba ngu guhikire. (Kush. 1:16, 20) N’ahabw’ekyo, Yesu nk’Omutwe gw’ekibiina Ekikristaayo, aine obushoboorozi bwona aha bukiiko bw’abareeberezi. Omwe aha bareeberezi yaaba aine kuhaburwa, oine ‘amaisho agari nk’endimi z’omuriro’ naija kuhamya ngu eki kyakorwa omu bwire Bwe obuhikire kandi omu muringo oguhikire. (Kush. 1:14) Kwonka ekyo kyaba kitakabaireho, nituguma nituha ekitiinisa abo abatoorainwe omwoyo gurikwera, ahakuba Paulo akahandiika ati: “Muhurire abeebembezi baanyu, muboorobere; ahakuba nibo barinda amagara gaanyu, nk’abarikumanya ngu baryagabuuzibwa. Nabo babone kukora ekyo bashemereirwe, batagwirwe kubi; ahakuba ekyo naimwe tikikaabagasira.”—Heb. 13:17.
(Okushuuruurwa 2:1, 2) “Handikira maraika w’ekanisa ey’omuri Efeso, oti: Ebi nibyo bigambo by’Ogwo okwaitse enyonyoozi mushanju omu mukono gwe gwa buryo, kandi ogyenda naataayaayira ebikondo by’etabaaza mushanju eby’ezaabu. 2 Ati: Nimmanya ebi orikukora, okwezirika kwawe, n’okugumisiriza kwawe; kandi nimmanya ku otabaasa kugumisiririza abantu babi, kandi ku waayetegyereize abeeyeta entumwa, haza batari bo, okashanga bari ab’ebishuba.
w12-E 4/15 29 kacw. 11
Yehova Naaturinda ngu Tubaase Kucungurwa
Okworekwa okuri omu Okushuuruurwa eshuura 2 na 3, nikworeka ngu Omugabe Yesu Kristo akaba naamanya buri kimwe ekyabaire nikikorwa omu bibiina mushanju ebyabaire biri omu Asia. Okworekwa okwo nikworeka ngu Kristo naamanya ebirikukwata aha bibiina byona n’aha bantu ababirimu. Omu mbeera ezimwe, akagamba n’amaziina g’abantu, kandi ebibiina byona akabisiima, nari akabiha obuhabuzi nk’oku kyabaire nikyetengyesa. Ekyo nikyoreka ki? Omu kuhikiirira kw’okworeka okwo, ebibiina mushanju nibijwekyera Abakristaayo abashukirweho amajuta bwanyima ya 1914, kandi obuhabuzi obu yaahaire ebibiina mushanju nibukwata aha bibiina byona eby’abaheereza ba Ruhanga ebiri omu nsi yoona omu bunaku obu. N’ahabw’ekyo, kihikire kugira ngu Yehova naayebembera abaheereza be arikukoresa Omwana we. Nitubaasa kugasirwa tuta omu buhabuzi obwo?
w01-E 1/15 20-21 kacw. 20
Kuratira Entebeekanisa y’Ekibiina kya Yehova
Okukuratira entebeekanisa y’ekibiina kya Yehova nikitwetengyesa kumanya obujunaanizibwa obu Ruhanga yaahaire Yesu Kristo ‘nk’omutwe gw’ekibiina.’ (Abaefeso 5:22, 23) Ekindi ekikuru kiri omu Isaaya 55:4, aharikugira hati: “Reeba, mmugizire kareebi aha mahanga kuhamya ebyangye, kuba omwebembezi kandi omutegyeki waago.” Hatariho kubangaanisa Yesu naamanya kwebembera. Naamanya entaama ze n’ebikorwa byazo. Kandi, obu yaashwijuma ebibiina mushanju ebyabaire biri omu Asia, emirundi etaano akagira ati: “Nimmanya emirimo yaawe.” (Okushuuruurwa 2:2, 19; 3:1, 8, 15) Yesu naamanya ebyetengo byaitu nk’oku Ishe, Yehova arikubimanya. Obu Yesu yaabaire atakagambire okushaba kw’eky’okureeberaho, akagira ati: “Ahakuba Shoimwe amanya ebi mukyenire mutakamushabire.”—Matayo 6:8-13.
Okwongyera Kucondooza aha Bi Turikwega
(Okushuuruurwa 1:7) Reeba, naija n’ebicu, kandi eriisho ryona riryamureeba, n’abo abaamucumitsire; n’enganda zoona ez’omu nsi ziryaborooga ahabw’okwija kwe. Eego, Amiina.
kr-E 226 kacw. 10
Obukama bwa Ruhanga Nibwija Kwihaho Abazigu Baabwo
Obutumwa bw’okucwa orubanja. Abazigu boona ab’Obukama bwa Ruhanga nibaija kureeba ebiraabeho ebiraabareetere kwongyera kugira obusaasi. Yesu akagira ati: “Nibwo barireeba Omwana w’omuntu naizira omu bicu, aine amaani maingi n’ekitiinisa.” (Mako 13:26) Ekintu eki ekirikutangaaza ekirikworeka amaani nikiija kuba akamanyiso ngu obwire bwa Yesu bw’okucwa orubanja buhikire. Omu kicweka ekindi eky’obunabi obu oburikukwata aha biro by’emperu, Yesu akagamba ebirikukwata aha kucwa orubanja omu bwijwire okw’abaabaire nikwija kubaho omu bunaku obu. Ebi yaagambireho nitubishanga omu nfumu y’entaama n’embuzi. (Shoma Matayo 25:31-33, 46.) Abarikushagika Obukama bwa Ruhanga nibaija kushoroorwa ‘nk’entaama’ kandi nibaija ‘kwimutsya emitwe yaabo,’ barikumanya ngu ‘okucungurwa kwabo kuri haihi.’ (Luka 21:28) Kwonka abarikuhakanisa Obukama nibaija kushoroorwa ‘nk’embuzi’ kandi nibaija ‘kucura,’ barikumanya ngu nibaija kucwekyerezibwa.—Mat. 24:30; Kush. 1:7.
(Okushuuruurwa 2:7) Oine amatu ahurire eki Omwoyo arikugambira amakanisa. Orikusingura ndyamwikiriza kurya aha muti gw’amagara, oguri omuri Paradiso ya Ruhanga.
w09-E 1/15 31 kacw. 1
Ebi Turikwega Kuruga omu Kitabo kya Okushuuruurwa—I
2:7—“Paradiso ya Ruhanga” n’eha? Obu ebigambo ebi byahandiikirwe Abakristaayo abashukirweho amajuta, paradiso neebaasa kuba eri paradiso ey’omu iguru—ahu Ruhanga arikutuura. Abashukirweho amajuta abeesigwa nibaija kutunga omugisha gw’okurya aha “muti gw’amagara.” Nibaija kutunga okutafa.—1 Kor. 15:53.
NOVEMBA 25–DESEMBA 1
EBY’OMUHENDO EBIRI OMU KIGAMBO KYA RUHANGA | OKUSHUURUURWA 4-6
“Abavugi Bana b’Embaraasi”
(Okushuuruurwa 6:2) Ku naimukize amaisho, naareeba embaraasi erikwera, kandi owaabaire agishutamiho akaba aine obuta; yaaheebwa ekirunga, yaagyenda naasingura omu kurwana ngu abone kusingurira kimwe.
wp17.3-E 4 kacw. 3
Abavugi Bana b’Embaraasi—Ni Baahi?
Omuvugi w’embaraasi erikwera n’oha? Ekirikutuhwera kumumanya nikishangwa omu kitabo nikyo kimwe ekya Okushuuruurwa, ekirikugaruka kikagamba aha muvugi ogu ngu ni “Kigambo kya Ruhanga.” (Okushuuruurwa 19:11-13) Yesu Kristo naayetwa Kigambo, ahakuba akakora nk’omugambirizi wa Ruhanga. (Yohaana 1:1, 14) Okwongyera ahari ekyo, naayetwa “Omugabe w’abagabe, kandi Omukama w’abakama” kandi naagambwaho ‘nk’Omwesigwa kandi ow’Amazima.’ (Okushuuruurwa 19:16) Buzima, aine obushoboorozi bw’okuba Omugabe, kandi tarikubaasa kukoresa amaani ge omu muringo gwona ogutahikire nari omubi. Kwonka, nihabaasa kubaho ebibuuzo.
wp17.3-E 4 kacw. 5
Abavugi Bana b’Embaraasi—Ni Baahi?
Abavugi b’embaraasi bakatandika kuvuga ryari? Yetegyereze ngu omuvugi w’okubanza, Yesu, akatandika kuvuga obu yaatunga ekirunga. (Okushuuruurwa 6:2) Ni ryari obu Yesu yaateebwaho nk’Omugabe omu iguru? Bukaba butari obu yaagaruka omu iguru bwanyima y’okufa akazooka. Baibuli neeyoreka ngu okwiha obwo akaba atuura ategyereize. (Abaheburaayo 10:12, 13) Yesu akahwera abakuratsi be kumanya obu obwire bw’okutegyereza bwabaire nibwija kuhendera reero akatandika kutegyeka nk’Omugabe omu iguru. Akagira ngu ku araatandike kutegyeka, embeera omu nsi zikaba niziija kwongyera kuba mbi. Hakaba nihaija kubaho entaro, enjara, n’endwara. (Matayo 24:3, 7; Luka 21:10, 11) Ahonaaho ku hatandikireho Orutaro rw’Ensi Yoona orwa I omuri 1914, kikamanywa butunu ngu hakatandikaho ebiro bigumire omu nsi ebi Baibuli erikweta ‘ebiro by’aha mperu.’—2 Timoseo 3:1-5.
(Okushuuruurwa 6:4-6) Haarugayo embaraasi endiijo erikutukura; owaabaire agishutamiho yaikirizibwa kwiha obusingye omu nsi, ngu abantu baitane; kandi yaaheebwa rurara mpango. 5 Ku yaabambwire akamanyiso ka kashatu, naahurira ekihangirwe ekya kashatu nikigira kiti: Ija! Ku naimukize amaisho, naareeba embaraasi erikwiragura; kandi owaabaire agishutamiho akaba aine eminzaani omu ngaro ze; 6 naahurira nk’eiraka ahagati y’ebihangirwe ebiine amagara ebina, nirigira riti: Endengo y’engano y’edenaari, n’endengo ishatu za sayiri z’edenaari; kwonka amajuta na viinyo otabishiisha.”
wp17.3-E 5 kacw. 2
Abavugi Bana b’Embaraasi—Ni Baahi?
Omuvugi ogu naajwekyera entaro. Yetegyereze ngu naiha obusingye omu nsi yoona. Omuri 1914, hakabaho orutaro rw’ensi yoona, ekyabaire kitakabahoga omu byafaayo. Hakagaruka habaho orutaro rw’ensi yoona orwa kabiri, orwaacwekyereize abantu baingi n’ebintu bingi. Abamwe nibatebereeza ngu omubaro gw’abantu abaafiire ahabw’entaro n’obutabanguko kuruga omuri 1914 nigurenga omu bukaikuru bw’abantu 100! Okwongyera ahari ekyo, abantu abandi baingi bakabonabona ahabw’okutunga obuhuta.
wp17.3-E 5 kacw. 4-5
Abavugi Bana b’Embaraasi—Ni Baahi?
“Ku naimukize amaisho, naareeba embaraasi erikwiragura; kandi owaabaire agishutamiho akaba aine eminzaani omu ngaro ze; naahurira nk’eiraka ahagati y’ebihangirwe ebiine amagara ebina, nirigira riti: Endengo y’engano y’edenaari, n’endengo ishatu za sayiri z’edenaari; kwonka amajuta na viinyo otabishiisha”—Okushuuruurwa 6:5, 6.
Omuvugi ogu naajwekyera enjara. Nitureeba ngu okutunga eby’okurya kikaba kigumire munonga ahakuba ekicweka kya kiro (0.7) y’engano ekaba neegura edenaari emwe, omushaara ogu omuntu yaabaire akorera izooba ryona omu kyasha ky’okubanza! (Matayo 20:2) Kandi edenaari niyo emwe ekaba neebaasa kugura (kiro 2) eza sayiri, ei babaire nibatwara nk’ey’ahansi wagyigyeragyeranisa n’engano. Ekyo kikaba nikibaasa kumara obwire burikwingana ki waaba nooreeberera eka mpango? Abantu bakaba nibakira kuhaburwa kukoresa bikye kyahika aha by’okurya, kurugiirira aha mbeera eyaabaire eriho obwire obwo.
(Okushuuruurwa 6:8) Ku naimukize amaisho, naareeba embaraasi kisa, n’owaabaire agishutamiho akaba naayetwa Rufu, Okuzimu yaamukuratira, baaheebwa obushoboorozi aha kicweka kimwe kya kana eky’ensi okwitsa abantu rurara n’enjara na rufu n’enyamaishwa mbi z’omu nsi.
wp17.3-E 5 kacw. 8-10
Abavugi Bana b’Embaraasi—Ni Baahi?
Omuvugi wa kana naajwekyera okufa ahabw’endwara ezitarikutambwa n’ebindi. Ahonaaho bwanyima ya 1914, endwara eyaabaire neeyetwa Spanish flu ekaita obukaikuru bw’abantu baingi. Nikireebeka ngu nk’obukaikuru 500 bw’abantu bakaba baine endwara egi, haihi omuntu 1 omuri 3!
Kwonka Spanish flu ekaba eri entandikiro. Abakugu nibateebereza ngu abantu baingi munonga bakaitwa endwara erikwetwa smallpox omu kyasha kya 20. Kandi hati, abantu baingi nibaitwa siriimu, akakonko, n’omushwija, n’obu baraabe nibateeraho kukora okucoondoza.
Yaaba n’ahabw’entaro, enjara, nari endwara, ekirikurugamu n’okufa. Okuzimu nikweyongyera kutwara abantu baingi.
Okwongyera Kucondooza aha Bi Turikwega
(Okushuuruurwa 4:4) Kandi kikaba kyehinguririziibwe ebindi bitebe makumi abiri na bina; aha bitebe ebyo hakaba hashutamiho abakuru makumi abiri na bana, bajwaire ebijwaro birikwera n’ebirunga by’ezaabu aha mitwe yaabo.
(Okushuuruurwa 4:6) Kandi omu maisho g’ekyo kitebe hakaba hariho ekirikushusha nk’enyanja y’endeeberwamu, erikushusha kristalo. Okwehinguririza ekyo kitebe embaju zoona, hakaba hariho ebihangirwe ebiine amagara bina, ebiijwire amaisho omumaisho n’enyima.
re-E 76-77 kacw. 8
Oburungi bw’Ekitebe kya Yehova
Yohaana akaba naamanya ngu abanyamurwa bakaba nibatooranwa kuheereza omu hekalu. N’ahabw’ekyo naabaasa kuba yaatangeire ku yaareebire eki yaagambireho ati: “Kandi kikaba kyehinguririziibwe ebindi bitebe makumi abiri na bina; aha bitebe ebyo hakaba hashutamiho abakuru makumi abiri na bana, bajwaire ebijwaro birikwera n’ebirunga by’ezaabu aha mitwe yaabo.” (Okushuuruurwa 4:4) Eego, omu mwanya gw’abanyamurwa, hariho abakuru 24, bemekirwe nk’abagabe. Abakuru aba ni baahi? N’abashukirweho amajuta omu kibiina Ekikristaayo, abarazoorwe kuza omu iguru nk’oku Yehova yaabaraganiise. Ekyo nitukimanya tuta?
re-E 80 kacw. 19
Oburungi bw’Ekitebe kya Yehova
Ebihangirwe ebi nibijwekyera ki? Okworekwa okundi oku nabi Ezekieli yaatungire nikutuhwera kutunga eky’okugarukamu. Ezekieli akareeba Yehova ari aha kigaari, ekyabaire kiri hamwe n’ebihangirwe birikushushana n’ebi Yohaana yaagambireho. (Ezekieli 1:5-11, 22-28) Bwanyima, Ezekieli akagaruka yaareeba ngu ekigaari kikaba kiri n’ebihangirwe. Kwonka aha murundi ogu, akagamba aha bihangirwe ebi nka baakerubi. (Ezekieli 10:9-15) Ebihangirwe bina ebi Yohaana yaareebire biine kuba nibijwekyera baakerubi ba Ruhanga—ebihangirwe ebiine omwanya mukuru omu kibiina Kye ekirikwebemberwa omwoyo gwa gwe. Yohaana akaba naamanya ngu n’ekya butoosha kureeba baakerubi bari haihi na Yehova, ahakuba omu hekalu eya ira, ebishushani bya baakerubi babiri eby’ezaabu bikaba biri aha mutwe gw’eshanduukye y’endagaano, eyaabaire neejwekyera ekitebe kya Yehova. Ahagati ya baakerubi aba, Yehova akaba agambira ihanga ryona ebiragiro.—Okuruga 25:22; Zaaburi 80:1.
(Okushuuruurwa 5:5) Omwe ahari abo bakuru yangira ati: Otarira! Reeba, Entare y’omu ruganda rwa Yuda, ekitsitsa kya Daudi, akasingura; n’ahabw’ekyo naabaasa kushuuruura ekyo kitabo n’okubambuura obumanyiso bwakyo mushanju.
cf-E 36 kacw. 5-6
“Reeba, Entare Y’omu Ruganda rwa Yuda”
Entare neekira kujwekyera obumanzi. Oremeriireho omu maisho g’entare ekuzire? Ku oraabe oraakikozire, nihabaasa kuba haabaire hariho ekyabaire nikurinda entare, obundi nk’orugo orirukuba ruri omu mwanya ogurikurindirwamu enyamaishwa. Kwonka nabwo, nikiba kitoorobi kwemereraho. Ku orikureeba aha maisho g’ekihangirwe eki ekiine amaani kandi nakyo kikahinduka kikakureeba, torikubaasa kuteekateeka ngu entare neebaasa kutiina ekintu kyona. Baibuli neegamba aha ntare eti: “Entare egira amaani okukira ezindi nyamaishwa, kandi tegira kindi kyona eki ehunga.” (Enfumu 30:30) Kristo aine obumanzi nk’obwo.
Ka tushwijume emiringo eshatu oku Yesu yaayorekire ngu aine obumanzi nk’obw’entare: omu kuhamiira aha mazima, omu kugira oburinganiza, n’omu kuhiiganisibwa. Nitwija kureeba ngu twena nitubaasa kutooreza Yesu tube emanzi.