Russia Okutaahirira Ukraine

Omu kasheeshe kare munonga Febwari 24, 2022, amahe ga Russia gakataahirira Ukraine, n’obu abeebembezi b’amahanga baraabe baabaire batarikwenda ngu orutaro oru rubeho. Orutaro oru nirubaasa kukwata ruta aha nsi yoona? Omuhandiiki omukuru ow’ekibiina ky’Amahanga Ageeteeraine, António Guterres, ebiro bikye enyima akaba agizire ati: “Kigumire kuteebereza okubonabona, okucwekyerera, n’okusiisikara kw’obusingye ebirikubaasa kuba omuri Europe n’ensi yoona.”

Ebintu nk’ebi nibyoreka ki kurugiirira ahari Baibuli?

• Yesu Kristo akagamba aha bwire obu ‘eihanga [ryabaire niriija] kuteera erindi ihanga, n’obugabe bukateera obundi bugabe.’ (Matayo 24:7) Shoma ekicweka, “Ni Kamanyiso ki ak’Ebiro by’Emperu,’ nari ‘Obwire bw’Emperu?” kureeba oku Baibuli erikworeka ngu entaro eziriho hati nizihikiiriza obunabi.

• Ekitabo kya Baibuli eky’Okushuuruurwa nikigamba aha ntaro nk’omuvugi oshutami aha ‘mbaraasi endiijo erikutukura’ kandi orikwiha “obusingye omu nsi.” (Okushuuruurwa 6:4) Shoma ekicweka, “Abavugi b’Embaraasi Bana ni Baahi?” kumanya oku obunabi obu burikukwata aha ntaro z’ebiro ebi.

• Ekitabo kya Danieli kikagamba aha kuharangatana ‘kw’omugabe wa bukiizi-bwa-bumosho’ hamwe ‘n’omugabe wa bukiizi-bwa-buryo.’ (Danieli 11:25-45) Reeba vidiyo, Obunabi Obuhikiriziibwe—Danieli Eshuura 11 kumanya ahabw’enki Russia n’abashagiki baayo nibo barikujwekyera omugabe wa bukiizi-bwa-bumosho.a

• Kandi Okushuuruurwa nihagamba aha rutaro “orw’ekiro kikuru kya Ruhanga ow’Obushoboorozi Bwona.” (Okushuuruurwa 16:14, 16) Kwonka, oru ti rutaro nk’ezirikubaho aha gati y’amahanga hati. Shoma ekicweka Orutaro rwa Haramagedoni Niki?” kumanya ebirikukiraho ebiraabeho omu biro by’omumaisho.

Ahabw’enki orikubaasa kugira amatsiko aha biro by’omumaisho?

• Baibuli neegira ngu Ruhanga naija kumaraho “[entaro] okuhika aha muheru gw’ensi.” (Zaaburi 46:9) Shoma ekicweka, “Amatsiko Genyini aga Nyentsya Nungi” kwega ebirikukiraho ahari nyentsya ei Ruhanga arikuraganisa.

• Yesu akeegyesa abakuratsi be kushaba ngu Obukama bwa Ruhanga bwije. (Matayo 6:9, 10) Obukama obu ni gavumenti y’omu iguru erikwija kuhikiiriza ekigyendererwa kya Ruhanga omu nsi, kandi ekigyendererwa kya Ruhanga nikitwariramu obusingye omu nsi yoona. Kumanya oku Obukama bwa Ruhanga burikubaasa kukugasira, reeba vidiyo Obukama bwa Ruhanga Niki?

Omuri Ukraine hariyo Abajurizi ba Yehova abarikurenga 129,000. Kushushana n’Abajurizi ba Yehova omu mahanga agandi, nibatooreza Yesu barikuguma bataine rubaju omu by’obutegyeki, kandi batarikwejumba omu ntaro. (Yohaana 18:36) Omu nsi yoona, Abajurizi ba Yehova nibagumizamu nibabuurira, amakuru marungi ngu Obukama bwa Ruhanga nibwo buraiheho oburemeezi bw’abantu, otwariiremu entaro. (Matayo 24:14) Noobaasa kutumanyisa kugira ngu tukuhwere kwega bingi ebirikukwata aha butumwa bwa Baibuli oburikuha amatsiko.