Ediini n’Orutaro Omuri Ukraine—Baibuli Neegamba Ki?

Yetegyereze ebirikukwata aha beebembezi b’ediini abarikumanywa gye n’orutaro omuri Ukraine:

• “Orikukurira Ekanisa y’Abasodokisi omuri Russia, Omunyadiini Kirill tihaine eki yaagambire kworeka ngu okutaahirira kwa Russia kugwire. . . . Pokopoko y’ekanisa ye etwireho kumara obwire, Putin agikoreise kuhorereza ebigyendererwa bye eby’okutandikaho orutaro.”—EUobserver, Maaci 7, 2022.

• “Omunyadiini Kirill . . . ahaire akamanyiso k’amaani kuhorereza eihanga rye omu kutaahirira Ukraine, arikworeka ngu orutaro oru n’omuringo gumwe gw’okurwanisa ekibi.”—AP News, Maaci 8, 2022.

• “Omwebembezi w’Ekanisa y’Abasodokisi omuri Ukraine Metropolitan Epiphanius I owa Kyiv, Orwokubanza akashabira abantu be omugisha ‘kurwanisa abataahirizi ba Russia’ . . . Kandi akagira ngu okwita abaserukare ba Russia ti kibi.”—Jerusalem Post, Maaci 16, 2022.

• “Itwe [Ab’akakiiko k’Ekanisa n’Ediini omuri Ukraine (UCCRO)] nitushagika amahe ga Ukraine na boona abarikuturinda, nitubaha omugisha omu kurinda Ukraine kugibingamu abataahirizi, kandi nitubashabira.”—UCCROa Ebyagambirwe, Okwakabiri 24, 2022.

Nooteekateeka ki? Ediini erikugira ngu neekuratira Yesu Kristo eine kuhiga abagirimu kuza omu rutaro? Baibuli neegamba ki?

Ebyafaayo by’ediini omu ntaro

Ebyafaayo nibyoreka ngu ediini zitwire nizishagika entaro, nizizihorereza, kandi zirikuzishagika obwo zirikwetwara nk’erikurwanirira obusingye. Kumara emyaka mingi, Abajurizi ba Yehova batwire nibasheeshuura oburyarya bw’ediini ezo. Yetegyereze eby’okureeberaho ebimwe ebiri omu bitabo byaitu.

• Ekicweka “Entaro z’Ediini n’Akagwe Kataine Mugasho’” nikyoreka oku ediini y’Abanyakaturiki yaabaire neejunaanwa ahabw’obwitsi obwakozirwe omu iziina rya Ruhanga na Kristo.

• Ekicweka “Ekanisa y’Abanyakaturiki omuri Africa” nikyoreka oku ediini yaaremirwe kuzibira entaro z’enganda, hakarugamu okutirimbura abantu.

• Ebicweka “Ediini shi Niyo Eine Kuteebwaho Orubanja?,” “Eki Ediini Zirikukora omu Ntaro z’Abantu,” na “Ediini Okugwera Embaju” nibishoboorora oku Abanyakaturiki, Abasodokisi, n’Abaporotesitanti batwire nibashagika abantu baabo omu ntaro nyingi.

Ediini Enkuristaayo shi zishemereire kushagika entaro?

Eki Yesu yaayegyeise: ‘Kunda mutaahi waawe nk’oku orikwekunda.’ (Matayo 22:39) “Mukunde abazigu baanyu.”—Matayo 5:44-47.

Eki Yesu yaagambire: “Obugabe bwangye ti bw’ensi egi. Kuri obugabe bwangye bwaba buri obw’ensi egi, engabo zangye zikarwaine, ndeka kuheebwayo.” (Yohaana 18:36) ‘Boona abarikutwara rurara, nibaija kwitwa rurara.’—Matayo 26:47-52.

Eky’okuteekateekaho: Abakristaayo ku baraabe batarabaasize kurwana nangwa n’okurinda Yesu, hariho enshonga endiijo eshemereire kubareetera kurwana? Shoma ekicweka “Entaro Ziine Akakwate n’Obukristaayo?” kureeba oku Abakristaayo aba ira baakuratsire gye eky’okureeberaho kya Yesu n’enyegyesa ze.

Niki ekirikwija kuhika aha diini ezirikushagika entaro?

Baibuli neegyesa ngu Ruhanga naayanga ediini ezirikwetwara nk’ezirikujwekyera Yesu kwonka zitarikukuratira enyegyesa ze.—Matayo 7:21-23; Tito 1:16.

• Ekitabo ky’Okushuuruurwa nikyoreka ngu Ruhanga naareeba ediini kuba nizo zirikujunaanwa ahabw’okufa “boona abaitsirwe omu nsi.” (Okushuuruurwa 18:21, 24) Kubaasa kumanya enshonga ahabw’enki, shoma ekicweka “Babulooni Orukuru Niki?”

• Yesu akooreka ngu ediini zoona ezi Ruhanga atarikusiima niziija kucwekyerezibwa ahabw’ebikorwa byazo bibi, nk’oku omuti gujunzire ogutarikwana bijuma ‘gurikutemwa gukanagwa omu muriro.’ (Matayo 7:15-20) Shoma ekicweka “Emperu y’Ediini z’Ebishuba Eri Haihi!” kumanya oku kiraabeho.

Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images