Abajurizi ba Yehova shi Nibashenya Amaka Nari Nibagombeka?

Itwe Abajurizi ba Yehova nitukora n’obweziriki kwombeka amaka agaitu n’aga bataahi baitu. Nituha Ruhanga ekitiinisa owaatandikireho entebeekanisa y’eka. (Okutandika 2:21-24; Abaefeso 3:14, 15) Omu Baibuli naatwegyesa emisingye ehweraire abantu omu nsi yoona kugira amaka gahami kandi agarimu okushemererwa.

Oku Abajurizi ba Yehova Barikuhamya Amaka

Nitukora ekirikubaasika kukuratira obuhabuzi bwa Baibuli, ahabw’okugira ngu eki nikituhwera kureeberera gye abakazi baitu, abashaija baitu, n’abaana baitu. (Enfumu 31:10-31; Abaefeso 5:22–6:4; 1 Timoseo 5:8) Obwengye oburi omu Baibuli nibuhwera n’eka erimu ab’ediini zitarikushushana. (1 Petero 3:1, 2) Teekateeka aha bigambo ebi ebyagambirwe abu abakundwa baabo baabaire Abajurizi ba Yehova bwanyima:

• “Emyaka mukaaga yoona ei twamazire hamwe ekaba eri ey’okutongana n’okushoberwa. Kwonka bwanyima ya Ivete kuba Omujurizi wa Yehova, akongyera ahari rukundo ye n’okugumisiriza. Empindahinduka ezi yaakozire zikacungura obushwere bwaitu.”—Clauir, kuruga Brazil.

• “Ibanyi orikwetwa Chansa nkamuhakanisa obu Abajurizi ba Yehova baatandika kumwegyesa Baibuli, ahakuba nkaba ninteekateeka ngu nibasheenya amaka. Kuruga obwo, nkatandika kureeba ngu Baibuli buzima neehwera obushwere.”—Agness, kuruga Zambia.

Omu buheereza bwaitu, nitworeka abantu oku okugyendera aha bwengye oburi omu Baibuli kirikubaasa kubahwera

• Kutoorana gye omukundwa

• Kuraba omu mwaka gw’okubanza ogw’obushwere

• Omu kukoragana n’abakwe

• Omu by’esente

• Kurekyera aho kutongana

• Kwega kusaasira

• Omu kutendeka abaana

Okuhindura ediini shi nikureeta emihondano omu bushwere?

Amazima gari ngu obumwe nikibaho. Nk’eky’okureeberaho, ripoota eyaakozirwe ekitongore kya Sofres omuri 1998 ekaba neegira ngu obushwere 1 ahari 20, bukagira oburemeezi obu omwe aharibo yaahinduka Omujurizi wa Yehova.

Yesu akagira ngu abo abarikukuratira enyegyesa ze obumwe nibaija kugira obutaikirizana. (Matayo 10:32-36) Omunyabyafaayo Will Durant naagira ngu ahansi y’Obutware bwa Rooma, “Obukristaayo bukaba nibuteebwaho orubanja rw’okusheenya amaka,”a kandi n’Abajurizi ba Yehova bakateebwaho orubanja nirwo rumwe. Kwonka shi eki nikimanyisa ngu Abajurizi ba Yehova nibareetaho obutaikirizana?

Obu Kooti ya Buraaya ey’Obugabe bw’Abantu yaabaire neecwa orubanja yaaba Abajurizi ba Yehova nibasheenya amaka, ekagira ngu abatari Bajurizi ba Yehova nibagira emihondano barikwanga “kwikiriza omuntu kukoresa obugabe bwe bw’okwetooranira ediini.” Kooti ekoongyeraho eti: “Embeera egi neekira kubaho omu maka agarimu ab’ediini zitarikushushana otwariiremu n’Abajurizi ba Yehova.”b Kwonka n’obu Abajurizi ba Yehova baraabe nibateebwaho orubanja rw’okutaikiriza enyikiriza z’abandi, nibateeraho kukuratira obuhabuzi bwa Baibuli obu: ‘Mutaihura omuntu weena ekibi ahabw’ekibi. Ku kiraabe nikibaasika aha rubaju rwanyu, mutuurane n’abantu boona n’obusingye.’—Abarooma 12:17, 18.

Ahabw’enki Abajurizi ba Yehova nibaikiriza ngu baine kutaaha omu bushwere n’ab’ediini yaabo bonka

Abajurizi ba Yehova nibakuratira obuhabuzi bw’okushwera “omuri Mukama,” honka, ekirikumanyisa okutaaha omu bushwere n’ab’enyikiriza yaabo. (1 Abakorinso 7:39) Ekiragiro eki nikyegamira ahari Baibuli kandi nikikora gye. Nk’eky’okureeberaho, ekicweka ekyaiziire omu katabo Journal of Marriage and Family aka 2010 kikagira ngu “abashweraine abari omu diini emwe, abaine ebikorwa bimwe, n’enyikiriza emwe,” nibakira kugira enkoragana nungi.c

Kwonka, Abajurizi ba Yehova tibarikuhiga ab’eishe-emwe kutaana n’abu bari nabo omu bushwere abatari Bajurizi ba Yehova. Baibuli neegira eti: “Ow’eishe-emwe weena, ku araabe aine omukazi otarikwikiriza, omukazi ogwo yaakunda kuguma nawe, arekye kumushenda. Kandi omukazi weena, oine iba otarikwikiriza, iba yaakunda kuguma nawe, omukazi ogwo ataritaana n’omushaija we.” (1 Abakorinso 7:12, 13) Abajurizi ba Yehova nibagyendera aha kiragiro eki.