4 Okusaasirana

EKI KIRIKUMANYISA

Okusaasira nikimanyisa okweyihamu enyehurira z’okuguubwa kubi n’enziika ei orikubaasa kuba oine. Okusaasira tikirikumanyisa okwehuzya ekishobyo nari kweshushaniriza ngu tikirabaireho.

OMUSINGYE GWA BAIBULI: “[Mugume] nimugumisiririzana, kandi ku haraabe hariho oine eki arikufa na mugyenzi we, musaasirane.”​—Abakolosai 3:13.

“Waaba nookunda omuntu, torikuta omutima aha butahikiirira bwe, kureka nooreeba omuntu nk’oku ari nari eki arikuteeraho kuba.”​—Aaron.

ENSHONGA AHABW’ENKI NI KIKURU

Waabiika enziika, nooyereetera obusaasi bw’aha mubiri n’omu nyehurira, kandi noobaasa n’okushiisha obushwere bwawe.

“Eizooba rimwe ibanyi akashaba okusaasirwa ahabw’ekintu ekyabaire kinkozire kubi munonga. Kikaba kingumiire kumusaasira. Nkarugaho naamusaasira, kwonka ninyefuuza kureeba ngu tindarahukire kukikora. Nkareetaho oburemeezi butarikwetengyesa omu mukago gwaitu.”​—Julia.

EKI ORIKUBAASA KUKORA

YEGYEZE

Ku oraagarukye kukorwa kubi eki omukundwa waawe agambire nari akozire, yebuuze oti:

• ‘Nindahuka kuguubwa kubi?’

• ‘Eki yaanshobeza ni kibi munonga aine kunshaba okusaasirwa, nari nimbaasa kukyehuzya?’

GAANIIRAHO N’OMUKUNDWA WAAWE

• Nikitutwarira bwire ki kusaasirana?

• Nitubaasa kukora ki kugira ngu tusaasirane ahonaaho?

OBUHABUZI

• Waaba oine ekiniga, yetantare kugira ebigyendererwa bibi aha mukundwa waawe.

• Omukundwa waawe musaasire ahabw’entwaza ye, orikwijuka ngu ‘twena nitushobya omuri bingi.’​—Yakobo 3:2.

“Kyorobi kusaasira twena twaba tushobize, kwonka kigumire munonga omwe yaaba niwe ashobize. Okwikiriza okushaba okusaasirwa kw’omuntu n’okumusaasira nikyetengyesa obucureezi.”​—Kimberly.

OMUSINGYE GWA BAIBULI: “Rahuka kwikiriza” kutereeza enshonga.​—Matayo 5:25.