Obusaasi Bw’okuganya

“Nyowe na Sophiaa tukaba tumazire omu bushwere emyaka erengire 39 obu yaarwara munonga akafa. Banywani bangye baingi bakanshagika, kandi nkaguma nyine bingi by’okukora. Kwonka kumara omwaka gwona, nkaba ninyehurira nk’ocwekiremu ebicweka bibiri. Enyehurira zangye zikaba nizihinduka, ntarikubaasa kuzitegyeka. Nangwa na hati bwanyima y’emyaka nk’eshatu kwiha obu yaafa, ninkira kwehurira kubi kitaraariire.”—Kostas.

Orafeereirweho omukundwa? Ku kiraabe kiri kityo, nooyetegyereza ebigambo bya Kostas. Okufeerwa enkunzi yaawe, omunyabuzaare, nari omunywani nikyo kirikukirayo kureeta amaganya. Abarikucondooza aha busaasi oburikureetwa okuganya nibaikirizana n’ekyo. Ekicweka ekyashohoziibwe omu katabo The American Journal of Psychiatry nikigira ngu “waafeerwa omukundwa torikugaruka kumureeba ebiro byona.” Omuntu yaaba aine obusaasi nk’obwo, naabaasa kwebuuza ati: ‘Enyehurira ezi niziija kumara obwire burikwingana ki? Ninyija kugaruka kushemererwa? Nimbaasa kutunga nta oburuhuuko?’

Eby’okugarukamu by’ebibuuzo ebi biri omu Awake! egi. Ekicweka ekirikukurataho nikyoreka amatsiko agu orikubaasa kugira ku oraabe oherize kufeerwa omuntu. Ebicweka ebindi nibiza kworeka ebirikubaasa kukuhwera kutuubya aha kuganya kwawe.

Buzima twine amatsiko ngu ebirikukurataho nibiija kuhuumuriza kandi bihwere weena oine obusaasi bw’okuganya.