Ebirikubaasa Kubaho

N’obu abacondooza baraabe nibagira ngu okuganya kwine amadaara, buri omuntu naaganya omu muringo ogwe ogw’omutaano. Okutwaza omu muringo gw’omutaano shi nikimanyisa ngu abantu abamwe nibagira obusaasi bukye, nari nibanga kworeka enyehurira zaabo? Nikibaasa kutamanyisa ekyo. N’obu okworeka enyehurira zaawe kiraabe nikihwera omu kukira amaganya, tihariho muringo gumwe oguhikire ogw’okuganya. Nikibaasa kurugiirira aha bukomooko bw’omuntu, obuhangwa bwe, ebi arabiremu, n’omuringo ogu omuntu afiiremu.

NOIJA KUGANYA KIRIKWINGANA KI?

Abafeereirwe nibabaasa kutamanya ekiraabeho bwanyima y’okufeerwa omukundwa. Kwonka, haine enyehurira n’oburemeezi ebirikukira kubaho. Nibyo bimwe ahari ebi:

Enyehurira zirengyesereize. Omuntu naabaasa kuguma naarira, kugirira ofiire orushusho, n’okuhindahinduka kw’enyehurira. Kandi enyehurira ze nizibaasa n’okwongyera kuhindurwa okwijuka, n’ebirooto. Kwonka omu kubanza, omuntu naabaasa kugira okushoberwa n’okutaikiriza ekyabaho. Tiina naijuka oku yaatwarize iba Timo, ku yaafiire kitaraariire. Naagira ati: “Omu kubanza nkaburwa ebigambo. N’okurira tindarizire. Nkashoberwa nangwa n’obumwe kikaba nikingumira kwitsya. Nkaba ntarikwikiriza ekyabaho.”

Okwerarikirira, ekiniga, n’okweshinja nabyo nibikira kubaho. Ivan naagira ati: “Bwanyima y’obwire tuherize kufeerwa mutabani waitu Eric ow’emyaka 24, nyowe n’omukazi wangye, Yolanda, tukaba twine kiniga kingi! Eki kikaturenga, ahakuba tukaba tutakateekateekahoga ngu turi abantu b’ekiniga. N’okweshinja tukeeshinja turikwebuuza yaaba twakozire ekirikumara kuhwera mutabani waitu.” Alejandro, owaafeereirwe omukazi we bwanyima y’okurwara munonga, nawe akagira enyehurira z’okweshinja: “Nkabanza kuteekateeka ngu Ruhanga ku araabe anyikiriize kubonabona munonga nti, nshemereire kuba ndi omuntu mubi. Bwanyima nkeshinja, ndi nk’orikucwera Ruhanga orubanja ahabw’ekyabaireho.” Kandi Kostas, orikugambwaho omu kicweka eky’enyima, naagira ati: “Emirundi emwe nkaba ningirira Sophia ekiniga ahabw’okufa. Kandi bwanyima nkeshinja ahabw’okwehurira ntyo. Ahakuba okufa ekaba etari nshobe ye.”

Ebiteekateeko birikuteganisa. Hariho obwire obu omuntu arikuba atarikuteekateeka gye. Nk’eky’okureeberaho, orikuganya naabaasa kuteekateeka ngu owaafiire naabaasa kumureeba, nari kumuhurira. Nari orikuganya nikibaasa kuba nikimugumira kutaho omutima, nari kwijuka ebintu. Tiina naagira ati: “Obumwe nkaba mba ningaaniira n’abandi, kwonka nkaba nshanga ebiteekateeko byangye biri ahandi! Nkaba mpuga ntandika kuteekateeka aha byabaireho Timo arikuza kufa. Okutabaasa kuteekateeka gye nakyo kyonka kikaba nikireeta amaganya.”

Okwenda kwetaanisa aha bandi. Omuntu orikuganya naabaasa kuteehurira gye haaba hariho abandi. Kostas naagira ati: “Nkaba ngira eihamba naaba ndi n’abantu abari omu bushwere. Kandi nkaba nyehurira nti nabwo naaba ndi n’abatari mu bushwere. Yolanda muka Ivan, naijuka ati: “Kikaba nikingumira kuba n’abantu abarikwetomboita aha buremeezi bukye waabugyeragyeranisa n’obwaitu! Kandi, hariho abaabaire nibatugambira oku abaana baabo barikukora gye. Nkaba ninshemererwa nabo, kwonka nabwo, kikaba nikingumira kubahurikiza. Nyowe na ibanyi tukaba nitwetegyereza ngu embeera ziine kugumizamu nka butoosha, kwonka tukaba tutaine kyetengo nari okugumisiriza kubaasa kukyemera.”

Amagara mabi. Okutenda kurya, okuhururuka, n’okuburwa oturo nibikira kubaho. Aaron naijuka obu yaabaire aherize kufeerwa ishe ati: “Buzima nkaba ningumirwa kubyama. Buri kiro nkaba ninsiimuka omu shaaha nizo zimwe ndikuteekateeka aha kufa kwa tata.”

Alejandro naijuka arikurwararwara endwara zitarikwetegyerezibwa, naagira ati: “Emirundi mingi omushaho akaba ancebera, kwonka akaba ampamiza ngu tinyine endwara yoona. Nkateekateeka ngu okuganya nikwo kurikundeetera kureebeka nk’orwaire.” Obumanyiso obwo bukarugaho bwabura. N’obu kiraabe kiri kityo, okucwamu kwa Alejandro kureeba omushaho kikaba kiri eky’obwengye. Okuganya nikubaasa kutuubya amaani g’omubiri ag’okurwanisa endwara, kwimutsya endwara ezi oine, nari kureeta endwara nsya.

Okugumirwa kukora ebintu bikuru. Ivan naagira ati: “Bwanyima y’okufa kwa Eric, tukaba twine kumanyisa abanyabuzaare n’abanywani, otwariiremu n’abandi baingi nka mukama we na mukama w’enju ei yaabaire naapangisa. Hakaba hariho n’ebipapura bingi eby’okwijuza. Kandi tukaba twine kutereeza ebintu bya Eric. Ebi byona bikaba nibyetengyesa okutaho omutima, kandi obwo tukaba turuhire omu biteekateeko, omubiri, n’enyehurira.”

Kwonka abamwe, nibagumirwa bwanyima baaba nibaza kukora emirimo ei omukundwa waabo owaafiire yaabaire naakora. Eki nikyo kyahikire ahari Tiina. Naashoboorora ati: “Timo niwe yaabaire naakora aha bya banka n’ezindi nshonga z’eby’esente. Hati obu bukaba obujunaanizibwa bwangye, ekyayongyeire aha maganya gangye. Nimbaasa kukora ebi byona ntakozire nshobe?”

Ebi byona ebyagambwaho, nibyoreka ngu ti kyorobi kwemera okuganya. Amazima gari ngu obusaasi bw’okufeerwa omuntu ou orikukunda nibubaasa kuba obw’amaani munonga, kwonka okumanya eki bukiri kare nikubaasa kuhwera abaherize kufeerwa kwemera embeera egi. Kandi ijuka, ti buri omwe ngu naahikwaho ebintu ebi byona ebirikureetwaho okuganya. Nikibaasa kugumya abafeereirwe kumanya ngu enyehurira ezirikureetwa okuganya n’eza butoosha.

NIINYIJA KUGARUKA KUSHEMERERWA OBUNDI?

Ekirikubaasa kubaho: Obusaasi bw’okuganya tiburikugumaho ebiro byona, nibuhitsya obwire butuuba. Eki tikirikumanyisa ngu omuntu naakirira kimwe nari naayebwa omukundwa we owaafiire. Kureka, mporampora, obusaasi bw’amaani obw’okuganya nibutuuba. Nibubaasa kuguma nibugaruka haagira ekyakwijutsya nari omu bwire obumwe nk’obw’okwijuka obushwere. Kwonka bwanyima y’obwire, abantu baingi nibahika batebeekana omu nyehurira, bagaruka bata omutima aha mirimo yaabo ey’obutoosha. Eki nikibaho na munonga ofeereirwe yaaba aine obushagiki bw’ab’eka ye nari abanywani, nari yaagira eki yaakora kwemera embeera egi.

Eki nikitwara bwire burikwingana ki? Ahari bamwe, obusaasi bw’amaani nibutuuba omu meezi makye. Kwonka abaingi, nihabaasa kuhinguraho omwaka nari emyaka ebiri batakabaire gye. Kandi abandi nikitwara obwire bwingi.a Alejandro naagira ati: “Okuganya kw’amaani kukatwara emyaka nk’eshatu.”

Yegumisiririze. Twara buri izooba okwaryo, yetware, kandi manya ngu obusaasi bw’okuganya tiburikugumaho ebiro byona. Ekyo kigambirwe, hariho ebi orikubaasa kukora kutuubya okuganya kwawe hati, kukareka n’okutwara obwire bwingi munonga?