Okusingura Amaganya Gaawe

Hariho obuhabuzi bwingi aha bikwatiraine n’enshonga egi. Kwonka, ti bwona ngu nibuhwera. Nk’eky’okureeberaho, abamwe nibabaasa kukuhabura ngu otarira nari ngu otooreka enyehurira zaawe omu muringo gwona. Abandi nibabaasa kukugyema kworeka enyehurira zaawe zoona. Baibuli neeha emiteekateekyere etarikugwera rubaju, erikuhikaana n’okucondooza okw’obunaku obu.

Omu bicweka ebimwe, nibagira ngu omushaija tashemereire kurira. Kwonka shi omuntu ashemereire kutiina kurira ngu naaza kuhemuka, nangwa n’obu yaakuba ari omu bantu? Abahangu abarikumanya ebiteekateeko by’abantu nibagira ngu okurira n’ekya butoosha omu kuganya. Kandi obumwe okuganya, nikubaasa kukuhwera kutuubya aha busaasi bw’okufeerwa. Kwonka okufa mamigye okanga kuganya, nikibaasa kuba eky’akabi munonga. Baibuli terikushagika eky’okugira ngu omushaija tashemereire kurira amarira g’okuganya. Nk’eky’okureeberaho, teekateeka ahari Yesu. Obu munywani we omukundwa Laazaaro yaafa, akarira butunu abantu barikumureeba, n’obu araabe yaabaire aine amaani g’okuzoora abafu!—Yohaana 11:33-35.

Okugira ekiniga ni kimwe aha birikureetwa okuganya, na munonga omuntu yaafa kitaraariire. Hariho enshonga nyingi ezirikureetera omuntu ofeereirwe kugira ekiniga, nk’omuntu w’ekitiinisa yaagambira eryo nari akagamba ebitaine buhame. Mike kuruga South Africa naagira ati: “Nkaba nyine emyaka 14 yonka obu tata yaafa. Aha kuziika, omwebembezi w’ediini y’Abaporotesitanti akagira ngu Ruhanga naakunda abantu barungi, kandi abatwara bukiri kare.a Eki kikandeetera kugira ekiniga ahakuba tukaba nitwetenga munonga tataitwe. Na hati, bwanyima y’emyaka 63, nikinshaasha.”

Kandi shi okweshinja? Na munonga omuntu yaafa kitaraariire, ofeereirwe naabaasa kuguma naateekateeka ati: ‘Eki ti kyakubaireho ku ogire ngu nkakora eki nari kiriya.’ Nari obu waahereruka kureebana n’ogwo ofiire mukatongana. Eki nikibaasa kukureetera kwongyera kweshinja.

Waaba oine enyehurira nk’ezo ez’okweshinja n’okugira ekiniga, ka ni kikuru okutafa mamigye n’enyehurira ezo. Omu mwanya gw’ekyo, noobaasa kugambaho na munywani waawe orikubaasa kukuhurikiza kandi akakuhamiza ngu boona abarikufeerwa nibaba baine enyehurira nk’ezo. Baibuli neetwijutsya eti: “Munywani w’omuntu amukunda ebiro byona kandi ow’eishe-emwe azaarirwa okuhwera abantu omu bihikiirizi.”—Enfumu 17:17.

Omunywani orikukirayo ou omuntu ofeereirwe arikubaasa kugira, n’Omuhangi waitu, Yehova Ruhanga. Omu kushaba mugambire ebiri omu mutima gwawe ahakuba ‘naakutaho omutima.’ (1 Petero 5:7) Nangwa, naaraganisa ngu abo boona abarikumushaba, nibaija kuhuumurizibwa “obusingye bwa Ruhanga oburengire okwetegyereza kw’omuntu weena.” (Abafilipi 4:6, 7) Kandi, ikiriza Ruhanga akuhwere kuba gye kurabira omu Kigambo kye ekirikuhuumuriza, Baibuli. Handiika ebyahandiikirwe ebirikuhuumuriza. (Reeba akabokisi k’ekicweka eki.) Obumwe nikibaasa n’okukwetengyesa kugira ebyahandiikirwe ebi waakwata omu mutwe. Okugira eby’okuteekateekaho nikibaasa kukuhwera na munonga nyekiro waaba ori wenka kandi kirikukugumira kubyama.—Isaaya 57:15.

Enyimaho, omushaija w’emyaka 40, ou turaayete Jack, omukazi we omukundwa akaitwa ekookoro. Jack naagira ngu obumwe naahurira eihamba ry’amaani. Kwonka ashangire ngu okushaba nikuhwera munonga. Naashoboorora ati: “Ku ndikushaba Yehova, tindikuhurira nyine eihamba. Ninkira kwimuka omu kiro kandi tindikugaruka kugwejegyera. Ku ndikuheza kushoma Ebyahandiikirwe nkateekateeka aha birimu ebirikuhuumuriza, kandi omu kushaba nkagamba n’oku ndikwehurira, ningira obuhuumure n’obusingye, ekirikubaasisa omutima gwangye n’ebiteekateeko kuhuumura reero nkagwejegyera.”

Omukazi orikwetwa Vanessa nyina akarwara yaafa. Nawe areebire amaani g’okushaba. Naagira ati: “Omu bwire bugumire, nkaba nshaba ndikweta eiziina rya Ruhanga reero mbaruka ndira. Yehova akahurira okushaba kwangye kandi yaampa amaani agu naabaire niinyenda.”

Abamwe abarikuhuumuriza abafeereirwe, nibahabura abo abarikuba nibateganisibwa amaganya kwejumba omu kuhwera abandi, nari kuhayo obwire bwabo kukora emirimo ya burungi-bwansi. Ekyo nikibaasa kureeta okushemererwa kandi kituubye n’aha kuganya kw’omuntu. (Ebyakozirwe 20:35) Abakristaayo baingi abafeereirwe bashangire ngu okuhwera abandi nikibahuumuriza.—2 Abakorinso 1:3, 4.