Eki Orikubaasa Kukora Hati​—Kwemera Amaganya

Waaba nooyenda obuhabuzi aha ku orikubaasa kwemera amaganya, noija kutunga bwingi munonga, obumwe nibuhwera kukira obundi. Obundi eki kiri kityo, ahabw’okugira ngu nk’oku kyaba kyagambirwe, buri omwe naaganya omu muringo gw’omutaano. Oburikuhwera omuntu omwe nibubaasa kutahwera omuntu ondiijo.

N’obu kiraabe kiri kityo, hariho obuhabuzi bwingi obuhweraire abantu baingi. Nibukira kuheebwa abahi b’obwengye aha kuganya, kandi nibuhikaana n’emisingye eri omu kitabo kya ira, Baibuli.

1: IKIRIZA OBUSHAGIKI BW’AB’EKA YAAWE N’ABANYWANI

• 

  Abacondooza abamwe nibigira ngu egi n’enshonga nkuru omu kuganya. Kwonka, obumwe nooba nooyenda kuba wenka. Nangwa noobaasa n’okugwerwa kubi abo abarikuteeraho kukuhwera. Eki n’ekya butoosha.

• Toshemereire kuteekateeka ngu oine kuba omu bantu abandi, kwonka nabwo otababinga. Ahakuba nyentsya noobaasa kwija kwetenga obushagiki bwabo. Omu muringo gw’embabazi gambira abandi eki orikwenda hati n’eki otarikwenda.

• Kurugiirira aha ki orikwenda, ringaaniza obwire bw’okuba n’abandi, n’obw’okuba wenka.

OMUSINGYE: ‘Ababiri nibakira omwe. Ahakuba omwe yaagwa, ondiijo naimutsya mugyenzi we.’—Omubuurizi 4:9, 10.

2: FAYO AHA BI ORIKURYA, KANDI TENDEKA OMUBIRI GWAWE

• Okurya eby’okurya by’ekiriisa nikikuhwera omu kutuubya aha busaasi oburikureetwa okuganya. Teeraho kurya ebijuma, emboga, na puroteini.

• Nywa amaizi maingi n’ezindi eshande.

• Waaba otainiire by’okurya ekihika, guma noorya kakye emirundi mingi. Noobaasa n’okubuuza omushaho aha bikwatiraine n’endya.a

• Okugyenda n’obwira n’endiijo miringo y’okutendeka omubiri neebaasa kutuubya aha kugira enyehurira mbi. Okutendeka omubiri gwawe nikibaasa kukuhwera kutunga obwire bw’okuteekateeka aha kufeerwa kwawe nari kukwehuzya.

OMUSINGYE: “Tihariho muntu oraangire omubiri gwe, kureka naaguriisa, kandi agureeberera.”—Abaefeso 5:29, NET Bible.

3: BYAMA EKIRIKUMARA

• 

  Butoosha okubyama ni kikuru, kwonka okukira munonga ahari abo abarikuganya, obu okuganya kurikwongyera aha buruhe.

• Yegyendesereze obwingi bwa kaawa n’amaarwa ebi orikunywa, obu ebi byombi birikubaasa kuteganisa oturo twawe.

OMUSINGYE: ‘Oruhi rumwe orwijwire obusingye niruhita empi ibiri eziijwire emirabanamu n’okwitanira omuyaga.’—Omubuurizi 4:6.

4: HINDAHINDURAMU

• 

  Ijuka ngu buri muntu naaganya omu muringo gw’omutaano. Oine kumanya omuringo ogurikukukorera.

• Baingi bashangire ngu okugambira abandi nikibahwera kwemera amaganya gaabo, kwonka abandi nibaba batarikwenda kugamba aha maganya gaabo. Abacondooza baine emiteekateekyere etarikushushana yaaba okugamba oku orikwehurira nikihwera omu kusingura amaganya. Ku oraabe haine ou orikwenda kuhindura obwegamo bwawe kwonka orikweziringa, kikore orikugambira munywani waawe ow’aha mara.

• Abamwe bashangire ngu okurira nikibahwera kwemera amaganya, kandi abandi nibageemera batarizire.

OMUSINGYE: “Buri mutima nigumanya obusaasi bwagwo.”—Enfumu 14:10, New International Version.

5: YETANTARE EMIZE MIBI

• 

  Abamwe abarikuganya nibateeraho kukiza obusaasi bwabo barikukoresa kubi amaarwa nari emibazi. Waakora eki nooba nooyecwekyereza wenka. Oburuhuuko obu orikubaasa kutunga n’obw’akaanya kakye, kandi ebirikurugamu ni bibi munonga. Koresa emiringo etari y’akabi kutuubya okwerarikirira kwawe.

OMUSINGYE: ‘Ka tweyozyeho oburofa bwona.’—2 Abakorinso 7:1.

6: KORESA GYE OBWIRE BWAWE

• Baingi nibashanga ngu nikihwera kuhindura omu bwire obu barikuganyamu, nibagira ebindi ebi baakora kwehuzya okuganya.

• Noobaasa kutunga oburuhuuko orikuhamya emikago yaawe, orikwega emyoga misya, nari orikwejumba omu by’okweshemeza.

• Obwire bwahinguraho, nihabaasa kubaho empinduka. Noobaasa kureeba ngu okuhuumuramu aha kuganya kuriyo nikukuhwera omu kwemera amaganya.

OMUSINGYE: ‘Buri kintu kiine obunaku bwakyo. Obunaku bw’okurira, n’obunaku bw’okusheka, obunaku bw’okucura, n’obunaku bw’okuzina.’—Omubuurizi 3:1, 4.

7: HAMIRA AHA NTEBEEKANISA YA BUTOOSHA

• 

  Ahonaaho, garuka aha ntebeekanisa yaawe eya butoosha.

• Waahamira aha ntebeekanisa yaawe ey’okubyama, ey’okukora, n’ebindi, noobaasa kugaruka omu nteeko.

• Okugumizamu nooyejumba omu bintu eby’omugasho, nikibaasa kutuubya aha busaasi bwawe omu nyehurira.

OMUSINGYE: ‘Taritongyeza munonga biro by’amagara ge, ahabw’okuba Ruhanga naija kuguma naamuhuzya n’okushemererwa omu mutima gwe, naabimwebesa.’—Omubuurizi 5:20.

8: YETANTARE KUCWAMU AHONAAHO AHA NSHONGA NKURU

• Baingi abarikucwamu aha nshonga nkuru ahonaaho bwanyima nibeefuuza.

• Kyaba nikibaasika, tegyereza obwire buringaniire buhingureho, otakafurukire, otakahindwire murimo, nari otakaihireho ebintu bya nyakufa.

OMUSINGYE: “Ebi omweziriki ateekateeka kukora tibibura [kurugamu ebirungi], kwonka weena orahukiiriza, ayereetera obukyene.”—Enfumu 21:5.

9: GUMA NOIJUKA OMUKUNDWA WAAWE

• 

  Baingi abarikuganya n’eky’omugasho kukora ebirikubahwera kuguma nibaijuka omuntu owaafiire.

• Noobaasa kushanga kirikuhuumuriza kurundaana ebishushani n’ebitebyo ebi orikwenda kuguma noijuka.

• Biika ebintu ebirikukwijutsya ebirungi, kandi ogume noobishwijuma bwanyima, waareeba ngu hati noobaasa kukikora.

OMUSINGYE: “Mwijukye ebiro ebya ira.”—Eky’Ebiragiro 32:7.

10: GIRA EI WAAZA

• Noobaasa kuza kuramburaho.

• Kyaba kitarikubaasika kuza kurambura kumara obwire buraingwa, noobaasa kukora ekirikushemeza kumara ekiro nka kimwe nari bibiri, nk’okutemba orushozi, okuza omu riijukiro, nari kugyendagyendamu.

• Nangwa n’okuhindura kakye aha mwanya nikibaasa kukuhwera omu kuganya kwawe.

OMUSINGYE: “Mwije aheekiikire twehereere muhuumureho.”—Mako 6:31.

11: HWERA ABANDI

• 

  Ijuka ngu obwire obu orikumara orikuhwera abandi, naiwe nibubaasa kukuhwera kwehurira gye.

• Noobaasa kutandika orikuhwera abandi abafeereirwe abakundwa, nk’abanyabuzaare, nari abanywani abarikwenda ow’okuganya nawe.

• Okushagika n’okuhuumuriza abandi nikibaasa kukuhwera kugira ekigyendererwa n’okushemererwa ebi orikubaasa kuba nooyenda.

Omusingye: ‘Okuha abandi nikureeta okushemererwa okukira okuheebwa.’—Ebyakozirwe 20:35.

12: SHWIJUMA EBI ORIKWEBEMBEZA

• Okuganya nikubaasa kukureetera kumanya enshonga ezindi.

• Koresa omugisha ogu kushwijuma ebi orikukora.

• Kyaba nikyetengyesa, hindura omu bi orikwebembeza.

OMUSINGYE: ‘Okuza omu ka erimu okucura nikikira okuza omu ka erimu obugyenyi, ahabw’okuba ekyo nigwo muheru gw’abantu boona, kandi abahuriire nibaija kukigumya aha mutima.’—Omubuurizi 7:2.

N’eky’amazima, tihariho ekirikubaasa kwihiraho kimwe obusaasi obu oine. Kwonka, baingi abaafeereirwe abakundwa, nibabaasa kukuhamiza ngu okukora ebintu by’omugasho nk’ebi ebyagambwaho omu kicweka eki, nibibahwera kuhuumurizibwa. Ijuka ngu, ebi tibyo byonka ebirikutuubya okuganya. Kwonka waakora bimwe aharibyo, nibibaasa kukureetera obuhuumure.