Ekitebyo 25

Ekika Kyona Okuza Misri

YOSEFU takibaasa kwegumya nakakye. Agambira abaheereza be boona kuruga omu kishengye. Ku atsigara na bakuru be bo bonka, Yosefu atandika kurira. Nitubaasa kuteeramu akashushani oku bakuru be bashobeirwe ahabw’okuba tibarikumanya ekirikumuriza. Aha muheru, abagira ati: ‘Niinye Yosefu. Tata akibaho?’

Beene ishe bashoberwa munonga kandi babura eki baagarukamu. Batiina. Kwonka Yosefu abagira ati: ‘Nyabura ‘mwe, muunyirire haihi.’ Ku bamwirira haihi abagira ati: ‘Niinye Yosefu murumuna waanyu ou mwagurize kutwarwa Misri.’

Yosefu ayeyongyera kugamba nabo omu muringo gw’embabazi ati: ‘Mutakayegwerwa kubi ahabw’okunguza nkaija kunu. Buzimazima akaba ari Ruhanga owaanyohereize Misri kukiza amagara g’abantu. Faraho akampindura omutegyeki w’egi ensi yoona. Mbwenu hati mwehuute mugarukye owa tata mumugambire ebi. Kandi mumugambire aije atuure kunu.’

Atyo Yosefu agwa bakuru be omu kifuba, ababumbatira kandi boona abanywegyera. Faraho ku ahurira ngu beene ishe ba Yosefu baija, agambira Yosefu ati: ‘Reka batware ebigaari bareete shoimwe hamwe n’ab’omu maka gaabo kandi bagarukye hanuya. Niinyija kubaheereza eitaka eririkukirayo oburungi omuri Misri.’

Kandi ekyo nikyo baakozire. Hanu omu kishushani noobaasa kureeba Yosefu arikubugana ishe obu yaija omuri Misri n’eka ye yoona.

Eka ya Yakobo ekaba yaabaire mpango munonga. Boona hamwe bakaba bari 70 obu baaza Misri, tubariiremu Yakobo n’abaana be n’abaijukuru. Baitu hakaba harimu n’abakazi, kandi shana obundi hamwe n’abahuuku baingi. Aba boona bakatuura omuri Misri. Bakaba nibeetwa Abaisraeli, ahabw’okuba Ruhanga akahindura eiziina rya Yakobo kuba Israeli. Abaisraeli bakahinduka abantu b’omutaano munonga ahari Ruhanga, nk’oku turaareebe bwanyima.

Okutandika 45:1-28; 46:1-27.