Yehova Tarayebirwe Yosefu

Obu Yosefu yaabaire ari omu kihome, Faraho omutegyeki wa Misri, akaroota ebirooto ebyabaire bigumire kushoboorora. Omwe aha baheereza ba Faraho akamugambira ngu Yosefu akaba naabaasa kumushoboororera eki birikumanyisa. Ahonaaho Faraho akagira ngu bareete Yosefu.

Faraho akamugira ati: ‘Noobaasa kunshoboororera ebirooto byangye?’ Yosefu akagambira Faraho ati: ‘Misri neija kugira eby’okurya bingi kumara emyaka mushanju, bwanyima habeho emyaka mushanju y’enjara. Mbwenu osherure omuntu orikwetegyereza abiikye eby’okurya kugira ngu abantu bataija kwitwa enjara.’ Faraho akagarukamu ati: ‘Niwe naatoorana. Noija kuba omuntu wa kabiri ahariinye omuri Misri!’ Yosefu akamanya ata eki ebirooto bya Faraho byabaire nibimanyisa? Yehova akahwera Yosefu.

Omu myaka mushanju eyakuratsireho, Yosefu akabiika eby’okurya. Nk’oku Yosefu yaabaire yaagambire, hakabaho enjara omu nsi yoona. Abantu bakaba baruga omu bicweka by’ensi yoona kugura eby’okurya ahari Yosefu. Ishe, Yakobo akahurira ngu omuri Misri hariyo eby’okurya, n’ahabw’ekyo akooherezayo batabani be ikumi kugura eby’okurya.

Batabani ba Yakobo bakaza owa Yosefu, kandi akarahuka kubamanya. Kwonka beene ishe bo tibaramanyire ngu akaba ari Yosefu. Bakamwinamira, nk’oku yaabaire yaarootsire obu yaabaire akiri muto. Yosefu akaba naayenda kumanya yaaba beene ishe baabaire bakiine rwango. N’ahabw’ekyo akabagira ati: ‘Muri entatsi; mwizire kureeba ahu ensi yaitu etaine maani.’ Bakamugarukamu bati: ‘Ngaaha! Twena turi eishe-emwe ikumi na babiri nituruga Kanaani. Murumuna waitu omwe akafa, kandi murumuna waitu omuto yaatsigara na tataitwe.’ Bwanyima Yosefu akabagira ati: ‘Mundeteere murumuna wanyu omuto, nibwo ndabaikirize.’ Batyo baagaruka ow’ishebo.

Eby’okurya ku byahweireho, Yakobo akagaruka yaayohereza abatabani Misri. Aha murundi ogu bakagyenda na Benyamiini, murumuna waabo omuto. Yosefu kubaasa kugyeza beene ishe, akashereka ekikopo kye eky’efeeza omu nshaho ya Benyamiini kandi yaabeiherera beene ishe ngu baakiiba. Abaheereza ba Yosefu kubashangire ekikopo ekyo omu nshaho ya Benyamiini, bakuru be bakatiina. Bakashaba Yosefu kubafubira omu mwanya gwa Benyamiini.

Obwo Yosefu akamanya ngu bakuru be bakahinduka. Yosefu akaba atakibaasa kugumisiriza. Akarira naaborooga munonga ati: ‘Niinye Yosefu murumuna waanyu. Tata akibaho?’ Bakuru be bakatangaara munonga. Akabagira ati: ‘Mutashaasha ahabw’okunguza. Ahabw’okuba Ruhanga niwe yaantumire kubabandiza kunu kukiza amagara gaanyu. Mwimukye mwehuute, muze owa tata mumureete.’

Bakagaruka omu ka kugambira ishebo amakuru marungi kandi n’okumureeta Misri. Bwanyima y’emyaka mingi, Yosefu n’eishe bakagaruka baareebana.