Ekitebyo 30
Orushaka Orurikwaka
MUSA akaba aizire aha rushozi rwa Horebu kusherurira entaama ze obunyaatsi. Hanu yaareeba orushaka nirwaka, kwonka rukaba rutarikusya!
‘Eki n’eky’okutangaaza,’ Musa nikwo yaateekateekire. ‘Ninza kwirira haihi nyetegyereze kurungi.’ Ku yairiire haihi, eiraka ryaruga omu rushaka nirigira riti: ‘Otairira haihi. Juura enkaito omu bigyere byawe, ahakuba omwanya ogu oyemereiremu n’ogurikwera.’ Ruhanga niwe yaabaire naagamba arikurabira omuri maraika, Musa nikwo kweshweka aha maisho.
Ruhanga kandi yaagira ati: ‘Ndeebire okubonabonesibwa kw’abantu bangye abari omuri Misri. N’ahabw’ekyo ninza kubajuna, kandi niiwe ndikutuma okwebembera abantu bangye okuruga omuri Misri.’ Yehova akaba naaza kutwara abantu be omu nsi enungi eya Kanaani.
Kwonka Musa yaagira ati: ‘Tinyine nk’oku ndi. Eki nimbaasa kukikora nta? Kwonka shi ka tugire ngu naagyenda. Abaisraeli nibaija kuungira bati: “N’oha okwoheereize?” Mbwenu shi ndyabagarukamu nta?’
‘Oku nikwo oribagambira,’ nikwo Ruhanga yaamugarukiremu. ‘“YEHOVA Ruhanga wa Abrahamu, Ruhanga wa Isaaka, Ruhanga wa Yakobo yaanyohereza ei muri.”’ Kandi Yehova yaagaruka yaagira ati: ‘Eri niryo eiziina ryangye ebiro byona.’
Musa yaamugarukamu ati: ‘Kwonka shi ku baakuba bataikirize ku ndabagambire ngu ontumire?’
Ruhanga yaamubuuza ati: ‘Okwatsire ki omungaro?’
Musa yaamugarukamu ati: ‘N’enkoni.’
Ruhanga yaagira ati: ‘Ginagye ahansi.’ Kandi Musa ku yaaginagire ahansi, enkoni yaahinduka enjoka. Reero Yehova yaayoreka Musa ekindi ky’okutangaaza. Yaamugira ati: ‘Ta omukono gwawe omunda y’ekanzu.’ Musa yaakikora, kwonka ku yaagwihiremu, gukaba nigwera nk’orubaare! Omukono gukareebeka nk’ogwabaire gwine endwara mbi erikwetwa ebibembe. Ekindi Yehova yaagaruka yaaheereza Musa amaani g’okukora eky’okutangaaza ekya kashatu. Aha muheru yaagira ati: ‘Ku orikora eby’okutangaaza ebi, Abaisraeli nibaija kwikiriza ngu nkutumire.’
Bwanyima Musa yaaza omuka kandi yaagambira Yesero ati: ‘Naakweshengyereza nyikiriza ngarukye omu banyabuzaare bangye omuri Misri kureeba oku bari.’ Atyo Yesero yaaraga Musa, atyo Musa yaatandika orugyendo rwe orw’okugaruka Misri.
Okuruga 3:1-22; 4:1-20.