Tooreza Okwikiriza kwa Musa

1, 2. (a) Musa ku yaahikize emyaka 40, akacwamu ki? (Reeba ekishushani aha kutandika.) (b) Ahabw’enki Musa yaikiriize kutwarizibwa kubi n’abantu ba Ruhanga?

MUSA akaba naamanya ebirungi ebi yaabaire naabaasa kutunga omuri Misri. Akaba naareeba amaju mahango g’abagaiga. Kandi akaba akuriire omu ka y’omugabe. Akaba ‘ayegyesiibwe obwengye bwona obw’Abanyamisri,’ otwariiremu okuhuuga ebishushani, okwega aha by’omu mwanya, okubara, n’eby’amagara. (Byak. 7:22) Akaba naabaasa kuba omugaiga, kugira obushoboorozi, n’obujunaanizibwa, ebintu ebi Omunyamisri owaabutoosha yaabaire atarikubaasa kugira!

² Kwonka Musa ku yaahikize emyaka 40, akacwamu omu muringo ogwatangaarize eka y’abagabe Abanyamisri ei yaakuriiremu. Taracwiremu kuguma ari Omunyamisri nk’abandi Banyamisri, kwonka akacwamu kutwarizibwa kubi nk’omuhuuku! Ahabw’enki? Musa akaba aine okwikiriza. (Shoma Abaheburaayo 11:24-26.) Ahabw’okwikiriza, amaisho ge taragataire aha bi yaabaire naareeba ebimwetoroire. Ahabw’okugira ngu Musa akaba ari omushaija w’eby’omwoyo, akaba naikiririza omuri Yehova “otareebwa,” n’ebiraganiso bye.​—Heb. 11:27.

3. Ni bibuuzo ki bishatu ebi turikuza kushwijuma omu kicweka eki?

³ Naitwe titushemereire kuta amaisho aha bi turikureeba byonka. Twine kuba “omuri abo abarikwikiriza.” (Heb. 10:38, 39) Kubaasa kutuhwera kugira okwikiriza, ka tushwijume ebirikukwata ahari Musa omu Abaheburaayo 11:24-26. Twaba nitubishwijuma sherura eby’okugarukamu by’ebibuuzo ebi: Okwikiriza kukahiga kuta Musa kwangira okwetenga kw’omubiri? Musa ku yaatwariziibwe kubi, okwikiriza kukamuhwera kuta kworeka ngu naasiima obuheereza bwe? Kandi ahabw’enki Musa yaabaire “ategyereize ekihembo eki ariheebwa”?

AKANGIRA EBYETENGO BY’OMUBIRI

4. Musa akeetegyereza ki aha bikwatiraine ‘n’eby’okweshemeza by’ekibi’?

⁴ Musa ahabw’okwikiriza, akakimanya ngu “eby’okweshemeza by’ekibi” nibihwaho juba. Kwonka abamwe bo bakaba nibakireeba omu muringo gw’omutaano. Nibabaasa kuba baateekateekire ngu n’obu omuri Misri baraabe baabaire nibaramya ebishushani kandi barikwejumba omu by’obufumu, rikaba riri ihanga kirimaani, kandi abaheereza ba Yehova bakaba nibabonabonesibwa nk’abahuuku. Kwonka Musa we akaba naakimanya ngu Ruhanga naabaasa kubahwera. N’obu abo abaabaire nibakora ebibi baabaire nibareebeka nk’abari gye, Musa akaba aine okwikiriza ngu ababi nk’abo nibaija kucwekyerezibwa. N’ahabw’ekyo, tarabeihwabeihirwe ‘eby’okweshemeza by’ekibi ebirikuhwaho juba.’

5. Niki ekiraatuhwere kwetantara ‘eby’okweshemeza by’ekibi ebirikuhwaho juba’?

⁵ Noobaasa kwetantara ota ‘eby’okweshemeza by’ekibi ebirikuhwaho juba’? Otakaayebwa ngu okweshemeza nk’okwo n’okw’obwire bukye. Ahabw’okwikiriza, yetegyereze ngu “ensi egi neehwaho n’okwetenga kwayo.” (1 Yoh. 2:15-17) Teekateeka aha kiraahikye aha basiisi omu biro by’omumaisho. Abantu nk’abo nibaba bari nk’abatairwe “aharikuterera” kandi emperu yaabo neija kuba mbi. (Zab. 73:18, 19) Waayohibwa kukora ekibi, yebuuze oti: ‘Eki nikiija kukwata kita aha biro byangye by’omumaisho?’

6. (a) Ahabw’enki Musa yaayangire kwetwa “mutabani wa muhara wa Faraho”? (b) Ahabw’enki nitubaasa kugira ngu Musa akacwamu gye?

⁶ Okwikiriza kwa Musa kukamuhwera kucwamu eki araakore. “Ahabw’okwikiriza, Musa ku yaakuzire, yaayanga kwetwa mutabani wa muhara wa Faraho.” (Heb. 11:24) Musa tarateekateekire ngu naabaasa kuheereza Ruhanga arikutuura omu ka y’abagabe reero akorese obugaiga bwe kuhwera Abaisraeli. Omu mwanya gw’ekyo, Musa akacwamu kukunda Yehova n’omutima gwe gwona, amagara ge goona, n’amaani ge goona. (Bir. 6:5) Eki Musa yaacwiremu kukora kikamuhwera kuteereetera oburemeezi. Eby’obutungi eby’Abanyamisri ebirikukira obwingi bikatwarwa Abaisraeli! (Kur. 12:35, 36) Kandi Faraho n’eihe rye bakacwekyerezibwa. (Zab. 136:15) Kwonka we Musa akacungurwa hamwe n’eihanga rya Israeli kandi Ruhanga yaamukoresa kuryebembera. Musa akatunga okumarwa.

7. (a) Kurugiirira ahari Matayo 6:19-21, ahabw’enki twine kuta omutima aha biro by’omumaisho? (b) Ha eky’okureeberaho ekirikworeka entaaniso eri ahagati y’okugira eby’obutungi n’okugira omukago murungi na Yehova?

⁷ Waaba ori omuheereza wa Yehova okiri muto, okwikiriza nikubaasa kukuhwera kuta kucwamu eki oraakore omu biro by’omumaisho? Nikiba kiri eky’obwengye kwetebeekanisiza ebiro by’omumaisho. Okwikiririza omu biraganiso bya Ruhanga nikiija kukuhwera kwebiikira eitungo ery’ebiro byona omu mwanya gw’eryo eririkuhwaho juba. (Shoma Matayo 6:19-21.) Eki nikyo omwishiki omwe orikwetwa Sophie owaabaire aine etalanta y’okuzina yaacwiremu kukora. Ebitongore by’eby’okuzina omuri United States bikashaba omwishiki ogwo ngu bimushashurire emishomo ye, kandi ngu bimuhe omwanya gw’ahaiguru. Omwishiki ogwo naagira ati: “Kikanshemeza ahabw’okugira ngu bakaba nibanyenda. Buzima nkaba nindeeba ngu ninkira ab’orwingano rwangye.” Kwonka “nkaba ntaine kushemererwa.” Sophie akareeba vidiyo Young People Ask​—What Will I Do With My Life? Naagira ati: “Nketegyereza ngu ensi ekaba embasiise kurangaanwa n’okukundwa abantu omu mwanya gw’okuheereza Yehova n’omutima gwangye gwona.” Bwanyima, “nkashaba Yehova. Naarekyera aho omurimo gw’okuzina.” Hati naahurira ata aha bi yaacwiremu? “Tihariho ki ndikuhurira ninfeerwa omu bi naatsigire enyima. Hati nimpurira nyine okushemererwa okwabuzima. Nyowe na ibanyi turi baapayoniya. Titurikumanywa munonga, kandi titwine bintu bingi. Kwonka Yehova atuhwereire kugira abeegi ba Baibuli kandi twine ebigyendererwa by’omwoyo. Tihaine ki ndikwefuuza.”

8. Ni buhabuzi ki oburi omu Baibuli oburikubaasa kuhwera omunyeeto kucwamu eki araakore?

⁸ Yehova naamanya ekirikubaasa kukugasira. Musa akagira ati: “Ekindi MUKAMA Ruhanga waawe naakwenza ki? T’okutiina MUKAMA Ruhanga waawe, okugyendera omu mihanda ye yoona, okumukunda, okumuheereza n’omutima gwawe gwona n’amagara gaawe goona, n’okukwata ebiragiro bye n’ebi yaataireho, ebi ndikukuragiira hati ngu obe gye?” (Bir. 10:12, 13) Waaba ori omunyeeto, cwamu eki orikwenda kukora ekirakubaasise kukunda Yehova n’okumuheereza “n’omutima gwawe gwona n’amagara gaawe goona.” Noobaasa kugira obuhame ngu waatwaza otyo, nikiija kukubeera kirungi.

AKABA NAASIIMA OBUHEEREZA BWE

9. Shoboorora ahabw’enki nikibaasa kuba kyagumiire Musa kusiima obuheereza bwe.

⁹ Musa akareeba ngu okujumwa ahabw’okuba Kristo nikukira obutungi bwa Misri. (Heb. 11:26) Musa akaba ari nka “Kristo,” nari Oshukirweho amajuta, ahabw’okugira ngu akatooranwa Yehova kwiha Abaisraeli Misri. Musa akaba naakimanya ngu okuhikiiriza obujunaanizibwa obwo kikaba nikiija kuguma kandi kimurugiremu “okujumwa.” Omwe aha Baisraeli akaba yaajumire Musa ati: “N’oha owaakuhaire obushoboorozi bw’okututegyeka n’okutucwera emanja?” (Kur. 2:13, 14) Bwanyima Musa akabuuza Yehova ati: “Faraho we naabaasa ata kumpurira?” (Kur. 6:12) Musa kubaasa kwetebeekanisiza okujumwa, akagambira Yehova ebyabaire nibimwerarikiriza. Yehova akahwera ata Musa kuhikiiriza obuheereza bwe?

10. Yehova akabaasisa ata Musa kuhikiiriza obujunaanizibwa bwe?

¹⁰ Yehova akaha Musa enshonga kumuhamiza ngu naija kumuhwera. Ey’okubanza, akahamiza Musa ati: “ndyaba nkwine.” (Kur. 3:12) Eya kabiri, akamuhamiza arikumushoboororera amakuru g’eiziina rye ati: “Ndi MBAHO”a nari ninyija kuba kyona eki ndikwenda kuba. (Kur. 3:14) Eya kashatu, akaha Musa amaani g’okukora eby’okutangaaza kworeka ngu akooherezibwa Ruhanga. (Kur. 4:2-5) Eya kana, akamuha Arooni kuba omugambirizi we, kandi omuhwezi we kumuhwera kuhikiiriza obuheereza bwe. (Kur. 4:14-16) Musa ari haihi kufa, akaba aine obuhame kugambira Yoshua ngu Ruhanga naabaasisa abaheereza be kuhikiiriza obujunaanizibwa obu arikuba abahaire ati: “MUKAMA niwe arikukwebembera; aryaguma naiwe, tarikuhemukaho, kandi tarikutsigaho; otatiina, n’obu kwakuba okuhahaaza omutima.”​—Bir. 31:8.

11. Ahabw’enki Musa yaatwaire obuheereza bwe kuba obw’omuhendo?

¹¹ Musa arikuhwerwa Yehova, akatwara obuheereza bwe kuba obw’omuhendo “okukira obutungi bwa Misri.” Okuheereza Ruhanga kikaba nikikirira kimwe okuheereza Faraho. Mbwenu shi okuba omunyiginya omuri Misri kikaamugasiire waakigyeragyeranisa n’okutooranwa Yehova kuba “Kristo” nari oshukirweho amajuta? Musa akaheebwa ekihembo ahabw’okusiima obuheereza bwe. Akaba aine omukago ogw’ahamara na Yehova, owaamubaasiise kukora ‘ebirikutiinisa’ obwo arikwebembera Abaisraeli kubahitsya omu Nsi Eyaraganisiibwe.​—Bir. 34:10-12.

12. Ni bujunaanizibwa ki obu Yehova atuhaire obu tushemereire kutwara nka bukuru?

¹² Naitwe tuhairwe omurimo gw’okukora. Yehova arikukoresa omwana we, atuhaire omurimo gw’okubuurira nk’ogu yaahaire Paulo n’abandi. (Shoma 1 Timoseo 1:12-14.) Twena twine omugisha gw’okubuurira amakuru marungi. (Mat. 24:14; 28:19, 20) Abamwe bari omu buheereza obw’obutwire. Ab’eishe-emwe abamwe nibaheereza nk’abareeberezi nari abaheereza omu kibiina. Kwonka ab’omu ka yaanyu abatari mu mazima n’abandi, nibabaasa kuba batarikwetegyereza obukuru bw’obujunaanizibwa bwawe nainga bakujume ahabw’okwefeerereza kuhikiiriza obujunaanizibwa obwo. (Mat. 10:34-37) Baaheza kukumaramu amaani, noobaasa kutandika kwebuuza yaaba okwefeerereza nk’okwo nikubaasa kurugamu ebirungi nari ku oraabe noobaasa kuhikiiriza obuheereza bwawe. Ekyo kyabaho, okwikiriza nikwija kukuhwera kuta kugumisiriza?

13. Yehova naatuhwera ata kuhikiiriza obujunaanizibwa bwaitu?

¹³ Shaba Yehova kukuhwera otarikubanganisa. Mugambire ebirikukwerarikiriza. Ahabw’okugira ngu niwe akuhaire obujunaanizibwa obwo, naija kukuhwera kubuhikiiriza. Mu muringo ki? Nk’oku yaahweraire Musa, naakuha enshonga ezirikworeka ngu naija kukuhwera. Ey’okubanza, Yehova naakuhamiza ati: “Ndyakuha amaani, ndyakuhwera, nkuramire n’omukono gwangye gwa buryo ogw’obusinguzi.” (Isa. 41:10) Eya kabiri, naakwijutsya ngu ebiraganiso bye nibyesigwa arikugira ati: “Nkakigamba, kandi ndyakihikiiriza, Nkakimariirira, kandi ndyakikora.” (Isa. 46:11) Eya kashatu, Yehova naakuha “amaani agarikukirira kimwe” kukuhwera kuhikiiriza obuheereza bwawe. (2 Kor. 4:7) Eya kana, Yehova kubaasa kukuhwera kugumisiriza omu buheereza bwawe, naakuha ab’eishe-emwe kugira ngu “mugumyane, kandi mwombekane.” (1 Tes. 5:11) Yehova ku araagume naakuhwera kuhikiiriza obujunaanizibwa bwawe, okwikiriza kwawe nikwija kuhama kandi noija kutwara obujunaanizibwa obu oraatungye nk’obw’omuhendo okukira eby’obutungi ebiri omu nsi.

“AKABA ATEGYEREIZE EKIHEMBO EKI ARIHEEBWA”

14. Ahabw’enki Musa yaabaire naahamya ngu naija kutunga ebihembo?

¹⁴ Musa “akaba ategyereize ekihembo eki ariheebwa.” (Heb. 11:26) Ebi yaabaire naamanya aha biro by’omumaisho nibyo byamuhwereire, n’obu yaabaire atarikumanya bingi. Musa nka ishenkuru Abrahamu, akaba aine obuhame ngu Yehova naabaasa kuzoora abafu. (Luk. 20:37, 38; Heb. 11:17-19) Ahabw’okugira ngu Musa akaba aine amatsiko ngu naija kutunga emigisha omu bunaku bw’omumaisho, akabaasa kugumisiriza emyaka 40 ei yaamazire omu ihamba. N’obu araabe yaabaire atarikumanya oku Yehova araahikiirize ebi yaaraganiise, akaba naareeba ngu nibiija kuhikiirira ahabw’okwikiriza.

15, 16. (a) Ahabw’enki twine kuta omutima ha bihembo ebi turaatungye? (b) Ni bintu ki ebi orikwenda kureeba nibihikiirira, Obukama bwa Ruhanga ku buraabe nibutegyeka?

¹⁵ Mbwenu shi naiwe otegyereize ‘ekihembo eki oraaheebwe’? Nka Musa, naitwe titurikumanya buri kimwe ekirikukwata aha ku Yehova araahikiirize ebiraganiso bye. Nk’eky’okureeberaho, titurikumanya izooba obu okubonabona kwingi kuraahikye. (Mak. 13:32, 33) Kwonka, nitumanya bingi ebirikukwata aha Paradiso kukira Musa. N’obu turaabe tutarikumanya byona ebirikutwarirwamu, nitumanya ebiraganiso bya Ruhanga bingi ebirikukwata aha ku embeera ziraabe nizishusha, Obukama bwe ku buraabe nibutegyeka. Twateekateeka aha ku ensi nsya eraabe neeshusha nikiija kutuhiga kubanza kusherura Obukama bwe. Mu muringo ki? Teekateeka ahari eki: Mbwenu shi noobaasa kugura enju otarikumanya ebirikugikwataho? Ngaaha buzima! Nikyo kimwe, titwakubaasize kuta amatsiko gaitu goona aha bintu ebitari byabuzima. Okwikiriza nikutuhwera kwetegyereza gye oku embeera ziraabe nizishusha Obukama bwa Ruhanga ku buraabe nibutegyeka.

¹⁶ Kubaasa kumanya gye eki Obukama bwa Ruhanga buraareete, guma nooteekateeka aha ku embeera ziraabe nizishusha omu paradiso. Teera akashushani. Nk’eky’okureeberaho, waaba nooyega aha baheereza ba Ruhanga abaabaire bariho Obukristaayo butakatandikire, teekateeka aha ki orikubaasa kubabuuza ku barizooka. Teekateeka aha bi barikubaasa kukubuuza ebyabaireho omu biro by’emperu. Teekateeka aha ku kiriba nikishemeza kubugana baashwenkuru aba ira okabeegyesa aha bi Ruhanga yaabakoreire. Teekateeka aha kushemererwa oku origira orikwega aha nyamaishwa kandi orikuzireeba ziine obusingye. Teekateeka aha mukago ogu oraabe oine na Yehova ku origuma nooyeyongyera kuhikiirira.

17. Okuteekateeka aha birungi ebi tutarikureeba nikituhwera kita obunaku obu?

¹⁷ Okuteekateeka aha birungi ebi tutarikureeba nikituhwera kugumisiriza, kuguma tushemereirwe, n’okucwamu gye. Paulo akahandiikira Abakristaayo abashukirweho amajuta ati: “Ku tugira amatsiko aha ki tutakareebire, tukitegyereza n’okugumisiriza.” (Rom. 8:25) Eki nikikwata n’aha Bakristaayo boona abaine amatsiko g’okutunga amagara agatahwaho. N’obu turaabe tutakatungire kihembo, ahabw’okugira okwikiriza kuhami nituguma tutegyereize “ekihembo,” eki turiheebwa. Nka Musa, obwire bwona obu tumazire nituheereza Yehova titurikubureeba nk’obufiire busha. Omu mwanya gw’ekyo, twine obuhame ngu “ebirikureebwa n’eby’okuhwaho juba, kwonka ebitarikureebwa n’eby’ebiro byona.”​—Shoma 2 Abakorinso 4:16-18.

18, 19. (a) Ahabw’enki twine kuteeraho munonga kubaasa kuguma twine okwikiriza? (b) Nituza kushwijuma ki omu kicweka ekirikukurataho?

¹⁸ Okwikiriza nikutuhwera “kuhamiza kimwe ebi twineho amatsiko, kandi nikwo kutumanyisiza kimwe ebitarikureebwa.” (Heb. 11:1) Omuntu orikufa aha by’omubiri, tarikureeba bukuru bw’okuheereza Yehova. Omuntu nk’ogwo, ebintu by’omwoyo naabireeba ‘nk’eby’obushema.’ (1 Kor. 2:14) Naitwe twine amatsiko g’okutunga amagara agatahwaho, n’okureeba abantu nibazooka, kwonka ebintu ebi abantu omu nsi tibarikubireeba. Nk’abanyabigunjano b’omu bunaku bwa Paulo abaamwetsire ‘engambi y’amaingi’ omushema, abantu baingi obunaku obu nibateekateeka ngu amatsiko agu turikubuurira n’eby’obushema.​—Byak. 17:18.

¹⁹ Obu twetoroirwe abantu abataine kwikiriza, twine kuteeraho munonga kubaasa kuguma twine okwikiriza. Shaba Yehova kugira “ngu okwikiriza kwawe kutahwaho.” (Luk. 22:32) Guma noijuka ebirikubaasa kuruga omu kibi, obukuru bw’okuheereza Yehova, n’amatsiko g’amagara agatahwaho agu twine. Kwonka, okwikiriza oku Musa yaabaire aine kukamubaasisa kureeba ebirikukira ahari ebyo. Omu kicweka ekirikukurataho, nitwija kureeba oku okwikiriza kwahwereire Musa kureeba “ogwo otareebwa.”​—Heb. 11:27.